WNBA maydonlarida sharmandali hodisa: seks-o‘yinchoqlar yomg‘iri
Ayollar professional basketboli yana bir bor maydon tashqarisidagi mojaro markazida qoldi. Bu safar gap ijtimoiy tarmoqlar yoki hakam qarorlari haqida emas, bevosita maydonga uloqtirilgan seks-o‘yinchoqlar haqida ketmoqda.
Chicago’da uchinchi chorakdagi uzilish
Chicago Sky – Golden State Valkyries uchrashuvi juma kuni uchinchi chorak qiziganda, o‘yinning ritmini butunlay buzgan manzara yuz berdi. Tribunalardan maydonga bir nechta seks-o‘yinchoqlar uloqtirildi. Ulardan biri – yashil rangdagi buyum – to‘g‘ri maydon o‘rtasiga tushdi.
Hakamlar o‘yinni darhol to‘xtatdi. Xavfsizlik xodimlari buyumni yig‘ishtirib olguncha, arenadagi kayfiyat keskin o‘zgardi. Shovqin, hayrat, hafsalasi pir bo‘lgan muxlislar. Shundan keyingina uchrashuv davom ettirildi va Chicago Sky keskin kurashda 73:70 hisobida g‘alaba qozondi. Ammo yakuniy natijadan ko‘ra, tomoshabinlarning xatti-harakati ko‘proq muhokama qilinmoqda.
Los-Anjelesda ham takrorlangan manzara
Bir kun avval, payshanba oqshomi Los-Anjelesda ham xuddi shunga o‘xshash hodisa qayd etildi. Atlanta Dream – Los Angeles Sparks uchrashuvida mehmonlar 124:88 hisobida yirik g‘alabaga yaqinlashayotgan paytda, uchinchi chorak o‘rtasida yana maydonga noma’lum buyum uchib tushdi.
Sparks himoyachisi Park Ji-hyun jarima to‘pini tashlashga hozirlanayotgan edi. Konsentratsiya eng yuqori nuqtaga chiqqan lahza. Shu payt maydon yaqiniga yana seks-o‘yinchoq uloqtirildi va o‘yin yana to‘xtatildi. Basketbolchilar kutishga majbur bo‘ldi, arenadagi xavfsizlik xodimlari esa vaziyatni nazoratga olishga urinib, tribuna tomon shoshdi.
O‘tgan mavsumdagi seriya va yangi to‘lqin
Bu bir martalik holat emas. O‘tgan mavsum yozida, iyul va avgust oylarida Atlanta, New York va Los Angeles shaharlarida o‘tkazilgan olti WNBA uchrashuvi xuddi shunday voqealar sabab to‘xtab qolgan edi. O‘shanda bu g‘alati “aksiyalar” ortida turganini o‘zini “meme-coin” guruhi deb tanishtirgan jamoa bo‘yniga olgandi.
Hozir ham manzara tanish. USA Today xabariga ko‘ra, aynan o‘sha guruh o‘tgan yilgi hodisalarga mas’ul ekanini yana bir bor aytib, WNBA’ning transgender sportchilar bo‘yicha siyosatiga norozilik sifatida o‘yinlarni buzishni davom ettirishini ma’lum qilgan.
Ligada hozircha birorta transgender basketbolchi yo‘q. Biroq Indiana Fever himoyachisi Sophie Cunningham tomonidan amaldagi qoidalar borasida bildirilgan tanqidlardan keyin AQSh sport jamoatchiligida bahslar yana avj oldi.
Natasha Cloudning keskin javobi
Chicago Sky himoyachisi Natasha Cloud bunday xatti-harakatlarga javoban so‘zini ayamasdan chiqdi. Uningcha, maydonga seks-o‘yinchoqlar uloqtirayotgan “erkaklar” – kulgili va g‘alati.
Cloud 34 yoshda, tajribali, ovozi baland sportchi. U bu ishni qilayotganlar haqida keskin fikr bildirdi: bu harakat, avvalo, o‘sha insonning ichki muammolari haqida gapiradi, dedi u. Uning ta’kidlashicha, bunday ishga qo‘l urayotgan erkaklar zaiflikni namoyish qilmoqda, ayollarga bo‘lgan munosabatlari esa aynan shunday sharmandali uslubda ochilib qolmoqda.
Ayollar ligasini mazax qilishga uringan bu xatti-harakatlar fonida Cloudning so‘zlari ko‘plab muxlislar kayfiyatini ifodalab turibdi: maydonda yuqori saviyali basketbol bor, ammo kimdir buni ataylab soyada qoldirishga urinmoqda.
Qat’iy chora va umrbod taqiqlar
New York Times xabariga ko‘ra, Los Angelesdagi Crypto.com Arena’da uchrashuvni buzgan “erkak tomoshabin”ni arenaning xavfsizlik xodimlari ushlagan. Unga WNBA uchrashuvlariga umrbod tashrif buyurish taqiqlanishi rejalashtirilgan.
Chicago’dagi hodisaga mas’ul shaxslar aniqlangani haqida esa hozircha rasmiy ma’lumot yo‘q. Ammo liga pozitsiyasi o‘tgan mavsumdayoq aniq ifoda etilgan edi. O‘shanda WNBA har qanday muxlis maydonga seks-o‘yinchoq uloqtirgan taqdirda ligadan chetlashtirilishi va jinoiy javobgarlikka tortilishi haqida ogohlantirgan.
Bu safargi voqealar fonida bu ogohlantirish qog‘ozda qolib ketmasligi, real jazolarga aylanishi tobora muhimroq ko‘rinmoqda.
Qoidalar, siyosat va maydondagi o‘yin
WNBA va WNBPA o‘rtasidagi collective bargaining agreement – CBA – liganing yurak urish tezligini belgilab beradigan asosiy hujjat. Unda o‘yinchilarning maosh chegaralari, daromad taqsimoti, ijtimoiy paketlar va liganing kundalik ishlash mexanizmlarigacha aniq yozilgan.
Eng ko‘p bahs keltirayotgan bandlardan biri – o‘yinchi maqomiga oid qoidalar. CBA’da bitta jumla ayniqsa e’tiborni tortadi: “Faqat ayol bo‘lgan o‘yinchilar WNBA’da o‘ynash huquqiga ega”. Aynan shu formulirovka bugungi bahslar, aksiyalar va bosimlarning markazida turibdi.
Ammo maydonga seks-o‘yinchoq uloqtirish bu bahsni yangi bosqichga olib chiqmaydi. Aksincha, sportchilar mehnatini, muxlislar hurmatini va ayollar basketbolining o‘sib borayotgan obro‘sini haqorat qiladi.
Savol esa ochiq qolmoqda: WNBA kuchayib borayotgan e’tibor va siyosiy bosimlar orasida maydonni toza saqlab, sportni o‘zi haqida gapirtira oladimi yoki arenalardagi bu kabi spektakllar mavsum ohangini buzib yuboradimi?
