Zolani Tete: Sobiq Jahon Chempioni Bokschi O‘ldirildi

Janubiy Afrika boksiga og‘ir xabar tushdi. Sobiq jahon chempioni, 38 yoshli Zolani Tete o‘z uyining oldida otib o‘ldirildi.

Mamlakat sport, san’at va madaniyat vaziri Gayton McKenzie tasdiqlashicha, Tete mashinasi ichida nishonga olingan. Uning yonida bo‘lgan, 27 yoshli ayol bir necha bor o‘q yeb, hozir shifoxonada yotibdi.

Politsiya ma’lumotiga ko‘ra, hujum Mdantsane, Eastern Cape hududida sodir bo‘lgan. Tete uyiga yetib kelgan, darvozaning ochilishini kutayotgan paytda, balaklava kiygan ikki qurolli shaxs tomonidan pistirma uyushtirilgan. Ular mashinaga yaqinlashib, o‘q uzishgan va voqea joyidan qochib ketishgan.

Zolani Tete ringda o‘z nomini allaqachon tarixga yozdirgan edi. U 2007–2008-yillarda WBF flyweight toifasida jahon chempionlik kamarini, 2017 va 2019-yillarda esa WBO bantamweight chempionlik kamarini qo‘lga kiritgan. Uning texnik mahorati, uzoq masofadan ishlashi va sovuqqonligi uni o‘z vazn toifasida eng xavfli raqiblardan biriga aylantirgan edi.

Endi esa bu ism yana sarlavhalarga qaytdi, lekin ringdagi g‘alabalar bilan emas, ko‘chadagi otishma bilan. Mdantsane, ko‘plab chempionlarni yetishtirgan bokschilar o‘chog‘i, yana bir iste’dodini zo‘ravonlikka boy berdi.

Politsiya gumondorlarni qidiryapti. Savol esa ochiq qolmoqda: boks bo‘yicha jahon chempionligiga chiqqan bu hayot nega shunday yakun topdi?