Novak Djokovic Global Investor Sifatida General Atlanticga Qo'shildi
Tennis kortlarida rekordlarni birin-ketin yangilab kelayotgan Novak Djokovic endi boshqa maydonga ham qadam qo‘ydi. Global investor sifatida tanilgan General Atlantic serbiyalik yulduz kompaniyaga Global Strategic Advisor sifatida qo‘shilganini e’lon qildi.
Bu oddiy faxriy unvon emas. Djokovic General Atlantic rahbariyati, portfel kompaniyalari va investorlar bilan bevosita ishlaydi. U yillar davomida kortda sayqallagan yetakchilik, matonat va yangilikka intilish bo‘yicha qarashlarini endi biznes olamiga olib kiradi. Kompaniya o‘zini yuqori o‘sish sur’atiga ega, bozorni belgilovchi bizneslarni qurayotgan asoschilar bilan sheriklikka bag‘ishlagan bo‘lsa, Djokovic ularga sportdagi tajribasi orqali yangi ko‘nikmalar qo‘shishi kutilmoqda.
General Atlantic boshqaruv kengashi raisi va bosh ijrochi direktori Bill Ford bu hamkorlikni bejiz “tabiiy uyg‘unlik” deb atamadi. Uning ta’kidlashicha, Djokovicning intizomi, qat’iyati va chekinmas ruhi kompaniya madaniyati va qadriyatlariga juda mos keladi. Kompaniya uni nafaqat sport afsonasi, balki global miqyosda o‘sish va uzluksiz rivojlanish ramzi sifatida ko‘rmoqda.
Djokovicning o‘zi ham tanlovini tasodifiy qilmagani aniq. U General Atlanticni “boshqalar qo‘ygan chegarani qabul qilmaydigan asoschilarni o‘n yillab qo‘llab kelayotgan” investor sifatida ta’rifladi. Uningcha, eng yuqori darajadagi sportni boshqaradigan tamoyillar – intizom, uzoq muddatli fikrlash va doimiy takomillashishga jur’at – buyuk bizneslarni ham yaratadi. Endi u shu falsafani General Atlanticning navbatdagi bosqichiga singdirishni maqsad qilgan.
Bu hamkorlik tasodifiy emas, balki ancha chuqur ildizga ega. General Atlantic asosiy investori Chuck Feeney merosiga tayangan holda, to‘rt yarim o‘n yillikdan beri butun dunyo bo‘ylab sog‘liqni saqlash, hayotiy fanlar, iste’molchi bozori va texnologiya sohalarida o‘zgarish yasaydigan kompaniyalar bilan sheriklik qilib keladi. Maqsad – o‘sish, innovatsiya va inson farovonligini bir nuqtada tutashtirish. Djokovic bilan kelishuv ham aynan shu qadriyatlarga, uzoq muddatli qarashga va elita sport bilan investitsiya olamini birlashtirish g‘oyasiga tayanadi.
Djokovicning o‘zi esa allaqachon tarixni qayta yozib bo‘ldi. 15 yoshida professional bo‘lganidan buyon u tennisda “eng buyuk” maqomini rasman mustahkamladi. 24 ta Grand Slam yakkalik chempionligi, tarixiy triple Career Grand Slam, Parij–2024 Olimpiadasidagi oltin medali bilan to‘liq Career Super Slam – bularning barchasi uning nomiga yozilgan. 428 hafta davomida World No. 1, sakkiz marta yil yakunida birinchi raqamli tennischi, 40 ta ATP Masters 1000 unvoni – bu raqamlar uni nafaqat sport, balki global brend darajasiga olib chiqqan.
Endi esa savol boshqa: kortlarda raqiblarini tiz cho‘ktirgan Djokovic kapital bozorida, yuqori o‘sishdagi kompaniyalar olamida qanday iz qoldiradi? General Atlantic bilan bu yangi set endi boshlanmoqda.
