Tottenhamning shubhali ro‘yxati: Brentford oldidan xavotir
“Tottenham” yangi mavsum arafasida nihoyat biroz ijobiy xabar oldi. Mateus Fernandes, James Maddison va Destiny Udogie Premer-liganing ochilish uchrashuvi oldidan mashg‘ulotga qaytdi. Ammo Micky van de Ven borasida savollar hanuz ko‘p, javob esa yo‘q.
Maddison va Udogie – ehtiyot rejimidagi yulduzlar
Roberto De Zerbi yozgi tayyorgarlik davomida asosiy futbolchilarining sog‘lig‘i bilan yashashga majbur bo‘ldi. Maddison va Fernandesga mashg‘ulotlar va o‘rtoqlik o‘yinlarida dozalangan daqiqalar berildi, Udogie va Van de Ven esa umuman premer-mavsumoldi uchrashuvlarida ko‘rinmadi.
Udogie o‘tgan mavsumdagi ketma-ket mushak jarohatlaridan so‘ng ehtiyotkorlik bilan olib borilmoqda. Maddison ham hali to‘liq quvvatga chiqqani yo‘q – u o‘tgan yozda olgan tizza (ACL) jarohatidan keyingi to‘liq tiklanish bosqichida.
Shunga qaramay, ikkisi ham “Brentford”ga qarshi o‘yin uchun tarkibga kirish uchun bosimni oshiryapti. Ular bilan birga yozgi transfer oynasidagi yangi futbolchi – Fernandes ham qaytishga urinmoqda. Uning so‘nggi haftalarda boldiridagi muammo sababli cheklangan holda shug‘ullangani ma’lum.
Van de Ven – katta savol belgisi
Optimistik kayfiyatni birgina ism buzmoqda: Micky van de Ven. U Hotspur Waydagi mashg‘ulotlarda ko‘rinmadi. Bu esa “Tottenham” shtabini ham, muxlislarni ham jiddiy o‘ylantiradi.
Niderlandiyalik markaziy himoyachi yaqindagina klub bilan yirik yangi shartnoma imzolagan edi. Shunga qaramay, u Jahon chempionatidan qaytgach, De Zerbi boshchiligidagi birorta ham mavsumoldi uchrashuviga jalb qilinmadi. Endi esa “Brentford”ga qarshi ochilish o‘yinida maydonga tushishi juda ham ehtimoldan yiroq ko‘rinadi.
Solanke ham shubha ostida
Hujum chizig‘ida ham muammo bor. Dominic Solanke ham hozircha “savol ostida”. U yozgi tayyorgarlik davomida juda kam qo‘llanildi. Sabab aniq: o‘tgan mavsumning katta qismini to‘piq va son orqa mushaklari bilan bog‘liq jarohatlar tufayli o‘tkazib yuborgan.
Demak, De Zerbi bir vaqtning o‘zida ham himoyada, ham hujumda asosiy rejalarini qayta ko‘rib chiqishga majbur.
237 millionlik va’da va 17-o‘rinlik xotira
Shu sharoitda “Spurs” shanba oqshomida Gtech Community Stadiumga yo‘l oladi. Maqsad oddiy – agressiv yozgi transferlar fonida darhol kuchli bayonot berish.
Shimoliy London klubi yozda olti nafar yangi futbolchi uchun 237 million funt sarfladi. Bu raqam tasodifiy emas, bu – o‘tgan mavsumdagi 17-o‘rinni unutish uchun qilingan ochiqcha urin.
Endi savol bitta: jarohatlardan aziyat chekayotgan, ammo yangilangan tarkib “Brentford”ga qarshi ilk kechadanoq bu sarmoyani oqlay oladimi yoki “Tottenham” yana bir murakkab mavsum bo‘sag‘asida turibdimi?
