Tottenhamning yozgi rejasida Tonali, Fernandes va Alex Scott
“Tottenham” yozgi bozorni shovqin bilan ochdi. Markaziy chiziq tubdan yangilanmoqda, raqiblar esa allaqachon rad javobini olib bo‘ldi. “Arsenal” ham, “Man United” ham. Endi navbat – “Spurs”da.
Tonali – 100 millionlik maqsad
So‘nggi haftalarda klub atrofidagi eng katta mavzulardan biri – Sandro Tonali. “Newcastle”ning markaziy yarim himoyachisi Roberto De Zerbi qo‘l ostidagi yangi loyihaning bosh ramzlaridan biriga aylanib ulgurgan.
Yoz boshidan beri London klubi uning atrofida faol ishlamoqda. Tonali vakillari bilan uchrashuvlar o‘tkazilgani haqida xabarlar chiqqan, Italiya terma jamoasi a’zosi ham agar klublar kelisha olsa, shimoliy Londonga ko‘chib o‘tishga tayyor ekani aytilmoqda.
Muammo bitta – narx. “Newcastle” uni qariyb 100 million funtga baholayapti. Shuning uchun “Tottenham”ning taxminan 80 million funtlik ilk taklifi “Magpies” tomonidan darhol rad etildi. Shunga qaramay, Tonali klubning yozgi strategiyasida bosh nomlardan biri bo‘lib qolmoqda.
Mateus Fernandes – London ichidagi katta bitim
De Zerbi faqat bitta nomga yopishib olgani yo‘q. “West Ham”ning portugaliyalik yarim himoyachisi Mateus Fernandes ham asosiy nishonlardan.
Sharqiy Londonda o‘tgan so‘nggi mavsumdan so‘ng uning atrofida qiziqish keskin oshdi. Bir nechta manbalar xabariga ko‘ra, “Tottenham” futbolchining shaxsiy shartlari bo‘yicha allaqachon sezilarli siljishga erishgan, ayrim xabarlarda u bilan shaxsiy kelishuvga yaqin turibdi, deyiladi.
Bu orada “The Independent” haftaning o‘zida “Tottenham” va “West Ham” o‘rtasida bo‘lib o‘tgan muzokaralar ijobiy ruhda kechgani, bitim umumiy qiymati 85 million funt atrofida bo‘lishi mumkinligini yozdi. Bunday raqamlar “Spurs”ning markazni kuchaytirish borasidagi qat’iyatini yanada yaqqol ko‘rsatib qo‘ydi.
Dubravka – tekinga, lekin reja ichidagi bo‘lak
Markazdagi katta rejalar fonida klub boshqa chiziqlarda ham jim turgani yo‘q. Yaqinda “Burnley”ni erkin agent sifatida tark etgan Martin Dubravka bilan shartnoma imzolandi.
Tajribali darvozabon tarkibga chuqurlik va raqobat olib kelish uchun jalb etildi. U o‘tgan mavsumni “Turf Moor”da o‘tkazdi, undan oldin esa uzoq yillar “Newcastle” darvozasini qo‘riqlagan. Endi esa De Zerbi qo‘l ostidagi qayta qurilishning navbatdagi bo‘ligi sifatida “Tottenham Hotspur Stadium”ga yo‘l oldi.
Alex Scott – “Arsenal” va “United” rad etilgan, “Spurs” navbatda
Yirik nishonlar ro‘yxati shu bilan tugamaydi. “Sky Sports” ma’lumotiga ko‘ra, “Tottenham” hozir “Bournemouth” yarim himoyachisi Alex Scott bilan ham jiddiy qiziqib turibdi.
22 yoshli futbolchi “Bristol City”dan kelganidan beri “Bournemouth” uchun markaziy figura bo‘lib ulgurgan. Oxirgi ikki mavsumdagi o‘yinlari uni Angliyaning bir qator top-klublari radariga olib kirdi. “Sky”ning jonli blogida yozilishicha, “Tottenham” – unga ko‘z tikkan uchta Premyer-liga klubidan biri.
“Man United” va “Arsenal” allaqachon dastlabki so‘rovlarini yuborgan. 60 million funtga baholanayotgan yarim himoyachi bo‘yicha ilk aloqalar o‘rnatilgan, ammo “Bournemouth” bu urinishlarni darhol qaytarib yubordi.
Klubning pozitsiyasi keskin va aniq: bu transfer oynasida Scottni qo‘yib yuborish rejada yo‘q. Rahbariyat bu qarashni barcha qiziqayotgan tomonga yetkazgan. Sotuvga tayyorgarlik o‘rniga ular boshqa yo‘lni tanlagan – Scottning kelajagini “Vitality Stadium”da mustahkamlash.
Yangi shartnoma bo‘yicha muzokaralar boshlangan, janubiy sohil klubi esa yaqinda tayinlangan bosh murabbiy Marco Rose qo‘l ostida Scott yanada o‘sishiga umid bog‘lagan. Ular uchun eng maqbul ssenariy – aynan shu.
Angliya tarkibiga kirmadi, lekin radar markazida
Qiziq jihati shundaki, Scott yozgi Jahon chempionati uchun Angliya yakuniy tarkibiga kirmadi. Shunga qaramay, uni terma jamoaga chaqirish varianti jiddiy ko‘rib chiqilgani aytiladi. Oxir-oqibat ro‘yxatga kirmadi, lekin klub darajasidagi o‘yinlari baribir uni elit jamoalar e’tibor markazida ushlab turibdi.
Endi savol bitta: “Bournemouth”ning qat’iy “yo‘q”i qancha vaqtga yetadi? “Tottenham” Tonali va Fernandes bo‘yicha kurashni davom ettirar ekan, Scott atrofidagi bosim ham ortib boradi. De Zerbi markazni qay tarzda qayta chizadi – bitta yulduz bilanmi, ikkita bilanmi yoki uchalasini bir vaqtning o‘zida olib kelishga jur’at etadimi?
