Yozgi turnelar: yangi avlod futbolchilar kimlar?
Yevropa gigantlari yozgi safarlarga hozirlanar ekan, diqqat markazida nafaqat yulduzlar, balki ularning ortidan kelayotgan navqiron to‘lqin ham bor. Bu safar gap shunchaki “iste’dodli bolalar” haqida emas. Bu – bir necha yil ichida Premyer-ligani larzaga keltirishi mumkin bo‘lgan futbolchilar ro‘yxati.
Liverpool: Salahdan keyin qanot kimga qoladi?
Liverpool uchun bu yoz bir davr tugab, yangisi boshlanadigan pallaga o‘xshaydi. Mohamed Salah ketdi, hujum chizig‘ining o‘ng tomoni bo‘shab qoldi. Ana shu bo‘shliq fonida Josh Abe nomi tobora balandroq eshitilyapti.
U atigi 16 yoshda. O‘tgan mavsumda 18 yoshgacha bo‘lganlar jamoasida 10 ta liga uchrashuvida 8 ta gol va 3 ta golli uzatma – bu raqamlar tasodif emas. Arne Slot uni o‘tgan mavsumdayoq, hali 15 yoshida bir nechta mashg‘ulotlarga qo‘shib ko‘rgan. Endi esa Abe AQShdagi turne davomida birinchi marta to‘liq tarzda katta jamoa bilan ishlaydi.
Uning mavsumi jarohat tufayli erta yakunlangani, shunga qaramay, Liverpool uni saqlab qolish uchun Chelsea, Manchester United va Manchester City bosimiga qarshi kurashgani – klubning o‘zi ham bu yigit qanchalik muhim ekanini ko‘rsatib turibdi.
O‘ng qanotdan ichkariga kesib kirishni yoqtiradigan chap oyoqli vinger. Salah ketgan, yangi transfer Victor Munoz esa Ispaniyaning Jahon chempionatidagi uzoq yurishi sabab kechroq qo‘shiladi. Demak, Abe uchun sahna ochiq. Savol faqat bitta: u bundan foydalanadimi?
Chelsea: Alonso qo‘lida yangi Emenalo
Stamford Bridge’da ham yangi sahifa ochilmoqda. Marc Cucurella Real Madrid safida, chap qanot bo‘shab qolgan. Xabi Alonso uch yoki to‘rt himoyachi bilan o‘ynashidan qat’i nazar, bu tomonda yangi yechim kerak bo‘ladi.
Jorrel Hato va Levi Colwill – tayyor variantlar. Yangi kelgan Valentin Barco ham bu zonada o‘ynay oladi. Geovany Quenda qanot himoyachisi sifatida sinab ko‘rilishi mumkin, ammo u o‘ng tomonda o‘zini erkinroq his qiladi.
Shu fon’da Landon Emenalo nomi ajralib turibdi. Klub sobiq sport direktori Michael Emenalo o‘g‘li bo‘lishi alohida detal, lekin maydonda unga yordam bermaydi. Uni yuqoriga olib chiqayotgan narsa – to‘p bilan xotirjamligi, o‘yinni o‘qish qobiliyati.
U asosan markaziy yarim himoyachi, lekin chap qanot himoyasida ham o‘ynay oladi. Avstraliya va Osiyodagi turne Alonso uchun yoshlarni yaqindan ko‘rish maydoni bo‘ladi. Reggie Walsh, Shim Mheuka va Ryan Kavuma-McQueen bilan birga Emenalo ham safarga borishi kutilmoqda. Bu uchrashuvlar kimning haqiqiy darajasini ochib beradi?
Manchester United: “Little Messi” nihoyat sahnada
Manchester United akademiyasida bir necha yildan beri bitta laqab aylanib yuradi: “Little Messi”. Bu laqab JJ Gabrielga tegishli. Endi esa u yozgi turne orqali yakuniy qadamni tashlash arafasida.
15 yoshga endigina kirganiga qaramay, u o‘tgan mavsum U18 jamoasining bosh yulduziga aylandi: 23 liga o‘yinida 23 gol. U18 Premyer-liga “Mavsum o‘yinchisi” unvoni, FA Youth Cup finaliga yetakchilik – bu raqamlar atrofidagi shov-shuvni tushuntirib turibdi.
Gabriel hujumchi sifatida ham, qanotda ham o‘ynay oladi. U allaqachon Angliya U17 terma jamoasida to‘p surmoqda. Klub ichida esa so‘nggi o‘n yillikdagi eng yuqori salohiyatga ega bitiruvchilardan biri sifatida ko‘riladi.
United yozda Dublin, Gothenburg va Wroclaw bo‘ylab qisqa, ammo zich turnega chiqadi. Gabriel Wrexhamga qarshi ilk o‘rtoqlik o‘yinida maydonga tushmadi, lekin Michael Carrick unga imkon berish niyatida. U sahnaga chiqqan zahoti ta’sir o‘tkaza oladimi? Oldindan aytish qiyin, ammo kutish darajasi allaqachon juda baland.
