Salahdan keyingi hayot: Liverpool qanot qidirmoqda
Yozgi bozor hali rasmiy ochilgani yo‘q, lekin Angliyada allaqachon katta pul va katta qarorlar havoda uchib yuribdi. Eng keskin savol esa aniq: Liverpool Mohamed Salahdan keyingi davrni qanday boshlaydi?
Javob izlayotgan klubning nigohi hozircha Yankuba Mintehga qadalgandek. 21 yoshli qanot futbolchi uchun Brighton 80 million funtlik narx belgiladi. Bu shunchaki muzokara uchun start emas, bozorni chizib beradigan signal. Xabar qilinishicha, Andoni Iraola jamoasi bu taklifni jiddiy o‘ylab chiqyapti, Liverpool esa Salah o‘rnini bosadigan nomzodlar ro‘yxatida Mintehni yuqoriga ko‘targan.
TEAMtalk ma’lumotiga ko‘ra, Brighton bozorni baholashda yaqinda sodir bo‘lgan Anthony Gordonning Barcelonaga transferidan o‘lchov sifatida foydalanmoqda. Ya’ni, qanot futbolchilari uchun narxlar endi shu darajada. Kim kirishni xohlasa, shuncha to‘lashi kerak.
Nusa atrofida besh tomonlama jang
Bozor markazida faqat Minteh emas. Norvegiya terma jamoasining Jahon chempionati yulduzlaridan biri, 21 yoshli Antonio Nusa ham Premyer-ligada katta ovning markazida turibdi.
Uning o‘yini Norvegiya safida ko‘plab skautlarning daftarini to‘ldirdi. Endi esa Leipzig qanot futbolchisi uchun narx – 50 million yevro. Bu summa atrofida esa haqiqiy poyga boshlangan.
Arsenal va Tottenham Nusa uchun jiddiy da’vogarlar qatorida tilga olinmoqda. Lekin ular yolg‘iz emas. Aston Villa, Newcastle United va Crystal Palace ham vaziyatni diqqat bilan kuzatib turibdi. Besh klub, bitta iqtidor, baland narx va vaqt tobora qisqarib borayotgan yoz – Nusa qarori kimning loyihasiga ishonishini ko‘rsatib beradi.
Real Madrid eshikni yopdi: Carreras qoladi
Madridda esa boshqa manzara. Real Madrid chap qanot himoyachisi Alvaro Carreras bo‘yicha Chelsea va Manchester United qiziqishiga aniq javob qaytargan.
Ispaniya grand klubi, xabarlarga ko‘ra, ingliz klublarining yondashuvini rad etgan. Bu qaror Chelseadan kelgan Marc Cucurella transferiga qaramay qabul qilingani alohida e’tiborli. Demak, Carreras klub ichida muhim bo‘g‘in sifatida ko‘rilmoqda va uni “guruhda saqlab qolish” – Madrid rejalarining bir qismi.
Insayder Fabrizio Romano xabariga ko‘ra, Premyer-liga klublarining urinishlari hozircha natijasiz tugagan. Madrid bu pozitsiyada barqarorlikni tanlagan.
Manchester United: qanotdan keyin orqa chiziq
Shunga qaramay, Manchester United yozgi rejasini boshqa yo‘nalishda davom ettiryapti. Klub Borussia Dortmund himoyachisi Julian Ryerson bilan aloqani boshlab yuborgan.
Nemis nashri BILD ma’lumotiga ko‘ra, o‘tgan mavsum Bundesligada 15 ta golli uzatma bergan norvegiyalik futbolchi “qizillar” ro‘yxatida yuqori o‘ringa ko‘tarilgan. Dortmund Ryersonni 30 million yevroga baholamoqda. Bu summa himoyachi uchun kichik emas, lekin universal, oldinga chiqib hujumni qo‘llab-quvvatlay oladigan futbolchi uchun bozor sharoitida odatiy ko‘rinish olgan.
Agar kelishuv amalga oshsa, United orqa chizig‘iga nafaqat raqobat, balki o‘yin ritmini o‘zgartira oladigan yana bir energiya manbaini qo‘shadi.
Newcastle: eski yulduzlar ketmoqda, Next-Gen kelmoqda
Taynsayd esa butunlay boshqa sahna. Newcastle uchun bu yoz – o‘tish davri. Katta maoshli va katta nomli futbolchilar ketmoqda, klub esa ko‘zini kelajakka qaratgan.
Eddie Howe boshchiligidagi jamoa “Next-Gen” avlodiga sarmoya kiritish yo‘lini tanlagan. So‘nggi qadam – Shveytsariya iste’dodi Johan Manzambi uchun kelishilgan 60 million yevrolik bitim. Jahon chempionatida o‘zini ko‘rsatgan yosh futbolchi endi St James’ Park tomon yo‘l olmoqda.
Bu transfer Newcastlening yangi strategiyasini juda aniq ifodalaydi: hozir emas, besh yil keyin ham yuqori darajada raqobat qila oladigan jamoa qurish. Savol esa shunday: Premyer-ligada bosim shu qadar kuchli bo‘lgan paytda, bu sabrga vaqt yetadimi?
