Rodri transferidagi raqobat: Barcelona va Madrid o'rtasidagi jang
Manchester shahridan Barselonagacha cho‘zilgan transfer yo‘lagida vaziyat keskin o‘zgardi. Ishonchli jurnalist Ramon Alvarez xabariga ko‘ra, FC Barcelona nihoyatda muhim qadam tashlab, Manchester City markaziy yarim himoyachisi Rodri bo‘yicha poygada oldinga chiqib oldi. Endi 30 yoshli Ispaniya terma jamoasi tayanch futbolchisini qo‘lga kiritish varianti real sahnaga aylandi, shunchaki mish-mish emas.
Madrid muzlab qoldi, Barcelona zarba berdi
Madridda muzokaralar cho‘zilib ketgan paytda vaziyat butunlay burilib ketdi. Matteo Moretto ma’lumotiga ko‘ra, Real Madrid va Manchester City o‘rtasidagi suhbatlar rasmiy ravishda to‘xtab qolgan – sabab bitta: yakuniy narx borasida kelishmovchilik.
Real Madrid bir necha kun davomida City qo‘ygan 75 million yevrolik talabni pasaytirishga urinib, bosim o‘tkazdi. Ammo yakuniy nuqtani qo‘yisholmadi. Hech kim yon bermadi. Hech kim imzo chekmadi.
Shu payt sahnaga Deco boshchiligidagi Barcelona sport bo‘limi chiqdi. Kataloniyaliklar bu “ma’muriy tanaffus”ni ko‘rib qoldi va darhol hujumga o‘tdi. Qisqa vaqt ichida nafaqat Rodri vakillari, balki Manchester City rahbariyati bilan ham to‘g‘ridan-to‘g‘ri aloqaga chiqildi.
Fabrizio Romano ta’kidlayotganidek, hozirgi manzarada ikkala ispaniyalik grand ham Cityga deyarli bir xil miqdorda pul to‘lashga tayyor. Ya’ni, klub darajasida moliyaviy poyga deyarli tenglashgan. Endi hammasi bitta odamning qaroriga borib taqaladi.
Qaror Rodri qo‘lida
Bu transfer dosyesining markazida endi faqat Rodri turibdi. U bir necha kun avval shaxsiy shartnoma bo‘yicha Real Madrid bilan og‘zaki kelishuvga erishgan, bunga uning tug‘ilib o‘sgan shaharga qaytish istagi kuchli ta’sir qilgan edi.
Endi esa vaziyat chigallashdi. Barcelona futbolchining o‘ziga ham katta moliyaviy loyihani taklif qilmoqda. Bu taklif Rodrini o‘ylashga majbur qildi. Endi gap faqat uyga qaytish romantikasida emas, balki maydondagi rol, sportiy istiqbol va klubdagi markaziy o‘rinda.
Kataloniyaliklar uni Hansi Flick qo‘l ostidagi yarim himoya yuragi sifatida ko‘rmoqda. Frenkie de Jongning uzoq muddatli jarohati fonida bu pozitsiya yanada muhimlashgan. Barcelona Rodriga nafaqat asosiy tarkib, balki butun o‘yin falsafasining tayanch nuqtasi bo‘lish rolini taklif qilmoqda.
Ispaniya terma jamoasi kiyimxonasidan bosim
Bu hikoyaning eng qiziq burilishlaridan biri – terma jamoa kiyimxonasidagi ta’sir. Matteo Moretto ma’lumotiga ko‘ra, Barcelona safida to‘p surayotgan bir necha ispaniyalik futbolchi har kuni Rodri bilan bog‘lanib, uni fikrini o‘zgartirishga undamoqda.
Ular undan Santiago Bernabeu yo‘lini rad etib, Camp Nou (yoki vaqtinchalik stadion) tomon burilishini so‘ramoqda. Gap faqat do‘stlikda emas. Ular Rodriga Barcelonadagi sportiy loyiha, Flick tizimidagi roli, atrofida quriladigan yarim himoya o‘qi haqida gapirib, uni bu jamoaning mutlaq lideri sifatida tasvirlamoqda.
Real Madrid esa o‘z navbatida, allaqachon shakllangan og‘zaki kelishuvga, klub nufuzi va Madridga qaytish orzusiga tayanmoqda. Ular City bilan kelishuvni yopib, Rodrini uyiga olib kelish uchun yo‘l izlayapti. Lekin muzokaralardagi har bir kechikish Barcelona foydasiga ishlayotgani aniq bo‘lib qoldi.
Poygada kim oldinda?
Hozircha rasmiy imzo yo‘q. Lekin kayfiyat boshqacha. Manbalar ta’kidlayotganidek, ayni damda Barcelona poygada bir qadam oldinga chiqqan ko‘rinadi. Moliyaviy takliflar deyarli teng, sportiy loyihalar – keskin raqobatda. Farqni endi emotsiyalar, kiyimxona ichidagi ta’sir va futbolchining ichki ovozi hal qiladi.
Rodri ikki gigant o‘rtasida turibdi. Bir tomonda – bolaligi, Madrid, Bernabeu, an’analar. Ikkinchi tomonda – Flick qo‘l ostida qurilayotgan yangi Barcelona, to‘liq erkinlik va markaziy sahnada bosh qahramon bo‘lish imkoniyati.
U qaror qilguncha, bu yozgi “El Clásico” maydondan tashqarida ham davom etaveradi. Savol bitta: Rodri qaysi libosda kelasi mavsum La Liga markazida hukmronlik qiladi?
