Rodri uchun kurash: Barcelona taklifini oshirmoqda, City chekinmayapti
Transfer bozorining eng qizg‘in liniyalaridan biri — markaziy yarim himoya. Uning markazida esa bitta ism turibdi: Rodri.
Barcelona navbatdagi zarbasini berdi. Kataloniyaliklar 30 yoshli ispaniyalik tayanch yarim himoyachi uchun bu safar 55 million funtlik taklif yubordi. Manchester City yana rad etdi. Qat’iy va tez.
O‘tgan haftada taklif qariyb 40 million funt atrofida edi va u ham hech qanday muzokara maydoni qoldirmagan holda rad etilgandi. Shundan keyin Barcelona narxni 50–60 million oralig‘iga ko‘tarishi kutilayotgani haqida xabarlar paydo bo‘ldi. Taklif oshdi, lekin Manchester City uchun baribir yetarli emas.
Klub Rodri uchun 60 million funtdan yuqori summa kutyapti. Yarim himoyachi shartnomasining so‘nggi yiliga kirgan bo‘lsa-da, City uni arzonlashtirish niyatida emas. Muzokaralar davom etyapti, lekin hozircha tashabbus asosan inglizlar qo‘lida.
City Rodridan voz kechmoqchi emas
Yoz davomida kelayotgan xabarlarga ko‘ra, Manchester City Ispaniya terma jamoasining jahon chempioni sardorini sotishni istamaydi. Aksincha, klub uni yangi shartnoma bilan bog‘lab qo‘yishga urinmoqda. Rodri — Pep Guardiola tizimining yuragi, ritm beruvchi, bosimni yutib oluvchi va hujumlarni boshlovchi o‘yinchi.
Shu bois klub pozitsiyasi aniq: qolishi kerak. Bitta istisno bor. Agar Rodri o‘zi ketishni so‘rasa, City uning yo‘lini to‘smaslikka tayyor. Futbolda bu holat ko‘p ko‘rilgan: asosiy yulduzning xohishi klub strategiyasidan ham ustun kelishi mumkin. Hozircha esa bunday burilish yo‘q, ammo Barcelona bosimi fonida savollar tobora ko‘payib boryapti.
Kataloniyaliklar esa ortga chekinish niyatida emas. Rodri ularning ko‘z o‘ngida markazni boshqaradigan, tajribasi bilan yosh tarkibni muvozanatlashtiradigan figura. Endi ular keyingi qadamni o‘ylashmoqda: narxni yana oshirishmi yoki boshqa variant izlashmi?
Reijnders bo‘yicha Saudiya yo‘nalishi
Manchester City faqat Rodri atrofidagi vaziyat bilan band emas. Klub boshqa bir markaziy yarim himoyachisi — Tijjani Reijnders bo‘yicha ham muhim qaror ostonasida turibdi.
Saudiya Arabistonining Al Qadsiah klubi bilan muzokaralar ilg‘or bosqichga kirgan. Gap qariyb 51,3 million funt (60 million yevro) atrofidagi paket haqida ketmoqda. Muzokaralar ijobiy ruhda davom etayotgani aytilmoqda.
Al Qadsiah Reijndersni “world-class” darajadagi, ayni cho‘qqi yoshidagi futbolchi sifatida ko‘rmoqda. Ular birinchi marta Asian Champions League musobaqasida qatnashishga hozirlanar ekan, aynan markaziy zona uchun kuchli figura izlamoqda. Yangi Aramco Stadiumga ko‘chish arafasida klub ambitsiyasi oshgan, Reijnders esa bu loyihaning markaziy bo‘laklaridan biriga aylanishi mumkin.
Agar bu bitim yakunlansa, Manchester City qisqa muddat ichida ikkita markaziy yarim himoyachisini yo‘qotish ehtimoli bilan yuzma-yuz keladi. Bu esa ularning transfer rejasini tubdan o‘zgartiradi.
Enzo Fernandez va Ayyoub Bouaddi — javob zarbasi?
Shu fon’da City bo‘shliqni bo‘sh qoldirmaslik uchun allaqachon harakatda. Klub kamida ikkita yangi markaziy yarim himoyachini olib kelish variantlarini ko‘rib chiqmoqda. Nomlar aniq: Enzo Fernandez va Ayyoub Bouaddi.
Bu qiziqish Manchester City qanday o‘ylayotganini ko‘rsatib turibdi. Bir tomonda hozirning o‘zidayoq yuqori darajada tayyor, katta sahnani ko‘rgan Enzo Fernandez. Ikkinchi tomonda esa istiqboli ulkan, yosh va dinamik Bouaddi. Ya’ni hozirgi quvvat va kelajak uchun sarmoya bir vaqtda yopiladigan rejalar.
Savol endi shunda: Rodri qoladimi? Reijnders ketadimi? Va eng muhimi, Manchester City yangi mavsumga markaziy chiziqda qay tarzda qayta qurilgan holda kirib keladi?
