Real Madridda Mourinho davri: Muxlissiz taqdimot va yangi siyosat
“Real Madrid” yangi davrni g‘alati, hatto biroz sovuq tarzda ochdi. Klub odatdagi shov-shuvli sahnadan voz kechdi va José Mourinho’ni muxlissiz, jurnalistsiz, yopiq eshiklar ortida taqdim etdi. Yillar davomida “Santiago Bernabéu”da yulduzlar sahnaga chiqib, minglab odamlar oldida oq libosni ko‘tarib ko‘rsatgan klublar endi o‘zini butunlay boshqa yo‘lga burdi.
Bu safar esa hammasi ichkarida bo‘ldi. Shartnoma – 2029 yilgacha. Sahna – klubning o‘z ofislari. Tomoshabin – faqatgina “Real Madrid TV” kamerasi.
Pérezning keskin burilishi
Ispaniyaning “Sport” nashri xabariga ko‘ra, yozgi transferlar davridagi ilk “maxsus marosim” aynan Mourinho atrofida uyushtirildi. Ammo u “maxsus” so‘zini ko‘proq sokinlik, nazorat va yopiq format bilan to‘ldirdi. Klub an’anaviy taqdimotdan butunlay voz kechdi: katta zal, muxlislar, tribuna, savol-javoblar – yo‘q. Faqat imzo qo‘yish lavhalari, u ham o‘z telekanalida qisqa ko‘rsatilgan kadrlarda.
Bunga turtki bergan shaxs – prezident Florentino Pérez. U yozgi kampaniya uchun qoidalarni o‘zgartirdi: yangi kelganlar endi ommaviy sahnaga emas, xususiy marosimga ega bo‘ladi. So‘nggi yillarda klub tarixida deyarli uchramagan qaror.
Yirik transferlar odatda “Santiago Bernabéu”da tantanali kutib olinardi. Ayniqsa, dunyo yulduzlari. Yaqin o‘tmishda Kylian Mbappé kelganida stadion eshiklari keng ochilgan, minglab muxlislar uni qarsaklar bilan qarshi olgan, sahnaga chiqqan fransiyalik hujumchi oq libosni ko‘tarib olamshumul shou markazida turgandi.
Endi esa bu manzara takrorlanmaydi.
Yulduzlar ham sahnadan mahrum
Bu yozda kelayotganlarning hech biri – na Yan Diomande, na Marc Cucurella – bunday ommaviy shou ko‘rmaydi. Ayniqsa, Diomande klubning eng e’tiborli transferlaridan biri sifatida tilga olinmoqda. Xabarlarga ko‘ra, u “Real Madrid” tarixidagi eng qimmat kelgan futbolchilardan biri bo‘lib, faqat Eden Hazard bilan tuzilgan kelishuv undan qimmat bo‘lgan.
Shunday bo‘lsa-da, bu safar hamma narsa yopiq. Katta sahna o‘rniga kichik xona, muxlislarning qiyqirig‘i o‘rniga sokin imzo, ijtimoiy tarmoqlarda trend bo‘lish o‘rniga klubning rasmiy sahifalarida qisqa, deyarli sezilmas darajadagi eslatma.
Pérez boshchiligidagi rahbariyat yangi siyosatni aynan Mourinho kelgan kundan boshlab ishga tushirdi. Prezident saylovlarda g‘alaba qozonib, sport loyihasini qayta qurishga kirishganidan so‘ng, portugaliyalik murabbiyga yana Madrid eshiklarini ochdi. Endi u nafaqat jamoaning sportdagi yetakchisi, balki klubning yangi kommunikatsion uslubidagi ilk “sinov loyihasi”ga aylandi.
“Arvoh taqdimot”
Mourinho marosim davomida bir og‘iz ham gapirmadi. Hech qanday nutq, sahnadan turib “Hala Madrid” demadi. Klubning rasmiy ijtimoiy tarmoqlari ham bu voqeani deyarli e’tiborsiz qoldirdi – qisqa lavhalar, kam sonli suratlar, xolos.
Shu bois “Sport” bu voqeani “taqdimot-arvoh” deb atadi. Arvoh – chunki muxlis yo‘q, jurnalist yo‘q, jonli efir yo‘q. Faqat imzo, faqat ichki marosim.
Muxlislar va ommaviy axborot vositalari esa endi kutishga majbur. José Mourinho yangi davrdagi ilk so‘zlarini 21-avgust, juma kuni aytadi. “La Liga” ochilish uchrashuvi oldidan, Espanyol bilan o‘yin arafasidagi matbuot anjumanida.
Shu paytga qadar esa “Real Madrid” atrofida bitta savol havoda osilib turibdi: bu sokin, yopiq eshiklar ortida boshlangan inqilob klubni yanada kuchli qiladi, yoki “Bernabéu”dagi shovqin-suron bilan birga uning ruhi ham sekin-asta so‘nib boradimi?
