Mourinho Arda Gülerning kelajagini chizdi: 10 dan 6 gacha yo‘l
Mourinho Arda Gülerning kelajagini chizdi: “10”dan “6”gacha bo‘lgan yo‘l
Madridda murabbiylar almashdi, lekin bosim o‘sha-o‘sha. Titulsiz o‘tgan mavsumdan so‘ng endi Jose Mourinho qo‘lida Real Madrid qayta qurilishi kerak bo‘lgan jamoaga aylandi. U nafaqat yangi kelganlarni moslashtirishi, balki allaqachon bu kiyinish xonasida yurgan yulduzlarni ham yana eng yuqori darajaga qaytarishi shart. Shular qatorida – Arda Güler.
“Oldinda boshlaysan, orqada tugaysan”
Mourinhoning turk iqtidoriga munosabati qisqa, lekin aniq: u Arda Gülerni kelajakda maydon markazining chuqur qatlamida ko‘radi.
“Men Arda’ni yaxshi ko‘raman. O‘ylaymanki, Arda bilan ham xuddi Luka (Modric) va Bernardo (Silva)da bo‘lgani takrorlanadi: oldinda boshlaysan, orqada tugaysan”, – deydi portugaliyalik mutaxassis.
Mourinho fikricha, bu shunchaki pozitsiya almashinuvi emas, butun futbol tafakkurining evolyutsiyasi.
“Sen ‘10’ raqam, hujumkor o‘yinchi sifatida boshlaysan, keyin ‘8’ga aylanasan, oxirida ‘6’ bo‘lasan. Ardaning rivojlanishi, o‘yinni tushunishi bilan u aynan shu yo‘ldan borishiga ishonaman”, – deya qo‘shimcha qiladi u.
Bu so‘zlar shunchaki maqtov emas. Bu – yo‘l xaritasi.
Qimmat transfer, lekin hali to‘liq ochilmagan karta
Arda Güler 2023 yilda Fenerbahce’dan 28 million yevroga olib kelinganida, Madrid uni kelajak ramzlaridan biri sifatida ko‘rdi. Bunday summa Real Madrid mezoniga ko‘ra ham jiddiy sarmoya.
Ammo hozircha u yulduzlar bilan to‘la tarkib orasida barqaror o‘rin egallay olmadi. Sabablardan biri – uning roli doimiy ravishda siljib turgani, maydonda qayerda va qanday bo‘lishi borasida aniq konsepsiya yo‘qligi edi. Endi esa Mourinho qo‘lida bu mavhumlik asta-sekin tarqalayotgandek.
Real Madrid Toni Kroos va Luka Modric bilan xayrlashganidan beri klassik, chuqur joylashgan ritm-belgilovchi yarim himoyachidan mahrum. Rejaga ko‘ra bu bo‘shliqni to‘ldirishi kerak bo‘lgan jahon chempioni Rodri ham oxir-oqibat boshqa yo‘lni tanladi va Barcelonaga borishni ma’qul ko‘rdi.
Fede Valverde, Aurelien Tchouameni kabi markazdagi hozirgi nomlar kuch, diapazon, pressing beradi, lekin Kroos yoki Modric uslubidagi orqadan o‘yin boshqaruvchi profilda emas. Aynan shu bo‘shliq Arda uchun eshikni ochishi mumkin.
Gülerni chuqurroq yarim himoyaga surish – risk ham, imkoniyat ham. Risk, chunki u bolaligidan hujumkor rolda o‘ynab o‘rgangan. Imkoniyat, chunki uning texnikasi, maydonni ko‘rishi va pas madaniyati aynan shu hududda Realga yetishmayotgan sifatlarni beradi.
Bernardo Silva – Mourinho loyihasining markazi
Mourinho efirda faqat Arda haqida emas, yangi yulduz – Bernardo Silva haqida ham to‘xtaldi. Portugaliyalik yarim himoyachi Real Madridga Barcelonava Atletico Madrid qiziqishiga qaramay kelishni tanladi. Bu transfer ichki raqobat fonida yanada balandroq yangradi.
“U Pep Guardiola o‘yinchisi va senga hamma narsani beradi. Umid qilamanki, muammolar kam bo‘ladi va barqarorlik ko‘p bo‘ladi. Agar muammo kam, barqarorlik ko‘p bo‘lsa, men uchun bugun Bernardo markaziy yarim himoya o‘yinchisi. Lekin Bernardo ‘10’ sifatida ham, o‘ng qanotda ham, ichkariga kirib ham o‘ynashi mumkin. Bernardo deyarli hamma joyda o‘ynay oladi”, – deydi Mourinho.
Bu ta’rif bejiz emas. Bernardo Silva – aynan Mourinho Arda Güler uchun chizayotgan yo‘lning hozirgi, yetuk namunasi. Oldinda boshlagan, lekin o‘yin aql-zakovati va universal qobiliyati tufayli markazga, hattoki chuqurroqqa surilgan futbolchi.
Murabbiy transfer ortida boshqa hisob-kitob yo‘qligini ham alohida urg‘uladi: “Men uni doimo yaxshi ko‘rganman. Bu Barcelonaning uni xohlashi, Atletico xohlashi bilan bog‘liq emas. Qo‘shnimiz xafa bo‘lsin deb uni tortib olishimiz ham emas. Bu mening ishonchim edi: Bernardo Real Madrid darajasiga mos keladi”.
Demak, bu shunchaki raqibni zaiflashtirish emas, o‘z o‘yinini qayta qurish rejasi.
Arda uchun yangi eshik ochiladimi?
Kroos va Modric ketgan, Rodri kelmagan, Bernardo Silva esa markazda asosiy figura bo‘lishga yaqin. Bunday manzarada Mourinho Gülerga chuqur yarim himoyachi sifatida yangi rol berishga urinishi mantiqli ko‘rinadi.
Arda endi faqat “yorqin talant” emas, balki Real Madridning o‘yin ritmini belgilashga da’vogarlik qilishi mumkin bo‘lgan futbolchi sifatida ko‘rilmoqda. Savol bitta: u Modric va Bernardo bosib o‘tgan yo‘lni o‘z uslubida, lekin shu darajada mukammal davom ettira oladimi?
Madrid javobni kutyapti. Mourinho esa allaqachon yo‘lni chizib bo‘ldi. Endi navbat Arda Gülerga.
