Tchouameni transferi: Real Madrid va Manchester United munosabatlari
Yozgi transfer oynasi hali to‘liq qizib ulgurmasidan, Aurelien Tchouameni nomi atrofida yana tutun ko‘tarildi. Bir tomonda — Madridda qolishga kelishib, 2031 yilgacha yangi shartnoma borasida og‘zaki “xa” degan futbolchi. Ikkinchi tomonda — uni Old Traffordga olib kelish uchun 68 million funt kifoya qilishi mumkinligi haqida xabarlar.
Bu raqam hozirgi bozor fonida deyarli ishonib bo‘lmaydigan darajada past ko‘rinadi.
Shartnoma bor, ammo e’lon yo‘q
Transfer bo‘yicha ishonchli manba sifatida qaraladigan Fabrizio Romano bu oy boshida Tchouameni Real Madrid bilan 2031 yilgacha yangi kelishuvga rozi bo‘lganini aytgan edi. Shunga qaramay, klub hanuz rasmiy e’lon qilgani yo‘q. Aynan shu sukut bozorni jonlantirdi, mish-mishlar kuchaydi, Manchester United esa yana sahnaga qaytdi.
Manchester klubi bo‘yicha tanilgan jurnalist Andy Mitten “Talk of the Devils” podkastida Madriddan olgan xabarini o‘qib eslatdi: “Ular uni baribir sotishi mumkin”. Yangi shartnoma, yuqori maosh, lekin baribir sotilishi mumkin bo‘lgan o‘yinchi. Zamonaviy futbolning klassik paradoksi.
Mitten ta’kidlaganidek, Tchouameni o‘zini yaxshi himoya qilib bo‘ldi — shartnoma unga foyda keltirdi. U Madridda baxtli, bu aniq. Lekin holat o‘zgarsa, Manchester United uchun o‘ynashdan ham mamnun bo‘lishi mumkinligi aytilmoqda. Futbolda eshiklar to‘liq yopilmaydi, ayniqsa yozgi oynada.
Real Madridga katta pul kerak
Mittenning Madrid va AQShdagi manbalari bir nuqtaga urg‘u bergan: Real Madrid katta xarid qilishni xohlaydi, demak, katta sotuv ham kerak bo‘ladi. Savol oddiy — kim ketishi mumkin?
Fede Valverdega sardorlik mas’uliyati va’dasi berilgan, bu esa uni sotuv ro‘yxatidan deyarli chiqarib qo‘yadi. Eduardo Camavinga bozorida ham Tchouameni darajasida pul tushmasligi aytilmoqda. Demak, yuqori darajadagi, katta qiymatga ega, lekin nazariy jihatdan qurbon qilinishi mumkin bo‘lgan nom — aynan Tchouameni.
Yangi shartnoma shu fon’da ko‘pchilikka “demak, Manchester United uchun eshik yopildi” degan signal bo‘lib ko‘rindi. Mitten esa shoshilmaslik kerakligini eslatdi: transfer oynasi yopilmaguncha, hech bir bitimni mutlaq imkonsiz deb bo‘lmaydi.
Mourinho rejasi va “Rodri omili”
Ingliz nashri The Sun xabariga ko‘ra, Real Madrid rahbariyati yozda Tchouameni’ni Manchester United’ga sotishga tayyor. Qiziq jihati shundaki, yangi bosh murabbiy Jose Mourinho dastlab fransiyalik tayanch yarim himoyachini saqlab qolishni rejalashtirgani aytiladi. Shunga qaramay, klub “to‘g‘ri narx” uchun unga yo‘l berishga tayyorligi yozildi.
Endi esa shu “to‘g‘ri narx” ochiq aytilmoqda — 68 million funt.
Xabarga ko‘ra, Mourinho Tchouameni’ni qurbon qilishga rozi, buning evaziga Real Madrid Manchester City va Ispaniya terma jamoasi tayanch yarim himoyachisi Rodri uchun zarur mablag‘ni to‘plashni ko‘zlayapti. Rodri taxminan 85 million funtga baholanmoqda.
Bu yerda yana bir keskin chiziq paydo bo‘ladi: hozircha Tchouameni — Real Madrid tarkibidagi yagona to‘liq tayanch yarim himoyachi. Shunday paytda uni sotish g‘oyasi ko‘pchilikni hayratga solishi tabiiy.
68 million — bozor uchun kulgili, United uchun imkonmi?
Bugungi bozorda raqamlar bosh aylantiradi. Mateus Fernandes uchun 85 million funt, Sandro Tonali 100 millionga, Elliot Anderson esa 116 million funtga ko‘tarilgan bir paytda, LaLiga va Champions League g‘olibi bo‘lgan, hali endigina yangi shartnomaga rozi bo‘lgan Real Madrid o‘yinchisi uchun 68 million funt — deyarli sovg‘aga o‘xshaydi.
Manchester United uchun esa bu — strategik imkoniyat bo‘lishi mumkin. Klub yillar davomida aniq, yuqori darajadagi tayanch yarim himoyachini izlab kelmoqda. Tchouameni profili esa aynan shu bo‘shliqni to‘ldiradigan turdagi futbolchi sifatida ko‘riladi.
Masala faqat bitta: Real Madrid haqiqatan ham bu darajada past narxga rozi bo‘ladimi yoki bu faqat bosim va bozorni qizitish uchun tarqatilgan raqammi?
Hozircha bitta narsa ayon: agar Madrid katta transferlar uchun haqiqatan ham “katta sotuv”ga borishga majbur bo‘lsa, Tchouameni atrofidagi shov-shuv yanada kuchayadi. Manchester United esa bu vaziyatdan foydalanishga jur’at topadimi?
