Yozgi transfer bozoridagi eng muhim voqealar: Julian Alvarez, Bouaddi va boshqa yulduzlar
Yozgi bozorning eng uzun hikoyalari odatda bitta ism atrofida aylanadi. Bu safar u – Julian Alvarez.
Alvarez: Madrid, Barselona va London o‘rtasidagi uchburchak
2025-26 mavsumida sovrinsiz qolganidan so‘ng, Alvarezning Atletico Madridni tark etishi deyarli aniqdek ko‘ringandi. Lekin yoz bozoridagi sahna bundan ancha shov-shuvli bo‘lib chiqdi.
Barcelona Robert Lewandowski o‘rniga yangi markaziy hujumchi izlayotgan bir paytda, Alvarez uchun eng mantiqiy manzil sifatida ko‘rilmoqda. Ammo ikki klub o‘rtasidagi munosabat birdan keskinlashdi: Atletico ijtimoiy tarmoqlarda katalon klubi Lamine Yamal va Pedri uchun “masxaraomuz” takliflar berganini oshkor qilib, javob zarbasini berdi. Shundan so‘ng so‘z urushi avj oldi, Barcelona takliflari esa hanuz Madrid klubining narxidan ancha past.
Shu orada Real Madrid sahnaga chiqdi. Iyun boshida ular Atletico Julian Alvarez uchun 150 million yevrolik taklifni rad etganini e’lon qildi. Ispaniyada ko‘pchilik bu taklifni to‘liq jiddiy qabul qilmadi, uni ko‘proq Kataloniyani asabiylashtirishga qaratilgan siyosiy zarba sifatida ko‘rdi.
Arsenal ham soyada qolmayapti. Premier League chempionligi fonida ham Viktor Gyokeres o‘rniga yuqori darajadagi hujumchi izlayotgan “kanonirlar” Alvarez bilan bog‘lanishda davom etmoqda. Futbolchining o‘zi Metropolitano’dan ketish istagini ochiq aytgan, Diego Simeone esa ichida allaqachon uni hisobga olmagan holda rejalar tuzayotgani xabar qilinmoqda. Atletico esa rasmiy pozitsiyasida qat’iy: Alvarez sotilmaydi. Bu mojaro tez tugaydiganlardan emas.
Bouaddi: Marokash yulduzining narxi 100 millionga tiralgan
Jahon chempionati yirik yulduzlar sahnasi bo‘ldi, ammo unda yangi ismlar ham portlab chiqdi. Shulardan biri – Marokash markaziy yarim himoyachisi Ayyoub Bouaddi. Shimoliy Amerikadagi turnirda ko‘rsatgan o‘yini uni bir zumda yevropalik skautlar radarining markaziga olib chiqdi, garchi yirik klublar uning ortidan allaqachon navbatga turib bo‘lgan bo‘lsa ham.
Paris Saint-Germain Bouaddi uchun poygada oldinda ketayotgandek edi. Arsenal, Chelsea, Real Madrid ham navbatda turardi. Endi esa Manchester City manzara markaziga chiqib oldi. Xabarlar bo‘yicha, 18 yoshli futbolchi shaxsiy shartlar bo‘yicha City bilan kelishib bo‘lgan, biroq Lille 100 million yevrodan kamiga rozi emas. Aynan shu narx Premier League klubining ishini qiyinlashtiryapti.
Diomande: “Bundesliga yilning eng yaxshi yangi futbolchisi” uchun kurash to‘xtab qoldi
Jahon chempionatida yorqin ko‘ringan yana bir yosh yulduz – Yan Diomande. U Germaniyadagi ilk mavsumidayoq RB Leipzig tarkibida “Bundesliga Rookie of the Year” sovrinini qo‘lga kiritdi va qanotdagi portlovchi o‘yini bilan deyarli barcha top-klublar ro‘yxatiga tushdi.
Transfer oynasi ochilishi bilan ayniqsa ikki manzil oldinga chiqdi: Liverpool va PSG. “Qizillar” 19 yoshli futbolchi uchun 80 million yevro taklif qildi, ammo Leipzig rad javobini berdi. Shu bilan Parij klubi uchun yo‘l ochilgandek tuyulgandi.
Ammo Yevropa chempionlari bo‘lgan PSG ham to‘xtab qoldi. Leipzig Diomande uchun kamida 100 million yevro so‘ramoqda, holbuki uni o‘tgan yili Leganesdan besh baravar arzonroq narxda olib kelgandi. Kot-d’Ivuar vakili o‘zi oxir-oqibat sotilishiga ishonch bildirgan, lekin hozir uning kelajagi bir necha hafta avvalgidan ko‘ra ham noaniqroq.
Enzo Fernandez: qizil kartochka, diskvalifikatsiya va yopilmayotgan eshik
Jahon chempionati haqida gap ketganda, Enzo Fernandez doimo bir epizod bilan esga olinadi: finaldagi qizil kartochka. New Jersey’dagi o‘sha o‘yinda uning maydondan chetlatilishi Argentina mag‘lubiyatida hal qiluvchi burilish nuqtasiga aylandi.