Everton: Yevropaga qaytish yo‘lida Grahamga ishonch
Everton uchun maqsad aniq: 2017–18 yildan beri ilk bor Yevropa maydoniga qaytish. Beto va Thierno Barry mavsum oxiriga borib jonlanish ko‘rsatishdi, lekin hujumda raqobat yetarli emas. Shunda sahnaga Braiden Graham chiqadi.
18 yoshli hujumchi o‘tgan mavsumda klub akademiyasi safida 34 uchrashuvda 25 gol urdi. Bu natijalar unga Shimoliy Irlandiya terma jamoasiga ilk chaqiruvni olib keldi. Endi esa u David Moyes boshqaruvidagi katta jamoa bilan birinchi to‘liq tayyorgarlikni o‘taydi.
Graham bolaligida markaziy hujumchi sifatida ulg‘aygan. Biroq so‘nggi 12 oyda jismoniy parametrlari uni ko‘proq chap qanotga surib qo‘ydi. Hozir u aynan shu pozitsiyada o‘z uyini topayotgandek. Agar u pre-sezon davomida Moyesni ishontira olsa, Goodison Park tribunalarida yangi sevimli paydo bo‘lishi hech gap emas.
Aston Villa: FIFA bilan tortishayotgan Madjo
Fransiyada o‘tgan mavsum boshida g‘alati manzara yuz berdi: Ligue 1da 16 yoshli ingliz hujumchi asosiy tarkibda o‘yin boshlayapti. Bu – Metz safidagi Brian Madjo edi. U besh marta maydonga tushishga ulgurgan paytda Aston Villa uni qishki oynada 10 million funt evaziga olib ketdi.
Ammo transferning ikkinchi qismi kutilmagan burilish oldi. Madjo Angliyada tug‘ilgan bo‘lsa-da, Villa Parkka ko‘chib o‘tishidan oldin Lyuksemburg terma jamoasi safida uchta o‘yin o‘tkazishga ulgurdi. Keyin esa futbol fuqaroligini yana Angliyaga almashtirdi. FIFA esa bu uchta o‘yinni asos qilib, uni xorijlik futbolchi sifatida ko‘rmoqda va 18 yoshga to‘lmaguncha “uy mamlakati”dan tashqariga ro‘yxatdan o‘tkazishga ruxsat bermayapti.
Villa bu qarorga nisbatan Sport arbitraj sudiga (CAS) murojaat qildi. Hozircha esa Madjo faqat o‘rtoqlik uchrashuvlarida o‘ynashi mumkin. Shunga qaramay, u birinchi imkoniyatdanoq o‘zini ko‘rsatdi: Walsallga qarshi ilk o‘rtoqlikda dub’l qayd etdi.
Bo‘yi 1,93 metr atrofida, jismonan kuchli, uslubida Romelu Lukaku bilan qiyoslanadigan bu hujumchi Angliya futboli uchun eng istiqbolli nomzodlardan biri sifatida ko‘rilmoqda. Unai Emery uni mavsum birinchi yarmida rasmiy o‘yinlarda ishlata oladimi-yo‘qmi, hali noma’lum. Lekin yozgi uchrashuvlar murabbiyga hamma narsani yaqqol ko‘rsatib beradi.
Manchester City: Monga shov-shuv qiladi, Mfuni esa mudofaani boshqarishi mumkin
Man City safida ko‘plab yulduzlar Jahon chempionatida uzoq yurib, kech qaytadi. Enzo Maresca esa Osiyodagi turneni yoshlar uchun imkoniyatga aylantiradi. E’tibor markazida ko‘proq Jeremy Monga bo‘lishi tabiiy – City uni Leicester Citydan Arsenalni ortda qoldirib olib kelgan.
Ammo ichkarida bitta ism bor, murabbiy shtabi aynan uni sinab ko‘rishni intiqlik bilan kutmoqda: Stephen Mfuni. 18 yoshli markaziy himoyachi yanvarda City safida debyut qilganidan so‘ng, Watfordga ijaraga yo‘l oldi va Chempionship darajasida o‘zini ko‘rsatib ulgurdi. Jarohat uning Vicarage Roaddagi vaqtini erta tugatdi, lekin u endi to‘liq sog‘lom.
Chap oyoqli, o‘yinni a’lo darajada o‘qiydigan, to‘p bilan o‘zini bemalol his qiladigan markaziy himoyachi – bu kombinatsiya hozirgi zamon futbolida oltin bilan teng. Premyer-liga klublari allaqachon uni ijaraga olish uchun navbatga turibdi. City muxlislari esa yaqin haftalarda nega bunday qiziqish paydo bo‘lganini o‘z ko‘zi bilan ko‘rishi kerak bo‘ladi.
Arsenal: Dowman soyasidan chiqayotgan Salmon
Arsenal akademiyasi so‘nggi yillarda bir necha bor o‘zini ko‘rsatdi. Hozir ham ko‘pchilikning og‘zida bitta ism – Dowman. Lekin Hale Enddan chiqqan yana bir 16 yoshli bor, klub ichida undan ham kam kutishmayapti: Marli Salmon.
