WNBA yulduzlari va irqchilik: Chelsea Gray va Hilton Grand Vacations
Las Vegas Aces himoyachisi Chelsea Gray maydonni tark etganidan bir necha soat o‘tib, yana bir hujumga uchradi. Bu safar parketda emas, telefon ekranida.
Jamoaning Indiana Feverga qarshi 109:75 hisobidagi mag‘lubiyatidan keyin Gray ijtimoiy tarmoqlarda irqchi haqoratga duch keldi. 33 yoshli basketbolchi dushanba kuni o‘z Instagram hikoyasida unga yuborilgan, irqiy haqorat so‘zi ishlatilgan xabar skrinshotini joylashtirdi. U o‘sha so‘zlarni yashirmadi, yumshatmadi – qanday bo‘lsa, shunday ko‘rsatdi.
Oradan ko‘p o‘tmay, Hilton Grand Vacations harakatga o‘tdi. Kompaniya seshanba kuni Associated Press orqali tasdiqlashicha, Grayga mazkur xabarni yuborgan shaxs endi Hilton Grand Vacations tarkibida ishlamaydi.
“Bu ma’lumotni joylashtirgan shaxs endi kompaniyada faoliyat yuritmaydi. Uning xatti-harakati bir nechta ichki siyosatimizni buzdi va hech qanday tarzda bizning qadriyatlarimizni aks ettirmaydi”, – deyiladi Hilton Grand Vacations bayonotida.
Aces klubi bu boradagi so‘rovga darhol javob bermadi. Ammo vaziyat WNBA uchun yangi emas, og‘riqli tanish manzara.
Yangi KBA, eski muammo
Mart oyida WNBA va liga o‘yinchilar uyushmasi tubdan yangilangan kollektiv bitimga kelishgandi. Maqsad aniq edi: xavfsizlikni kuchaytirish, texnik qo‘llab-quvvatlashni yaxshilash, ruhiy salomatlik bo‘yicha resurslarni mustahkamlash, muxlislar xulq-atvori kodeksini qattiqroq nazorat qilish va o‘yinchilarni nafratga asoslangan hujumlardan himoya qilish.
Qog‘ozda hammasi chiroyli ko‘rinadi. Ammo Gray boshidan kechirgan voqea, bu qoidalar hali ham hayotga to‘liq singib ketmaganini yana bir bor ko‘rsatdi.
Bu yakka holat emas. Yaqinda Phoenix Mercury forvardi Alyssa Thomas ham irqchi haqoratlar olgani, hatto o‘lim bilan tahdid qilinganini aytib chiqdi. Uning so‘zlariga ko‘ra, bu tahdidlar Feverga qarshi 111:109 hisobidagi g‘alabada Caitlin Clarkning bo‘yniga musht bilan tegib ketgani uchun olgan bir o‘yinlik diskvalifikatsiyasidan keyin kuchaygan.
Bitta sport epizodi – o‘yin davomida ko‘pchilik hatto payqamay qolgan holat – ijtimoiy tarmoqlarda nafrat to‘lqiniga aylanib ketdi.
Thomas iyun oyida jamoa mashg‘ulot bazasida jurnalistlar bilan suhbatda WNBA komissari Cathy Engelbertni o‘yinchilarni yetarli darajada himoya qilmayotganlikda tanqid qildi.
“Bu basketbol tufayli shunday darajaga kelgani achinarli, – degandi u. – Ko‘pchiligimiz – o‘zim ham shular qatoridaman – o‘sha epizod o‘yindan keyin videoni ko‘rmaguncha bo‘lganini ham bilmasdik. Endi bizni ‘tug’ sifatida tasvirlashyapti. Bizga qarshi o‘lim tahdidlari bor. Bu mutlaqo qabul qilib bo‘lmaydigan holat. Bu ligada nimadir o‘zgarishi kerak, men bundan charchadim, jonimga tegdi”.
Thomasning so‘zlari o‘sha paytda kuchli aks-sado bergandi. Gray bilan bog‘liq hodisa esa bu ogohlantirishlar havoga sochilgan gap bo‘lmaganini yana bir marta isbotlab qo‘ydi.
Hilton Grand Vacations o‘z xodimiga nisbatan keskin chorani ko‘rdi. Ammo savol ochiq qoladi: WNBA va atrofidagi ekotizim o‘yinchilarni nafaqat maydonda, balki ekran ortidagi nafrat to‘lqinidan ham qachon to‘liq himoya qila oladi?
