Neymarning sari libosdagi so‘nggi sahnasi

MetLife Stadiumdagi o‘sha kecha allaqachon tarixga aylanib bo‘ldi. Norvegiya Braziliyaning 2026-yilgi Jahon chempionati orzusiga xalaqit berdi, lekin stadionni muzdek sukunatga cho‘ktirgan narsa hisob emasdi. Maydon o‘rtasida ko‘z yoshlari bilan turgan Neymar edi. O‘n olti yillik terma jamoa yo‘li ana shu yerda uzildi.

Oradan ko‘p o‘tmay, u bu bobni rasman yopdi. Endi mikrofonlar oldida, lekin allaqachon boshqa libosda – Santos sardori sifatida.

Mening terma jamoadagi vaqtim tugadi

Santos – Universidad Central uchrashuvidan keyingi intervyu odatdagi savol-javob bo‘lib qolmadi. 4:2 hisobidagi g‘alaba, Copa Sudamericana bosqichiga chiqish, uy stadioni shovqini… hammasi bitta gap soyasida qolib ketdi.

Neymar charchagan, lekin qat’iy ohangda so‘z boshladi: uning tanasi hali ham katta sahnaga tayyor, ammo ruhiy ravishda qaror allaqachon pishib ulgurgan edi. U terma jamoa masalasida shubha qoldirmadi – Braziliya bilan yo‘llar ajraldi.

U o‘zini oqlamadi, uzr so‘ramadi. Aksincha, yelkasidagi yillar davomida ko‘tarib yurgan yukni nihoyat yerga qo‘ygandek gapirdi. Rekordlar, bosim, doimiy taqqoslashlar – bularning bari ortda. U o‘zini Braziliya futbol tarixiga kirgan futbolchi sifatida ko‘radi va shunga ishonadi: u sari libos uchun qo‘lidan kelgan hamma narsani qildi.

MetLife dagi penalti, so‘nggi daqiqalarda kiritilgan gol, baribir yetarli bo‘lmadi. Yakunda esa maydon chetida o‘zini tutolmay yig‘layotgan Neymar – Braziliya avlodlari yodida qoladigan kadr. O‘sha ko‘z yoshlardan keyin bugungi “tamom” degan qaror shunchaki rasmiylashtirish bo‘ldi, xolos.

Endi to‘liq – Santos uchun

Terma jamoadan ketish – bo‘shliq emas, yo‘nalish almashinuvi. Neymar endi butun e’tiborini Santosga qaratadi. Bolaligida orzu qilgan klubiga, bugun esa sardor sifatida yetakchilik qilayotgan jamoasiga.

Universidad Centralga qarshi o‘yinda u zaxiradan tushib, o‘yinning ritmini o‘zgartirdi. Maydonga kirgan zahoti raqib mudofaasi ortga chekina boshladi, Santos esa oxirigacha bosimni ushlab turdi va 4:2 hisobidagi g‘alabani qo‘lga kiritdi. Bu natija braziliyaliklarga Copa Sudamericana nimchorak finaliga yo‘l ochdi, endi navbat Ekvador klubi Macara ga.

Neymar o‘yin tugagach, bir necha daqiqada stadion markazida kichik ziyoratgohga aylandi. Universidad Central futbolchilari navbat bilan suratga tushish, futbolka, butsa, hatto paypoq so‘rashdi. U maydondan deyarli kiyimsiz, faqat ichki libosda chiqib ketdi – qolgan hammasi raqiblar uchun sovg‘a bo‘ldi. Bu manzara uning atrofidagi orbitaning hanuz qanchalik kuchli ekanini ko‘rsatib turardi.

Mojarolar, ayblovlar va sardor so‘zi

Ammo Santosdagi kunlar faqat maqtov va olqishlardan iborat emas. Yaqinda Chapecoense ga qarshi 2:2 hisobida yakunlangan o‘yindan so‘ng Neymar atrofida yangi shov-shuv ko‘tarildi. Ayrim xabarlarga ko‘ra, u Gabriel Bontempo va Joao Ananias ni haqorat qilgani, ularning mahoratini kamsitgani va kelasi mavsumda ikkinchi ligada o‘ynashlarini aytib, masxara qilgani iddao qilindi.

Neymar bunga javoban keskin munosabat bildirdi. U bunday gaplar ataylab bo‘rttirilganini, bo‘linish yaratishga urinayotgan “yovuz” hikoyalar ekanini ta’kidladi. Uning aytishicha, kiyinish xonasidagi nutqi talabchan bo‘lgan, lekin chiziqdan o‘tmagan: u jamoa bo‘shashib qolganini, bunday o‘yinni boy berib bo‘lmasligini, Chapecoense ga hurmat saqlangan holda, lekin Santos darajasiga yarashmaydigan durang ekanini urg‘ulagan xolos.

U o‘zini sardor sifatida bunday gapirishga haqli deb biladi. Unga ko‘ra, bu – talabchanlik, kamsitish emas. U nutq paytida yolg‘iz bo‘lmaganini ham eslatib o‘tdi: Lucas Veríssimo va Gabigol ham so‘z olgan, jamoa ichida muhokama bo‘lgan.

Bu mojaro Neymar atrofidagi eski hikoyani yana yuzaga chiqardi: kimdir uni bo‘linish manbai sifatida ko‘rishga shoshiladi, ammo kiyinish xonasida uni ko‘pincha yetakchi sifatida qabul qilishadi. Haqiqat, odatdagidek, shov-shuvli sarlavhalar bilan ichki dinamikalar orasida qolib ketadi.

Bir davr yakuni va yangi savollar

Neymar terma jamoa safida endi maydonga tushmaydi. Bu fakt. Braziliya esa o‘z tarixidagi eng sermahsul to‘purarlardan birisiz yangi yo‘l chizishi kerak bo‘ladi. Bu yo‘l kim atrofida quriladi? Kim bosimni, tanqidni, doimiy taqqoslashni ko‘tarishga tayyor?

Santos esa aksincha, Neymar bilan hozircha to‘liq hayot kechirmoqda. Klub Copa Sudamericana da yo‘lini davom ettiradi, Neymar esa har bir o‘yinda nafaqat texnik mahorati, balki tajribasi bilan ham markazda turadi. U uchun endi har bir uchrashuv – bolalikdagi klubida yozilayotgan yangi bob.

Sari libosdagi sahna yopildi. Endi savol bitta: Neymar Santos bilan yana bir bor qit’a sahnasini larzaga keltirishga ulgura oladimi?