Transfer oynasi: Alex Scott, Johan Manzambi va Trevoh Chalobah
Yozgi transfer oynasi rasman ochildi. Dunyoning ko‘zi Jahon chempionatiga qadalgani bilan, klublar ortda – kabinetlarda, telefon chiziqlarida, yashirin uchrashuvlarda – kelasi mavsumni shakllantirayotgan asosiy bitimlar ustida ishlayapti. Rejalar allaqachon chizilgan, ro‘yxatlar tuzilgan: kim qoladi, kim ketadi, kim uchun hamyon ochiladi.
Alex Scott atrofidagi bosim
Angliya futbolidagi eng qiziqarli yosh yarim himoyachilardan biri bo‘lgan Alex Scott endi shunchaki istiqbolli talant emas, balki katta sahnaga tayyor bo‘lgan o‘yinchi sifatida ko‘rilmoqda. Uning atrofidagi shovqin bejiz emas.
Bournemouth 22 yoshli futbolchini ushlab qolish uchun jiddiy kurashga kirib bormoqda. Sababi oddiy: unga qiziqayotganlar ro‘yxati deyarli Angliya grandlari sarasidan. Arsenal, Chelsea, Manchester City va Manchester United – to‘rtta gigant bir paytning o‘zida bitta o‘yinchi atrofida aylanyapti. Bunday paytda o‘rtamiyona klub uchun eng katta sinov boshlanadi.
Vitality Stadium rahbariyati Scottni qo‘yib yuborishni istamayapti. U klub loyihasining markazida turibdi, shuning uchun muzokaralar allaqachon boshlanib bo‘lgan: yangi shartnoma, yaxshilangan maosh, asosiy rol kafolati. Savol esa ochiq qolmoqda – Bournemouthning bu takliflari moliyaviy va sport nuqtayi nazaridan yirik klublarning chaqirig‘iga qarshi tura oladimi?
Newcastle va Johan Manzambi: Jahon chempionatidan to‘g‘ri Premer-ligaga?
Newcastle esa bozorni tomosha qilib o‘tirgani yo‘q. Ular aniq nishonga o‘q uzishga tayyorlanmoqda. Maqsad – Freiburgning yorqin iqtidor egasi Johan Manzambi.
20 yoshli futbolchi bu Jahon chempionatida Shveytsariya terma jamoasi safida o‘zini butun dunyoga tanitdi: uchta gol, ikkita golli uzatma – bunday statistika yosh hujumkor o‘yinchi uchun juda kuchli vizit karta. Endi uning nomi transfer bozoridagi eng issiq familiyalar qatorida.
Newcastle rasmiy taklif tayyorlayotgani haqida xabarlar tarqaldi. Taklif miqdori – 50 million yevro. Bu raqam Shveytsariya talanti uchun jiddiy baho, lekin Freiburgning pozitsiyasi qat’iy bo‘lishi mumkin: klub bunday portlash qilgan futbolchini arzoniga qo‘yib yuborishni istamaydi va yuqoriroq summa kutyapti.
Bosim oshib bormoqda. Agar Jahon chempionatidagi o‘yinlar davomida Manzambi yana porlasa, uning narxi yanada ko‘tarilishi aniq. Newcastle bu poygada tezroq harakat qilmasa, raqiblar soni ko‘payishi hech gap emas.
Trevoh Chalobah uchun Italiya eshiklari ochilmoqda
Londonning boshqa tomonida esa yana bir qiziq voqea pishib yetilmoqda. Chelsea himoyachisi Trevoh Chalobah uchun yoz yangi sahifa bo‘lishi mumkin. 26 yoshli ingliz futbolchisi bu yoz Stamford Bridge bilan xayrlashishi ehtimoli yuqori bo‘lgan o‘yinchilardan biri sifatida ko‘rilmoqda.
Unga qiziqayotgan klublar ham oddiy emas. Como va Inter Milan birdaniga harakatni kuchaytirdi. Ayniqsa, Como tashabbuskor ko‘rinmoqda: ular taklifni yaxshilashga hozirlanmoqda va 35 million yevrolik yangi bid ustida ishlayotgani aytilmoqda. Bu kichikroq klub uchun katta xavf, lekin bir vaqtning o‘zida ulkan imkoniyat – Premyer-liga tajribasiga ega himoyachi bilan loyihani keyingi bosqichga olib chiqish shansi.
Inter ham tomoshabin bo‘lib qolmaydi. Nerazzurri Chalobah uchun kurashda raqobat qilishi kutilmoqda. Italiyaning ikki turlicha ambitsiyaga ega klubi, bitta o‘yinchi va Londonni tark etishga tayyor futbolchi – bu uchburchak yozgi oynaning eng qiziqarli intrigalardan biriga aylanishi mumkin.
Jahon chempionati chiroqlari ostida o‘ynalayotgan o‘yinlar futbolchilar qiymatini har kuni o‘zgartirib yuborayotgan bir paytda, klublar vaqtni boy berishni o‘ylamayapti. Savol bitta: yoz tugaguncha kim o‘z rejasini mukammal bajaradi, kim esa bozor ritmini kech anglaganini kelasi mavsumda qimmatga to‘laydi?
