Terry Rozier: Sudda himoya va ayblovlar
Terry Rozier o‘z nomini sud zalida himoya qilish uchun keskin hujumga o‘tdi. Erkin agent maqomidagi sobiq Charlotte Hornets gardi federal hukumat qo‘ygan to‘rt ayblovdan ikkitasi bekor qilinishini talab qilmoqda. Unga qo‘yilgan asosiy da’vo – ataylab jarohatni soxtalashtirib, sport garovxo‘rlari uchun sharoit yaratgani.
Sharqiy Nyu-York okrugi sudiga 31-iyul kuni topshirilgan hujjatlarga ko‘ra, Rozierning advokatlari sport poraxo‘rligi va “honest services” turidagi simli firibgarlik fitnasi bo‘yicha ayblovlar asossiz ekanini ta’kidlashmoqda. Ular yana bir jinoyat bandini ham noto‘g‘ri yurisdiksiya sababli ishdan chiqarishni so‘rashgan.
Himoya tomonining pozitsiyasi keskin: Rozier o‘z faoliyati davomida ham Charlotte Hornets, ham butun NBA oldidagi majburiyatlarini “halol xizmat” bilan bajarganini yozma ravishda bildirdi. Hujjatlarda u har daqiqada maydonga hamma narsasini bergani, ko‘pincha og‘riqqa qaramay o‘ynagani, murabbiylar va jamoadoshlar talab qilgan hamma ishni bajargani urg‘ulanadi.
Advokatlar bayonotida ohang yanada qat’iylashadi: Rozierni “basketbolchi, qimorboz emas” deb ta’riflashadi. U hech qachon garov tikmagani, ataylab zaif o‘ynamagani, bunday rejaga rozi bo‘lmagani va 2023-yil 23-mart kuni bo‘lib o‘tgan Charlotte Hornets – New Orleans Pelicans uchrashuvida uning statistikasi bo‘yicha kimdir garov qo‘yayotganidan bexabar bo‘lgani yozilgan. Hujjatlarda “hukumatning o‘z dalillari ham shuni ko‘rsatadi”, degan jumla alohida ajratib qo‘yilgan.
Himoya tomoni nuqtayi nazarida, ish butunlay yopilishi uchun yetarli asoslar allaqachon mavjud.
Bir SMS – butun ish taqdiri?
Rozier bilan birga ayblanayotgan Deniro Laster nomi hujjatlarda alohida tilga olinadi. 2023-yil 29-mart kuni u uchinchi shaxsga yozgan xabari ish markaziga chiqdi: “Dont tell chum bout the bet”. Sud materiallarida “chum” Rozierning laqabi sifatida qayd etilgan.
Advokatlar bu xabarni burilish nuqtasi deb ko‘rmoqda. Ularning fikricha, agar Rozier “sotilgan” garovning markazida bo‘lganida, undan bunday sir saqlanmagan bo‘lardi: “Bu ishni yakunlashi kerak. Kimgadir sotilgan garovni aynan o‘sha odamdan yashirishmaydi”, – deyiladi hujjatda.
Shunga qaramay, Rozier atrofidagi ayblovlar kichik doiradagi mojarodan ancha kengroq ko‘rinishga ega.
Keng ko‘lamli tergov soyasida
32 yoshli gard allaqachon simli firibgarlik fitnasi va pul yuvish fitnasi bo‘yicha alohida ishda ham ayblanmoqda. U 2025-yil oktyabr oyida hibsga olingan, bu esa federal idoralar ta’rifiga ko‘ra, uyushgan jinoyatchilik bilan bog‘langan, 30 dan ortiq shaxsni qamrab olgan noqonuniy qimor sxemasining bir bo‘lagi sifatida ko‘rsatilgan.
Tergov materiallarida Rozier bir yil davomida Los Angeles Lakers, Portland Trail Blazers, Charlotte Hornets, Orlando Magic va Toronto Raptors o‘yinlari bo‘yicha garovlar tikishda foydalanilgan “insayder ma’lumotlar”ni yetkazib bergani iddao qilinadi. Himoya tomoni esa aynan shu nuqtada ham ayblovlarning isbot bazasini shubha ostiga olmoqda.
Eng keskin bandlardan biri – sport poraxo‘rligi va “honest services” simli firibgarligi bo‘yicha alohida ayblov. Prokurorlar versiyasiga ko‘ra, Rozier 2023-yil 23-mart kuni Pelicansga qarshi o‘yinda oyoq jarohati sabab maydonni erta tark etishni oldindan rejalashtirgan. U atigi 10 daqiqaga yaqin o‘ynagan, besh ochko va ikki golli uzatma bilan cheklangan va uchrashuvga qaytmagan.
Ayblovga ko‘ra, Rozier o‘sha paytda Lasterga o‘yinni erta tark etishini aytgan, Laster esa bu ma’lumotni boshqalarga “sotgan”. Natijada Rozier statistikasi bo‘yicha “under” garovlari qo‘yilgan, Rozierning o‘zi esa bu sxema uchun 100 ming dollar olgani iddao qilinadi.
Himoya tomoni bu rasmni butunlay rad etmoqda va aynan Lasterning “Dont tell chum bout the bet” degan xabarini hukumat konstruksiyasini buzib tashlaydigan asosiy bo‘lak sifatida ko‘rsatmoqda.
Sud zali va parket orasidagi chiziq
Bir tomonda – federal ayblovlar, katta miqdordagi pul, uyushgan jinoyatchilik, qimor bozori. Ikkinchi tomonda – o‘zini “qon, ter va ko‘z yoshini basketbolga bergan” o‘yinchi sifatida ko‘rsatayotgan gard va uning jamoasi.
NBA yozgi bozorida Rozierning kelajagi hamon savol ostida turgan bir paytda, Sharqiy Nyu-Yorkdagi sud qarori uning nafaqat obro‘sini, balki butun faoliyat yo‘lini belgilab berishi mumkin. Endi savol bitta: sudya uchun bitta SMS va himoya tomoni talqin qilayotgan “halol xizmatlar” Rozier nomini tozalashga yetadimi?
