Aleksandar Stankovic: Interda qolish uchun kurash
Aleksandar Stankovic yozgi bozor shovqinlariga quloq tıkamayapti. U aniq qarorga kelgan: “Inter”da qoladi va Cristian Chivu qo‘l ostida o‘z o‘rnini tortib oladi. Sotish, ijaraga berish, foyda, balans – bu gaplar klub rahbariyati uchun. Uning uchun esa bitta narsa bor: “San Siro”dagi maydon va undagi daqiqalar.
Trebl merosxori qaytib keldi
Dejan Stankovic ismi “Inter” tarixida oltin harflar bilan yozilgan. O‘g‘li Aleksandar esa o‘sha familiyani yangi avlodga ko‘rsatish uchun qaytdi. U “Nerazzurri” akademiyasida ulg‘aygan, keyin esa o‘tgan yozda Club Brugge safiga sotilgan edi. Belgiyada bir mavsum yetarli bo‘ldi: u yerda ko‘rsatgan o‘yini bilan “Inter”ni qayta o‘ylashga majbur qildi.
Natija aniq: milanliklar qaytarib sotib olish bandini ishga tushirdi. Taxminan 23 million yevro – bu raqam klubning Aleksandarga bo‘lgan ishonchi va bozor bahosining aniq ifodasi. Yevropaning eng istiqbolli markaziy yarim himoyachilaridan biri sifatida ko‘rilayotgan 21 yoshli futbolchi endi o‘sha bosimni “San Siro” gazonida oqlashi kerak.
To‘la zal, to‘la raqobat
Muammo bitta: “Inter”ning markaziy chizig‘i allaqachon gavjum. Bu shunchaki raqobat emas, bu elita darajadagi tirbandlik.
Italiya terma jamoasi tayanchi Nicolo Barella – o‘yin ritmini belgilovchi motor. Turkiya sardori Hakan Calhanoglu – orqa chiziqdan o‘yinni boshqaruvchi miya. Yaqinda “Liverpool”dan 35 million yevroga kelayotgan Curtis Jones – pressing, intensivlik va texnika uyg‘unligi bilan chiziqqa yangi nafas olib kirishi kutilayotgan futbolchi.
Ularning ortida ham bo‘shliq yo‘q. Petar Sucic, Piotr Zielinski – ishonchli, yuqori saviyadagi variantlar. Tajribali Henrikh Mkhitaryan yoz boshida shartnomasini uzaytirdi, hali ham o‘yин ritmini o‘zgartirib yuboradigan darajada foydali. Andy Diouf esa Chivu qo‘lida ko‘p vazifali futbolchiga aylanmoqda, hatto tayyorgarlik davrida o‘ng qanot himoyachisi sifatida sinovdan o‘tdi.
Shunday tarkib fonida 21 yoshli yigit uchun joy topish – oson masala emas. Aynan shu nuqtada ko‘pchilik uchun ijaraga ketish tabiiy yo‘l bo‘lib ko‘rinadi.
Sotish, ijaraga berish? Stankovicning javobi aniq
Yoz davomida bir nechta stsenariy muhokama qilindi. Klub Aleksandarni darhol foyda bilan sotishi mumkinligi haqida gap-so‘zlar bo‘ldi. Yoki kamida bir mavsumga ijaraga berib, 2026-27 yil davomida doimiy o‘yin amaliyotini kafolatlash varianti ko‘tarildi.
Ammo Gianluca Di Marzio xabariga ko‘ra, Stankovic bu rejalarni qabul qilmayapti. U “Inter”dagi kelajagini hozir, aynan shu mavsumda hal qilmoqchi. Curtis Jones kelishi ham uning fikrini o‘zgartirmadi. Aksincha, bu unga qo‘shimcha chaqiriq bo‘lib tushdi.
U ijaraga borishni istamayapti. U klubni qayta ishontirishni, o‘zini Chivu tizimida zarur bo‘g‘in sifatida ko‘rsatishni xohlaydi. Bu pozitsiya riskli, lekin yirik klubda haqiqiy o‘yinchi bo‘lishni istaganlar uchun tabiiy yo‘l aynan shunday bo‘ladi.
Chivu uchun yoqimli bosh og‘rig‘i
Endi so‘z Chivu qo‘lida. Uning markaziy yarim himoyasi sifat va xarakterga to‘la. Barella – lider. Calhanoglu – reja muallifi. Jones – yangi energiya. Mkhitaryan – tajriba. Zielinski va Sucic – chuqurlik va variantlar. Diouf – moslashuvchanlik.
Shu fon ortida Stankovic o‘zini qaysi rolga da’vogarlik qilayotganini isbotlashi kerak bo‘ladi: rotatsiyadagi asosiy variantmi, muhim zaxirami yoki taktika o‘zgarganda o‘yin ritmini keskin almashtirib yuboradigan futbolchimi. Uning Belgiyadagi o‘yinlari, “Club Brugge”dagi yorqin lahzalari, yosh bo‘lishiga qaramay ko‘rsatgan sovuqqonligi – bularning barchasi “Inter”ni uni qaytarishga undadi. Endi esa bu ishonchni Italiyada amalda ko‘rsatish vaqti keldi.
Yozgi mashg‘ulotlar, o‘rtoqlik uchrashuvlari, ichki sparringlar – Stankovic uchun bu faqat tayyorgarlik emas, bu har kuni davom etadigan saralash jarayoni. U o‘z tanlovini qildi: qochmaslik, qolish va kurashish. Endi savol bitta – Chivu unga bu jangda yetarli maydon va daqiqalar bera oladimi?
