NBA Rojdestvo kuni 2026-27: besh o‘yinda eng yirik yulduzlar
NBA Rojdestvo kuni jadvali e’lon qilindi: besh o‘yin, besh sahna, liganing eng yirik yulduzlari bir kunda parketga tushadi. Tashkilotchilar 2026-27 mavsumining 25 dekabrini nafaqat tomoshabinlar, balki tarix kitoblari uchun ham bayramga aylantirishga urinmoqda.
Finalchilar dueli, eski raqobatlar, yangi superjamoalar, MVPlar, Finals MVPlar, All-Starlar – hammasi bitta marafonda.
O'yinlar Jadvali
- San Antonio Spurs – New York Knicks (12:00, ABC/ESPN)
- Miami Heat – Boston Celtics (14:30, ABC/ESPN)
- Philadelphia 76ers – Los Angeles Lakers (17:00, ABC/ESPN)
- Oklahoma City Thunder – Minnesota Timberwolves (20:00, ABC/ESPN)
- Denver Nuggets – Golden State Warriors (22:30, ABC/ESPN)
Bu safar ham markazda tanish yuzlar: LeBron James, Steph Curry, Giannis Antetokounmpo, Shai Gilgeous-Alexander, Nikola Jokić, Jalen Brunson, Jaylen Brown, Joel Embiid. Barchasi chempionlikni ko‘rgan, ko‘pchiligi esa MVP va Finals MVP unvonini ham tatib ko‘rgan yulduzlar.
Spurs – Knicks: final takrori va Nyu-York sahnasi
Madison Square Garden va Rojdestvo – bu allaqachon NBA folklorining bir qismi. 1947 yildagi ilk Rojdestvo o‘yinlaridan beri Knicks bu kunning doimiy mehmoni. Endi esa ular 59-marta 25 dekabrga chiqishadi, 51-marta esa shu arenada mezbonlik qilishadi.
Bu o‘yin oddiy navbatdagi sana emas. Bu – 2026 NBA Finals ishtirokchilarining qayta to‘qnashuvi. Ikki yil avval, Rojdestvo-2024da ham shu juftlik sahnaga chiqqan, o‘shanda Knicks 117-114 hisobida g‘alaba qozongan, Victor Wembanyama esa 42 ochko, 18 ribaund, 4 golli uzatma va 4 blok bilan MSG parketini larzaga keltirgan edi.
Nyu-York atrofida esa o‘sha klassik manzara: 34-ko‘chadagi mo‘jiza, Macy’sdagi Santa, Rockefeller markazidagi archa va muz maydoni, va albatta – Knicksning Rojdestvo o‘yini. Shahar uchun bu marosimga aylangan.
O‘tgan mavsumda Knicks Rojdestvoda Cleveland Cavaliersni 126-124 hisobida yenggan, Jalen Brunson esa 34 ochko bilan porlagan. Oradan olti oy o‘tib u Finals MVP bo‘ldi. Spurs esa o‘sha kuni Thunder ustidan 117-102 hisobida g‘alaba qozongan: De’Aaron Fox 29 ochko, Wembanyama 19 ochko va 11 ribaund bilan o‘yinni yopgan.
Endi esa final kayfiyati, Rojdestvo dekoratsiyasi va Wembanyama – Brunson atrofida aylanuvchi katta sahna yana qaytadi.
Heat – Celtics: Giannis va mukammal Rojdestvo rekordi
Giannis Antetokounmpo va Miami Heat uch yillik tanaffusdan so‘ng Rojdestvo sahnasiga qaytadi. Bu Giannis uchun Heat libosidagi ilk 25 dekabr o‘yini bo‘ladi. Jamoa uch yil avval Philadelphia 76ersni 119-113 hisobida mag‘lub etgan edi.
Giannis Rojdestvo statistikasi bilan ham xavfli: olti o‘yinning uchtasida kamida 30 ochko, beshtasida esa kamida 12 ribaund. Katta sahnada u odatda yomon o‘ynamaydi – bu esa Boston uchun ogohlantirish.