Bu holat Chelsea’dagi murakkab mavsumining ramziga aylandi. Ba’zi davrlarda Fernandez London klubining eng yorqin futbolchilaridan biri bo‘ldi, lekin u Real Madrid bilan ochiqcha “ishqiy” munosabatlari tufayli klub tomonidan ikki haftalik ichki diskvalifikatsiyaga ham uchradi. Xabi Alonso kelishi uning fikrini biroz o‘zgartirgandek, ammo so‘nggi 12 oy davomida Enzo Stamford Bridge’dan ketishni xohlashi ancha ravshan edi.
Yozgi transferlar bo‘yicha Chelsea qilayotgan ishlar ham bunga ishora qilmoqda. Morgan Rogers kelishi va boshqa yarim himoyachilarga bo‘lgan qiziqish – klub Fernandezsiz hayotga tayyorgarlik ko‘rayotganini anglatadi. Muammo shundaki, Jose Mourinho qo‘l ostida tarkibini qayta qurayotgan Real Madrid endi avvalgidek qiziqish bildirmayotgandek. Shunday ekan, Enzo kelajagi hamon havoda osilib turibdi – xuddi yakshanba kungi finalda u Pau Cubarsi ustiga uchib tushgan lahzaga o‘xshab.
Newcastle va Bruno Guimaraes: yana bir kapitanning chiqib ketishi arafasida
Newcastle uchun bu transfer oynasi allaqachon og‘ir kechmoqda. Anthony Gordon va Sandro Tonali bilan xayrlashish yetmagandek, Johan Manzambi bo‘yicha Aston Villa, Victor Munoz borasida esa Liverpool ulardan o‘zib ketdi. Endi esa eng og‘ir savol: Bruno Guimaraes ham ketadimi?
Jamoa sardori St James’ Parkni tark etib, Arsenalga o‘tish istagini yashirmayapti. “Kanonirlar” iyun oxirida dastlabki 55 million funtlik taklifni yo‘lladi, ammo u rad etildi. Newcastle braziliyalik yarim himoyachini 100 million funtga yaqin baholayotgani aytilmoqda, yozgi sotuvlar hisobiga moliyaviy bosimdan qutulib olgan klub shoshilmayapti.
Murabbiy Eddie Howe esa Alexander Isak bilan bo‘lgan eski ssenariyni takrorlashni istamaydi. O‘sha paytda futbolchi Liverpool bilan muzokaralar cho‘zilgani sabab mashg‘ulotlarga chiqishdan bosh tortgan, jarayon esa oxirgi kunlarga qadar cho‘zilgandi. Shuning uchun Guimaraes bo‘yicha qaror mavsum boshlanishidan oldin qabul qilinishi kutilmoqda.
Olise: tarixdagi eng qimmat transfer bo‘lishi mumkin bo‘lgan bitim
Bayern Munich safida o‘tgan mavsumni zo‘r darajada o‘tkazgan Michael Olise endi butunlay boshqa darajadagi gap-so‘zlar markazida. Real Madrid prezidenti Florentino Perez va uning klubi 15 karra Yevropa chempioni sifatida yana bir rekordni yangilashga tayyor turibdi: Olise uchun 223 million yevro to‘lashga hozirlik ko‘rayotgani haqida xabarlar tarqaldi.
Bu summa PSG Neymar uchun to‘lagan tarixiy transfer rekordidan ham yuqori bo‘ladi. Endigina ikki yil oldin Crystal Palace tarkibida o‘ynagan 24 yoshli Olise uchun bu mutlaqo yangi orbitaga chiqish demak. Biroq Bayernni ko‘ndirish oson bo‘lmaydi: Myunxenda uni Allianz Arena’dagi yangi davr yetakchisi sifatida ko‘rishyapti.
Jahon chempionati vaqtida Kylian Mbappe ham Olise’ni Madrid sari og‘dirishga urinib ko‘rdi. Fransiya terma jamoasi yig‘inida bo‘lgan suhbatlar fonida futbolchining o‘zi ham Bernabeu sari ochiqroq qarayotgandek taassurot qoldirdi. Transfer bozori tarixida navbatdagi burilish pallasi yaqinlashyaptimi?
Rashford: Barcelona orzusi so‘nib, bo‘shliqda qolgan yulduz
May oyida Marcus Rashford kelajagi deyarli hal bo‘lgandek edi. Barcelona’dagi ijaraviy mavsumida u o‘zining eng yaxshi formasiga yaqinlashdi, katalon klubi esa Manchester United bilan shartnomadagi 30 million yevrolik sotib olish bandini ishga tushiradi, degan qarash ustun edi.
