Regis: Piritubadagi Qulash
Pirituba chekkasidagi soyada qolgan ism: Regisning qulashi
San’atkor hujumchi, muxlislar yodida qolgan texnika, katta klublarning formasini kiygan yillar. Bir paytlar Braziliya stadionlarida yorqin porlagan Regis bugun San-Pauluning shimoliy hududidagi Pirituba tor ko‘chalarida, axlat va vayronalar orasida tunab yuribdi.
U 49 yoshda. Boshpanasi – yirtiq brezent, eskirgan ko‘rpa va karton qutilar. Maydonda tomoshabinlarni oyoqqa turg‘azgan futbolchidan hozir faqat sinib qolgan gavda va charchagan nigoh qolgan, xolos.
Globo Esporte jurnalisti Emilio Botta topgan bu manzara Braziliya futboli uchun og‘riqli ko‘zgu bo‘ldi.
Bir paytlar Ponte Preta, Corinthians va Vasco safida hujum chizig‘ini boshqargan, Coritiba, Bahia, Portuguesa va hatto Yaponiya, Turkiya hamda Saudiya Arabistonida to‘p surgan futbolchi bugun ko‘chada yashaydi.
“Yaxshisi, meni o‘lgan deb o‘ylashsin… Men borligimni hech kim bilishini xohlamayman”, – deydi u Botta bilan suhbatda. Bu gap – umidsizlikning qisqa, lekin hamma narsani aytib beradigan ifodasi.
Bir paytlar 170ta rasmiy o‘yinda 49ta gol urgan hujumchi raqib jarima maydonida o‘zini qanday tutishni juda yaxshi bilardi. Ammo maydon tashqarisidagi hayot, ayniqsa, karyera yakunlangach, uni tezda yengdi. Giyohvandlik bilan kurash sekin-asta hammasini tortib oldi: uyini, obro‘sini, oilasi va do‘stlarining ishonchini.
Regisning modda qaramligiga yo‘li futbolchilik yillaridayoq boshlangan. U oddiy antidoping tekshiruvlarida ikki marta kannabis uchun ijobiy natija bergan. O‘sha paytda bu ogohlantiruvchi signal edi. Lekin u signalga hech kim yetarlicha jiddiy qaragandek ko‘rinmaydi.
Yillar o‘tib, karyera tugadi, stadion chiroqlari o‘chdi, tribuna shovqini jimidi. Crack kokain esa sekin, lekin qat’iyat bilan uning hayotini egallab oldi. Bugun u Piritubadagi kichik maydonchada, atrofini vayronalar va chiqindilar o‘rab turgan holda, shu qaramlikning tirik timsoli bo‘lib qolgan.
Uning ahvoli haqida xavotirlar avvaliga havaskor jamoa safdoshlari orqali tarqaldi. Sobiq jamoadoshlari uning sog‘ligi keskin yomonlashgani, tanib bo‘lmas darajaga tushib ketganini payqashdi. Shundan so‘nggina keng jamoatchilik Regisning qaerda va qanday ahvolda ekanini bildi.
Huquqiy muammolar ham uni yanada tubanlikka tortdi. 2025 yilda bino boshqaruvchisini do‘pposlashda ayblanib qo‘lga olinishi, so‘ng o‘z kvartirasidan majburan chiqarib yuborilishi – qulash jarayonining eng og‘ir nuqtalaridan biri bo‘ldi. O‘sha eshik yopildi va u endi qaytib ochilmadi.
Bugun Regis – faqat o‘tmishdagi golari, ko‘hna stadionlarning xira xotiralarida yashaydigan ism emas. U Braziliya futbolidagi achchiq savol: bir paytlar elka-elka bo‘lib maydonga tushgan, millionlarni quvontirgan futbolchilar karyeradan keyin qayerga yo‘qoladi?