Ammo bu juftlikning eng katta hikoyasi yon chiziqda. Erik Spoelstra Rojdestvo kunida hali mag‘lub bo‘lmagan murabbiy. Uning 25 dekabrdagi rekordi – 9-0: 2009, 2010, 2011, 2012, 2013, 2014, 2015, 2020 va 2023 yillardagi g‘alabalar. Miami esa Rojdestvo o‘yinlarida ligadagi eng yaxshi foizga ega: 12-2, ya’ni .857.
Boston uchun bu 39-Rojdestvo o‘yini – tarixda uchinchi ko‘rsatkich. Celtics oxirgi marta 2024 yilda Rojdestvoda maydonga tushgan, o‘shanda Philadelphia 76ersga 118-114 hisobida yutqazgan edi. Endi ular yana shu kunni o‘z foydasiga qaytarishga urinadi, lekin qarshida Giannis va Spoelstra kabi ikki katta faktor turibdi.
76ers – Lakers: yangi yulduzlar bilan qaytgan 80-yillar ruhi
Bu juftlik nomi tilga olingan zahoti xayolga 80-yillardagi klassik to‘qnashuvlar keladi. O‘sha paytda Magic Johnson, Kareem Abdul-Jabbar, James Worthy, Julius Erving, Moses Malone, Maurice Cheeks sahnani bo‘lishgan bo‘lsa, endi boshqa avlod navbatda: LeBron James, Joel Embiid, Jaylen Brown, Tyrese Maxey, Luka Dončić, Austin Reaves.
LeBron bu kunda allaqachon tarixni yozib bo‘lgan. U Rojdestvo o‘yinlarida eng ko‘p maydonga tushgan o‘yinchi – 20 ta o‘yin, endi esa sobiq jamoasi Los Angeles Lakersga qarshi 21-o‘yinga chiqishga tayyorlanmoqda. Statistikalar ham o‘z yo‘lida: u Rojdestvo kuni bo‘yicha eng ko‘p ochko (525), eng ko‘p kiritilgan to‘p (187) muallifi. Topilgan to‘p bo‘yicha ham birinchi o‘rinni (30) bo‘lishib turibdi, golli uzatmalarda esa 142 ta bilan ikkinchi, va Oscar Robertsonning 145 ta ko‘rsatkichini quvib kelmoqda.
U shuningdek Rojdestvo uch ochkolari bo‘yicha ham ikkinchi – 32 ta, faqat Cleveland yulduzi James Harden undan uchta oldinda. Eng ko‘p g‘alaba ham LeBronga tegishli – 11 ta. Eng hayratlanarlisi: u ketma-ket 19 mavsum Rojdestvoda maydonga tushgan.
Luka Dončić esa zamonaviy Rojdestvo tarixining eng yorqin sahifalaridan biriga ega. U hozirgi faol o‘yinchilar orasida Rojdestvo kuni kamida 50 ochko urgan yagona basketbolchi – 2023 yilda Dallas Mavericks safida Phoenix Sunsga qarshi 50 ochko. Umuman olganda, Rojdestvo kuni 50 va undan ortiq ochko to‘plagan atigi to‘rt o‘yinchi bor: Bernard King (60 ochko, 1984), Wilt Chamberlain (59, 1961), Rick Barry (50, 1966) va Dončićning o‘zi.
Endi esa bu raqamlar Embiid va Brown bilan bir jamoada, LeBron va Lakersga qarshi sinovdan o‘tadi.
Thunder – Timberwolves: konferensiya finali soyasi va yangi sahna
Minnesota Timberwolves ketma-ket uchinchi, klub tarixida esa beshinchi marta Rojdestvo o‘yiniga chiqadi. Bu jamoa uchun 25 dekabr yaqin o‘tmishda ham drama bilan esda qolgan: o‘tgan mavsumda ular Denver Nuggetsga qarshi 142-138 hisobidagi qo‘shimcha daqiqali o‘yinda yutqazishgan, Anthony Edwards esa 44 ochko bilan portlagan edi.
