Tielemans uchun Carrickning futbol falsafasi: futbolni hidlash
Youri Tielemans uchun yangi bosqich qo‘rqinchli emas, qiziqarli. 29 yoshli markaziy yarim himoyachi “Manchester United”dagi ilk haftalarini shunchalik tabiiy qabul qilyaptiki, u Michael Carrick futbol falsafasiga moslashishni “futbolni hidlash” bilan tenglashtirdi.
£35 million evaziga “Aston Villa”dan kelgan, 579 ta o‘yin ortida qolgan futbolchi uchun murabbiyning talablarini tushunish – kundalik ish. U 16 yoshida “Anderlecht” safida debyut qilgan, Belgiya, Fransiya va Angliyada o‘ynagan, bosimni ham, yuqori darajadagi raqobatni ham ko‘rgan.
Shu bois Skandinaviya bo‘ylab o‘tayotgan yozgi tayyorgarlik safarida yangi jamoadoshlari bilan tanishish ham og‘ir kechmayapti. U o‘zining ilk daqiqalarini shanba kuni Gothenburgda “Paris Saint-Germain”ga qarshi 1:1 hisobida yakunlangan o‘rtoqlik uchrashuvida oldi. Yangi klub, yangi murabbiy, lekin Tielemans uchun bu allaqachon tanish sahna.
Uning strukturasi bor – qolganini men bolaligimdan bilaman
Carrickning o‘yin g‘oyasi haqida gapirar ekan, Tielemans murabbiyning talablarini aniq chizib berdi: to‘pni nazorat qilish, belgilangan zonalarda bosim, aniq chiziqlar. Bularning bari unga begona emas.
U aytganidek, bu – mantiqiy futbol. U “Anderlecht”dagi ilk yillaridan beri shunday o‘yinda ulg‘aygan. O‘zi ta’riflagan “futbol hidlash” – maydonda vaziyatni oldindan sezish, murabbiyning prinsiplarini tez ilg‘ash, jamoadagi rolini o‘sha asoslar ustiga qurish.
Tielemans uchun asosiy masala o‘zgarish emas, uyg‘unlashish. U Carrick chizgan struktura ichida hamon ijod uchun joy borligini biladi. Ayniqsa so‘nggi uchdan bir hududda. U yerda erkinlik ko‘proq, lekin xavf ham yuqori – ortiqcha oldinga intilish himoya chizig‘ini buzmasligi kerak. Belgiyalik aynan shu nozik muvozanatni ushlash orqali “United” o‘yiniga sifat qo‘shish niyatida.
13 yil markazda, lekin dam olishni so‘ramaydigan futbolchi
O‘tgan mavsum “Aston Villa” safida jarohatlar sababli Premier League uchrashuvlarining atigi 25 tasida asosiy tarkibda maydonga tushgan yarim himoyachi uchun bu yoz ham oson bo‘lmadi. Iyul oyida Belgiya terma jamoasi safida Jahon chempionati chorak finali oldidan Ispaniyaga qarshi o‘yinga tayyorgarlik paytida son mushagi bilan bog‘liq muammo yuzaga kelgan.
Shunga qaramay, 13 yillik professional faoliyat, yuzlab uchrashuvlar va yaqinda o‘tkazilgan jarohatlarga qaramasdan, u o‘zini muntazam dam oldirish kerak bo‘lgan futbolchi deb hisoblamaydi. Uning fikricha, o‘sha Jahon chempionatida bo‘lgan holat – jadvalning haddan tashqari zichligi, Senegal bilan 120 daqiqalik o‘yin, keyingi uchrashuvlar oralig‘ining qisqaligi bilan bog‘liq bo‘lgan istisno.
Tielemans tanasini yaxshi biladi. O‘zi aytganidek, agar nimadir noto‘g‘ri bo‘lsa, buni darhol sezadi va murabbiyga xabar qiladi. Lekin bunday holat tez-tez takrorlanmaydi. U o‘zini tayyor sezsa, to‘xtashni yoqtirmaydigan futbolchi. Carrick uchun esa bu – katta rotatsiya talab qiladigan mavsum arafasida yoqimli bosh og‘riq.
Nihoyat “Old Trafford”ga olib kelgan yo‘l
“Manchester United” uchun Youri Tielemans yangi ism emas. Klub uni 2019 yilda ham, 2022 yilda ham radarida ushlab turgan. O‘sha paytlarda ham muloqot bo‘lgan, lekin transfer yakuniga yetmagan. Belgiyalik yarim himoyachi o‘sha jarayonlarni ortiqcha shov-shuvsiz, sokin qabul qilganini aytadi. “Anderlecht”dan ketganidan ancha keyin bo‘lgan bu suhbatlar, ammo hech narsa bilan yakunlanmagan.
Bu safar esa hammasi boshqacha bo‘ldi. “United” uning shartnomasidagi bandni ishga tushirdi va, Tielemansning o‘zi ta’kidlaganidek, bu transferda raqobat deyarli bo‘lmadi. Klub aniq maqsad bilan harakat qildi, futbolchi esa nihoyat “Old Trafford”ga yo‘l oldi.
Endi esa savol bitta: Carrickning strukturasi va Tielemansning “futbol hidlash” qobiliyati birlashganda, “Manchester United” o‘yinini qay darajada o‘zgartira oladi?
