Glasgowdagi tartibsizliklar: politsiya 28 nafar Celtic muxlisini qidiryapti
Premyer-ligadagi beshinchi ketma-ket chempionlik. Celtic uchun bu tarixiy kecha edi, ammo Glasgow markazidagi bayram tezda keskin tus oldi.
16 may kuni Trongate atrofida taxminan 3 mingga yaqin muxlis jam bo‘ldi. Hearts ustidan dramatik 3:1 hisobidagi g‘alaba Edinburgh klubining 66 yillik chempionlik orzusini yana keyinga surdi, Celtic tarafdorlari esa shahar ko‘chalarini yashil-oq rangga bo‘yadi. Ammo shodiyonaning ohiri mutlaqo boshqacha bo‘ldi.
Shodiyona o‘rniga toshlar va shishalar
Politsiya xabariga ko‘ra, bayram avjiga chiqqan paytda tartib buzilishi jiddiy ko‘lamga yetdi. Huquq-tartibot idoralari xodimlariga qarata shisha butilkalar va boshqa buyumlar uloqtirildi. Ayni vaqtda hamkasblari tez yordam xodimlariga tibbiy favqulodda holatga yetib borishda yordam berayotgan politsiyachilar dushmanona kayfiyatdagi olomonga duch kelgan.
Shundan so‘ng maxsus himoya kiyimidagi (riot gear) bo‘linmalar ko‘chalarni tozalash uchun hududga kiritildi. Police Scotland bu kechani “jiddiy tartibsizlik darajasi” bilan eslab qoldi: ikki nafar politsiyachi og‘ir jarohat oldi, uch nafar fuqaro tibbiy yordamga muhtoj bo‘ldi.
Yangi mavsum arafasida eski muammo
Yangi Premiership mavsumi startiga atigi bir necha kun qolgan bir paytda tergov hanuz davom etmoqda. Tergovchilar tartibsizliklar bo‘yicha surishtiruv doirasida 28 nafar muxlisning suratlarini e’lon qildi va ularni aniqlashga yordam so‘ramoqda.
Greater Glasgow bo‘yicha bo‘lim komandiri, Chief Supt Emma Croft bu voqealar ta’siri faqat bir necha soatlik bayram bilan cheklanib qolmaganini ta’kidladi. Uning aytishicha, bu tartibsizliklar “mahallalar, biznes egalari, politsiya xodimlari va muxlislarga” zarba bergan.
U e’lon qilingan suratlarda aks etgan shaxslarga, shuningdek ularni taniyman degan har qanday kishiga politsiya bilan bog‘lanish chaqirig‘ini yo‘lladi.
Ogohlantirishlar e’tiborsiz qoldi
Qiziq jihati shundaki, bu ogohlantirishlar bir kun oldin berilgan edi. Celtic klubi o‘yin arafasida muxlislarga “rasmiy bo‘lmagan chempionlik bayrami”da qatnashmaslikni ochiqcha so‘ragan. Bunga sabab bor edi: o‘tgan yilgi shunga o‘xshash yig‘ilish 19 nafar shaxsning qo‘lga olinishi, to‘rt politsiyachining jarohatlanishi va ertasi kuni shahar markazida ulkan tozalash ishlariga sabab bo‘lgan.
Shunday bo‘lsa-da, bu yil ham tarix takrorlangandek bo‘ldi. Faqat bu safar jarohatlar og‘irroq, bosim esa kuchliroq.
Tergovchilar uchun yangi qurol – MIPP
Tartibsizliklar bo‘yicha keng ko‘lamli surishtiruv olib borilmoqda. Ma’lumotlar endi faqat qo‘ng‘iroqlar bilan cheklanmaydi. Politsiya jamoatchilikni Major Incident Public Portal (MIPP) orqali ham yordam berishga undamoqda.
Bu maxsus onlayn portal orqali odamlar tergov guruhiga bevosita ma’lumot, surat va video lavhalarni yuborishi mumkin. Maqsad – o‘sha kechada nimalar sodir bo‘lganini iloji boricha aniq tiklash, tartibni buzganlarni aniqlash va yangi mavsum oldidan shahar markazida xavfsizlikni qayta tiklash.
Celtic yana chempion. Ammo Glasgow ko‘chalaridagi bu kecha klubning beshinchi oltin medalidan ko‘ra ko‘proq savollar qoldirdi: yangi mavsum boshlangunga qadar bu shahar futbol shodiyonasini tartib bilan uyg‘unlashtira oladimi?