Endi sahnaga yangi nom qo‘shiladi – LaMelo Ball. U Timberwolves libosida Rojdestvodagi ilk o‘yini o‘tkazadi. Uning tempni tezlashtiruvchi o‘yini va Edwardsning portlovchi hujumkorligi bu juftlikni kechki dasturdagi eng shov-shuvli o‘yinlardan biriga aylantirishi mumkin.
Thunder uchun ham bu kun yaqinda tanish bo‘lib qoldi. O‘tgan mavsumda ular Spursga 117-102 hisobida yutqazishdi, lekin bir nechta yulduz ilk bor Rojdestvo sahnasiga chiqqan edi. Ular orasida ikki karra MVP Shai Gilgeous-Alexander ham bor edi: 22 ochko, 6 ribaund, 4 golli uzatma – raqamlar unchalik yorqin ko‘rinmasligi mumkin, ammo bu uning Rojdestvo tarixidagi faqat kirish qismi bo‘lishi ehtimoli katta.
Bu juftlikni alohida qiladigan yana bir chiziq bor: Thunder 2025 yilgi Western Conference Finalsda aynan Timberwolvesni mag‘lub etgan. O‘sha seriyaning izi hali ham yo‘qolgan emas. Endi esa Rojdestvo dekoratsiyasi fonida yana bir bor to‘qnashuv.
Nuggets – Warriors: Jokićning sovg‘asi va Curry davrining davomiyligi
Kechaning yakuniy o‘yini – NBAning so‘nggi yillarda eng ko‘p tomosha qilinadigan ikki jamoasi to‘qnashuvi. Denver Nuggets va Golden State Warriors, va albatta, markazda Nikola Jokić.
Jokić Rojdestvo uchun maxsus dastur tayyorlaydigan o‘yinchilardan. U olti Rojdestvo o‘yinda uch marta triple-double qayd etgan. O‘tgan mavsumdagi ko‘rsatkich esa butunlay boshqa daraja: Minnesota Timberwolvesga qarshi 142-128 hisobidagi qo‘shimcha daqiqali g‘alabada 56 ochko, 16 ribaund, 15 golli uzatma. Bunday raqamlar Rojdestvo tarixida deyarli uchramaydi.
U kamida 40 ochko, 15 ribaund va 15 golli uzatma bilan Rojdestvo kuni o‘yinni yakunlagan atigi uch o‘yinchidan biri, va buni ikki marta uddalagan yagona basketbolchi. Jamal Murray ham o‘z izini qoldirgan: o‘tgan mavsumda u Rojdestvo o‘yini tarixida eng ko‘p uchlik kiritgan o‘yinchi sifatida qayd etildi – 9 ta uch ochkolik.
Warriors tomonda esa Rojdestvo allaqachon yillik an’anaga aylangan. Bu klub so‘nggi 17 mavsumning 16 tasida, ketma-ket 14 yildirki 25 dekabrda o‘ynab kelmoqda. Steph Curry va Draymond Green bu kunning doimiy yuzlariga aylangan.
Curry o‘tgan mavsumda Rojdestvoda 23 ochko kiritgan, 2024 yilda esa Lakersga qarshi 115-113 hisobidagi mag‘lubiyatda 38 ochko urgan edi. U uch ochkoliklar bo‘yicha sobiq jamoadoshi Klay Thompson bilan birga Rojdestvo tarixida uchinchi o‘rinni bo‘ylishib turibdi – 28 ta uchlik. Golli uzatmalar bo‘yicha esa sakkizinchi (74), Chris Pauldan atigi ikki pas ortda.
Bir tomonda Rojdestvo triple-doublelari bilan mashhur serbiyalik markaz. Ikkinchi tomonda esa butun bir davrni o‘zgartirgan snayper. Savol oddiy: bu safar tungi sahnani kim egallaydi – Jokićning og‘ir artilleriyasi yoki Curryning uzoq masofali zarbalari?
