Xususiy sarmoya rejasiga global qarshilik: Infantino chekinishga majbur bo‘ldi
Xususiy sarmoya rejasiga global qarshilik: Infantino chekinishga majbur bo‘ldi
Futbol siyosatidagi so‘nggi mojaro odatdagi maydon chetidagi bahs emasdi. Gap Fifa tuzilmasiga xususiy investorlarni, hatto kichik ulush bilan bo‘lsa ham, kiritish haqidagi g‘oyaga borib taqaldi. Bu fikr paydo bo‘lishi bilan deyarli darhol keskin rad etildi.
Uefa birinchi bo‘lib zarbani berdi. Yevropa futboli hukmron organi keskin bayonot bilan chiqib, o‘z milliy terma jamoalaridan hech biri bu takliflar “tirik” ekan, birorta ham Fifa musobaqasida qatnashmasligini ma’lum qildi. Bu shunchaki ogohlantirish emas, Infantino tashabbusiga ochiqchasiga isyon edi.
Ortidan osiyoliklar va amerikaliklar ham sukut saqlamadi. Asian Football Confederation (AFC) rejani qoraladi, North American and Caribbean federation (Concacaf) ham xuddi shunday pozitsiyani egalladi. Bir paytning o‘zida uch qit’a markaziy futbol tashkilotlari qarshi chiqsa, bu allaqachon oddiy ichki bahs emas, balki global ishonch inqirozi hisoblanadi.
Eng og‘ir zarbalardan biri esa Infantino uchun ichkaridan keldi. Uning yaqin maslahatchilaridan biri, sobiq yuqori lavozimli amaldor Carlos Cordeiro iste’fo berdi. U loyihani “Fifa a’zo assotsiatsiyalari uchun yomon bitim, futbol uchun yomon bitim va o‘yin kelajagi uchun uzoq muddatli yomon bitim” deb atadi. Bunday ibora nafaqat norozi kayfiyatni, balki tamoman ishonchsizlikni ifodalaydi.
Bosim tobora kuchayib borgani sari Fifa rahbariyatidan javob kutish tabiiy edi. Infantino mahalliy vaqt bilan juma oqshomida chiqish qilib, loyiha aslida a’zo assotsiatsiyalarni moliyaviy va tashkiliy jihatdan mustahkamlash maqsadida o‘ylab topilganini ta’kidladi. Uning so‘zlariga ko‘ra, rejani faqat ko‘pchilik qo‘llab-quvvatlagan taqdirda hayotga tatbiq etish rejalashtirilgan.
Ammo qarshilik shu darajada keng va keskin bo‘ldiki, raqamlar ahamiyatini yo‘qotdi. Infantino: “Barcha fikrlarni diqqat bilan tinglagach, loyihaning shunday darajadagi bo‘linishlarni keltirib chiqargani ma’lum bo‘ldiki, qo‘llab-quvvatlash darajasidan qat’i nazar, bu endi dastlab belgilangan maqsad manfaatlariga mos kelmaydi”, deya tan oldi.
Shu tariqa, xususiy sarmoya orqali futbolni qayta formatlashga qaratilgan rejalar hozircha muzlatildi. Ammo bir savol ochiq qolmoqda: global futbol hamjamiyati pul va ta’sir doirasi tobora kengayayotgan davrda, o‘yin ruhini saqlab qolgan holda, qanday yo‘l tanlaydi?
