Neymar davrining tugashi: Ancelotti Braziliya terma jamoasini yangilamoqda
Carlo Ancelotti nihoyat og‘ir, ammo muqarrar xulosani e’lon qildi. Neymar endi Braziliya terma jamoasida o‘ynamaydi. Rsmiy, aniq, ortga yo‘l yo‘q.
Bu qaror murabbiy emas, futbolchining o‘zi tomonidan qabul qilinganini Ancelotti CNN Esportes’ga bergan katta intervyusida tasdiqladi. Oylab davom etgan taxminlar, 2026-yilgi Jahon chempionatidan keyingi “qaytadimi-qaytmaydimi” savollari bir zumda yopildi.
Neymar o‘n yildan ortiq vaqt davomida Braziliya futbolining markazi bo‘lib keldi. U atrofida jamoalar qurildi, turnirlar rejalashtirildi, umidlar bog‘landi. Endi esa bu bo‘shliqni hech kim aynan o‘sha shaklda to‘ldira olmaydi, Ancelottining o‘zi ham buni tan oladi.
Murabbiy bunday dedi: u sifatiga ko‘ra terma jamoada bo‘lishga munosib edi, lekin Neymar aniq qilib, qaytishni istamasligini bildirgan. Ancelotti uni “g‘ayrioddiy va noyob iste’dod, almashtirib bo‘lmaydigan futbolchi” deb atadi. Bu so‘zlar xayrlashuv emas, butun bir avlodga qo‘yilgan nuqta kabi yangradi.
Yangi Braziliya uchun keskin burilish
Neymar sahifasi yopildi. Endi Ancelotti va terma jamoa direktori Rodrigo Caetano butunlay boshqa rejaga o‘tmoqda. Maqsad aniq: 2030-yilgi Jahon chempionatiga kelib, Braziliyani yana dunyo cho‘qqisiga qaytara oladigan yangi avlodni shakllantirish.
Bu yangilanish allaqachon tarkib tanlovida ko‘rinmoqda. Tajribali, yillar davomida ro‘yxatdan tushmagan ismlar chetga surilmoqda, o‘rniga esa endigina o‘smirlikni ortda qoldirayotgan iqtidorlar va mahalliy chempionat yulduzlari chaqirilmoqda.
Ancelotti keyingi to‘rt yil uchun rejasini aniq chizib berdi. Uning nigohi 2004, 2005, 2006-yillarda tug‘ilganlarga qaratilgan. U hatto 2008-yilda tug‘ilgan, hali katta futbolda to‘liq ko‘rinmagan, ammo katta salohiyatga ega futbolchilar haqida ham gapirdi. Yoshni inobatga olgan holda, ularni ehtiyotkorlik bilan, lekin qat’iy reja asosida jamoaga olib kirish niyatida.
Murabbiy bir jihatni alohida urg‘uladi: 36–37 yoshda ham yuqori darajada o‘ynash mumkin, lekin ayni paytda ustuvorlik yoshlarga berilishi kerak. Braziliya uchun hozir aynan shu burilish pallasi.
Neymar soyasidan chiqayotgan jamoa
Neymar davriga qo‘yiladigan asosiy e’tirozlardan biri — terma jamoaning uning individual mo‘’jizalariga haddan tashqari tayanib qolganida edi. Bir lahzalik dahosi ko‘p narsani hal qildi, lekin har safar ham emas. Bu bog‘liqlik Braziliyani zamonaviy futbol ritmidan orqada qoldirdi.
Ancelotti bu zanjirni uzmoqchi. Uning konsepsiyasi aniq: jamoa bir butun bo‘lib ishlashi kerak, yulduz esa shu tizim ichida qiymat topadi. U kuchli intizom va ijodkorlikni birlashtiradigan tuzilma qurmoqchi, unda yosh futbolchilar o‘z iqtidorini jamoaviy o‘yin ichida ochib beradi.
Bu g‘oya tez orada sinovdan o‘tadi. Oldinda Australia va India bilan o‘rtoqlik uchrashuvlari turibdi. Aynan shu o‘yinlarda bir nechta yangi futbolchi ilk bor maydonga tushishi kutilmoqda. Ular uchun bu oddiy o‘rtoqlik emas, Braziliya terma jamoasining kelajagiga kirish imtihoni bo‘ladi.
Ancelotti zamonaviy futbol haqida gapirar ekan, yakdillikni markazga qo‘ydi: bugungi o‘yinda faqat individual mahorat bilan uzoqqa borib bo‘lmaydi. Albatta, katta iste’dod g‘alaba imkoniyatini oshiradi, lekin jamoaviy mehnat yetishmasa, yuqori bosim ostidagi futbol buni kechirmaydi. Braziliya endi bitta super yulduzga emas, kuchli tizimga tayanishi kerak.
Og‘riqli mag‘lubiyatdan keyingi qayta qurilish
Bu shoshilinch islohotlarning ortida bitta chuqur iz bor: so‘nggi Jahon chempionatidagi muvaffaqiyatsizlik. Braziliya kutilganidan ancha erta, alamli tarzda turnirni tark etdi. Bu mag‘lubiyat federatsiyani ham, murabbiy shtabini ham strategiyani tubdan qayta ko‘rib chiqishga majbur qildi.
Ancelotti o‘sha kampaniyani ochiqchasiga “xafsalani pir qilgan” deb atadi. U kechirim so‘radi, lekin o‘tmishga yopishib qolishni istamaydi. Endi qarash faqat oldinga. Ular qo‘lida vaqt bor — yangi avlodni tayyorlash, xatolardan xulosa chiqarish, mentalitetni yangilash uchun.
Yaqinlashib kelayotgan o‘rtoqlik uchrashuvlari endi oddiy sinov emas, yangi Braziliya poydevorining ilk g‘ishtlari sifatida ko‘rilmoqda. Har bir yosh futbolchi uchun bu chaqiruv: sen haqiqatan ham Selecao darajasiga loyiqmisan?
Ancelotti bitta fikrni qat’iy takrorladi: Braziliya har doim dunyoning eng kuchli terma jamoalari orasida bo‘lishi kerak. Savol esa endi boshqacha: Neymar sahifasi yopilgan bir davrda, bu mamlakat yangi yulduzlar emas, yangi jamoa falsafasi bilan yana cho‘qqiga qayta oladimi?