O‘tgan mavsumda u allaqachon to‘rt marta asosiy jamoa safida maydonga tushishga ulgurgan. Endi esa sharoit yanada qulay: William Saliba yo‘q, Ben White va Jurrien Timber hali to‘liq tiklanish jarayonida. Demak, pre-sezonning ilk uchrashuvlarida himoya chizig‘ida bo‘sh joy yetarli.
Salmon o‘ng qanot himoyachisi sifatida ham, o‘zining sevimli pozitsiyasi – markazda ham o‘ynay oladi. Yoshiga nisbatan juda pishiq, to‘p bilan xotirjam, qaror qabul qilish tezligi yuqori. Mikel Arteta uchun bu yoz uni yanada dadilroq sinash uchun ideal davr bo‘lishi mumkin.
Newcastle: Tyneside uchun yangi boshqaruvchi – Steur
Newcastle uchun transfer oynasi yana notinch o‘tyapti. Muhim futbolchilar ketmoqda, lekin ularning o‘rnini bosishi mumkin bo‘lgan bir qator yoshlar ham kelmoqda. Shulardan eng qiziqarli nomlardan biri – Sean Steur.
U Ajaxdan 23 million funt evaziga kelgan. Eredivisie’da o‘tgan mavsumda ilk bor asosiy jamoa safida ko‘rinish bergan, ayniqsa, uzatmalari va o‘yinni boshqarish qobiliyati bilan ajralib turgan. Atigi 18 yosh, lekin u allaqachon ko‘plab Premyer-liga klublarining radarida bo‘lgan. Oxir-oqibat Tyneside’ni tanladi.
Sandro Tonali va ehtimol Bruno Guimaraes ketishi ortidan yarim himoya markazida bo‘shliq seziladi. Jahon chempionatidan keyin qaytayotgan boshqa yarim himoyachilar hali dam olayotgan paytda, Steur uchun maydonda daqiqalar ko‘p bo‘ladi. Savol shuki, u bu imkoniyatni yangi jamoaning yuragi bo‘lish sari birinchi qadamga aylantira oladimi?
Tottenham: De Zerbi tizimidagi mahalliy yulduz – Williams-Barnett
Tottenham so‘nggi ikki mavsumda ko‘p narsani boshdan kechirdi, lekin klub kelajagi yomon ko‘rinmayapti. Roberto De Zerbi hozirning o‘zidayoq jozibali jamoa qurmoqda, akademiyadan chiqqanlar esa bu rasmga yanada rang qo‘shmoqda. Ulardan eng yorqinlaridan biri – Luca Williams-Barnett.
18 yoshli yarim himoyachi o‘tgan yil sentyabrda birinchi marta asosiy jamoada o‘ynadi. Shundan beri sabr bilan navbat kutdi. Endi esa vaziyat o‘zgaryapti. U yaqinda MK Dons ustidan qozonilgan g‘alabada ko‘zga tashlandi va endi Avstraliya hamda Yangi Zelandiyadagi safar tarkibidan joy oldi.
U hujumkor yarim himoyachi sifatida ham, qanotda ham o‘ynay oladi. Bu moslashuvchanlik De Zerbi uchun juda qadrli. Agar yana bir akademiya durdonasi Mikey Moore tajriba orttirish uchun ijaraga jo‘natilsa, Williams-Barnett uchun ichki raqobat yanada kamayadi. U bu bo‘shliqni egallashga tayyormi?
Brighton: katta pul, katta umid – Yohanna sahnaga chiqadi
Brighton uzoq vaqtdan beri yosh iste’dodlarni arzon narxda topib, keyin ulardan katta foyda ko‘rish bo‘yicha namunaga aylangan. Bu yoz esa ular boshqa yo‘lni tanlashdi: yoshlar uchun ham katta pul to‘lashyapti.
Tottenham markaziy himoyachisi Luka Vuskovic 46 million funt evaziga kelgan bo‘lsa, shved klubi AIKdan Zadok Yohanna uchun 21,5 million funt sarflandi. 19 yoshli vinger yil boshidan buyon klub safida 11 uchrashuvda 5 gol va 4 golli uzatma qayd etdi. Chelsea ham uni kuzatib yurgan, lekin yakunda Brighton tezroq harakat qildi.
Yohanna tezlik, fintlar va birga-bir vaziyatlarda raqibni sindirish qobiliyatiga ega. Bu xususiyatlar Premyer-ligada himoyachilar uchun haqiqiy bosh og‘rig‘i bo‘lishi mumkin. Klubning yozgi dasturining ilk qismi Fransiyada o‘tadi va u yerda murabbiylar shtabi ham, muxlislar ham yangi yulduz nomzodini yaqindan ko‘rish imkoniga ega bo‘ladi.
Yozgi turnelar ko‘pincha faqatgina jismoniy tayyorgarlik va marketing safari sifatida ko‘rinadi. Ammo bu safar ularning tagida boshqa ma’no bor: kelasi o‘n yillikni belgilab beradigan avlod sahnaga chiqishga tayyorlanmoqda. Savol shuki, shu yoz kim birinchi bo‘lib o‘zini haqiqiy elita sifatida e’lon qiladi?