Ammo mavsum tugagach oradan ikki hafta o‘tmasdan Barcelona butun byudjetini Rashfordning Angliya terma jamoadagi jamoadoshi Anthony Gordon uchun sarfladi. Shunda ma’lum bo‘ldiki, 28 yoshli hujumchi Kataloniyada qolmaydi. Rashford Jahon chempionatida band bo‘lib turgan bir paytda, Manchester United esa uning kelajagi bo‘yicha qaror qabul qilish arafasida turibdi.
Moliyaviy tomondan qaraganda, Rashfordni sotish “qizil iblislar” uchun mantiqli ko‘rinadi. Lekin yangi bosh murabbiy Michael Carrick uni qayta tiklashga urinadimi yoki yo‘qmi – hozircha noma’lum. Futbolchining o‘zi ham omma oldida hech narsa demagan.
Agar u ketishga qaror qilsa, hozircha eng faol qiziqish bildirayotgan klub – Tottenham. Biroq Old Trafford’da unga joy qolmagani aniq bo‘lsa, boshqa nomzodlar ham paydo bo‘lishi hech kimni ajablantirmaydi.
Rodri: Ballon d’Or darajasiga qaytgan yulduz atrofidagi bozor
Jahon chempionati “Golden Ball” sohibi Rodri yana eng yuqori darajaga qaytdi. U Ispaniyani global g‘alabaga yetaklab, 2024 yildagi tizza payi jarohatidan so‘ng “u avvalgidek bo‘lolmaydi” degan gaplarga nuqta qo‘ydi. Endi esa uning Manchester City’dagi kelajagi atrofida yana ko‘proq savollar paydo bo‘lmoqda.
Real Madrid so‘nggi 12 oy ichida Rodri bilan muntazam bog‘lab kelinmoqda. Toni Kroos karyerasini yakunlagan, Luka Modric ham ketganidan beri ularning yarim himoyasi izlanishda. Perez Rodri’ni juda yuqori baholashi aytiladi, futbolchining City bilan shartnomasi esa atigi bir yilga mo‘ljallangan.
Madridning so‘nggi yillarda erkin agentlarni qo‘lga kiritish bo‘yicha strategiyasini hisobga olganda, hamma 2027 yilni kutayotgandi. Lekin ketma-ket ikki mavsum sovrinsiz o‘tgani va Mourinho kelganidan so‘ng, Bernabeu bu rejani tezlashtirishi ehtimoli jiddiy ko‘tarildi. Bu safar esa klub kassasi bo‘shashiga to‘g‘ri kelishi mumkin.
Salah: bo‘sh bozorning eng katta ismi
Bozorning bu bosqichida hamon klub topmagan yulduzlar ko‘p: John Stones, Leon Goretzka, Dusan Vlahovic… Lekin ularning hech biri Mohamed Salah kabi ko‘zga tashlanmaydi. Liverpool bilan ko‘z yoshli xayrlashuvdan so‘ng, misrlik hujumchi keyingi qadami haqida o‘ylamoqda.
Salah Jahon chempionatida ham o‘z so‘zini aytdi – Misrni nimchorak finalga olib chiqdi, Argentina qarshisida esa bir qadam yetmay qoldi. Endi esa turnir ortda qoldi va u erkin ravishda yangi klub izlashga haqli. Uzoq vaqtdan beri 34 yoshli futbolchi Saudi Pro League sari yo‘l oladi, degan fikr ustun bo‘lib kelayotgan edi. Ammo u hali ham Yevropaning yuqori darajadagi jamoasiga foyda keltira olishiga ishonsa-chi? Savol ochiq, javob esa bozorning oxirgi haftalarida topilishi mumkin.
Alex Scott: Bournemouth sinovi
Bournemouth o‘z yulduzlarini sotib, yana qayta qurilish qilishga allaqachon o‘rganib bo‘lgan. Lekin ilk bor Yevropa musobaqalariga chiqqan klub bu safar tarkibni saqlab qolishni xohlaydi. Aynan shu nuqtada Alex Scott atrofidagi bosim ortib bormoqda.
Angliya U-21 terma jamoasi a’zosi bo‘lgan Scott o‘tgan mavsumda Premier League’dagi eng yaxshi “tempo-belgilovchi” yarim himoyachilardan biriga aylandi. Bu unga kattalar terma jamoasiga chaqiruv ham olib keldi. Endi esa Chelsea, Manchester United va Arsenal 22 yoshli futbolchi uchun bellashmoqda, har biri o‘z o‘yin markazini yangilash niyatida.
Bournemouth uni yangi shartnoma bilan ushlab qolishga urinmoqda. Ammo bozorni larzaga keltirayotgan ulkan summalar fonida bu juda og‘ir vazifa. Har bir katta transfer boshqa klublarni ham shoshiltiryapti – bunday pallada Alex Scott kabi futbolchilar uchun eshiklar yanada kengroq ochiladi.
Bu yozgi bozor hali tugagani yo‘q. Ammo allaqachon ko‘rinib turibdi: keyingi bir necha haftada qaysi ism qayerga yo‘l olsa, kelasi o‘n yil Yevropa futbolining kuch muvozanatini aynan o‘sha qarorlar belgilab beradi.
