US Open uchun Polo Ralph Lauren kolleksiyasi: yangi uslublar
Tennis ishqibozlari so‘nggi kunlarda biroz parishon bo‘lib yurgan bo‘lsa, ularni tushunish oson. US Open shunchalik tez yaqinlashyaptiki, bu Jannik Sinner’ning chiziq bo‘ylab urgan forehand zarbasidan ham tezroqdek tuyuladi. Yilning so‘nggi “Grand Slam”i oldidan hamma turnir sxemalarini, favoritlarni, dramatik kechalar ehtimolini o‘ylab yurgan bir paytda, kortga chiqmaydiganlar uchun ham alohida “razminka” paydo bo‘ldi: Polo Ralph Lauren’ning yangi US Open kolleksiyasi.
Bu brend turnirning rasmiy hamkorlaridan biri sifatida allaqachon an’anaga aylangan. Bu safar esa ular US Open’ga bag‘ishlangan 60 dan ortiq turli buyumni taqdim etdi. Son ko‘p, lekin takror emas. Kolleksiya tarkibidagi xilma-xillik Carlos Alcaraz’ning zarbalar repertuaridan kam emas.
Kortda o‘ynaydiganlar uchun yuqori texnologiyali, havo o‘tkazuvchi, harakatni yengillashtiradigan forma – tayyor. Tribunadan tomosha qiladigan, lekin baribir uslubdan voz kechmaydiganlar uchun vintaj ruhidagi trikotajlar – alohida yo‘nalish. Turnirni ekrandan tomosha qilib ham o‘zini stadion ichidagidek his qilmoqchi bo‘lganlar-chi? Ular uchun hakamlar va to‘p tashuvchilar kiyadigan aniq o‘sha formalar ham kolleksiyada bor.
Klassik futbolkalar, mayda, did bilan ishlangan naqshli tugmali ko‘ylaklar, US Open estetikasini eslatib turadigan detal va ranglar – bularning barchasida Polo Ralph Lauren qo‘li yaqqol seziladi. Bu oddiy sovg‘a-do‘kon mahsuloti emas, balki boshidan oxirigacha o‘ylangan, konsepsiyaga ega, bir butun hikoya.
Natijada yilning eng qiziqarli, eng kutilmagan va eng to‘liq sport kolleksiyalaridan biri paydo bo‘ldi. Shunchalik puxta tuzilganki, uni shunchaki “merch” deb atash, deyarli adolatsizlikka o‘xshaydi.
Bitta muammo bor, xolos: tanlashga vaqt ko‘p emas. US Open boshlanishiga sanoqli kunlar qoldi, savdo rastalarida esa bu buyumlar allaqachon tez sur’atda yo‘qolib boryapti. Tennis mavsumi yakuniy marra chizig‘iga yaqinlashar ekan, savol bitta: kortdagimi yoki garderobdagimi – qaysi uslubingiz bilan esda qolasiz?
