Newcastle United Lewis Hall’ni qo‘yib bermaydi: Manchester Unitedga qat’iy javob
Yozgi bozor hali to‘liq qizib ulgurmasidan, chap qanot himoyachisi uchun kurash allaqon keskinlashdi. Manchester United uzoq vaqtdan beri kuzatib kelayotgan 21 yoshli himoyachi Lewis Hall bo‘yicha ilk rasmiy qadamni tashladi, ammo Newcastle United darhol eshikni yopdi.
Ikki hafta oldin yuborilgan dastlabki so‘rov rad etildi. Shundan beri pozitsiya o‘zgargani yo‘q: Hall bu yozda sotilmaydi.
Manchester Unitedning chap qanot muammosi
Old Traffordda chap qanot himoyasi bo‘shab qolgan. Michael Carrick yangi mavsumga faqat bitta tajribali variant bilan kirib bormoqda: Luke Shaw. Uning shartnomasi esa atigi bir yilga yetadi. Tyrell Malacia klubni erkin agent sifatida tark etdi, zaxira yo‘q.
Shu fon’da Hall nomi mart oyidan beri Manchester United ro‘yxatining yuqori qismida turibdi. Klub uni Shaw o‘rniga uzoq muddatli yechim sifatida ko‘radi. Yosh, ingliz, texnik jihatdan pishiq va chap qanotda zamonaviy talablarga mos himoyachi – bu profil hozirgi bozor sharoitida juda kamyob.
Shu sabab Manchester United bu yozda Hall bo‘yicha imkoniyatni sinab ko‘rdi. Javob aniq bo‘ldi: “Yo‘q”.
Newcastle pozitsiyasi: sotish emas, kuchaytirish
Newcastle United o‘zining chap qanotidagi kelajagini Hall bilan bog‘lab qo‘ygan. 21 yoshli futbolchining klub bilan amaldagi shartnomasi hali uch yil davom etadi, bu esa “magpies”ga muzokaralarda qo‘shimcha kuch beradi.
Qiziq tomoni shundaki, Newcastle o‘zi ham yozda yana bir qanot himoyachisi qidiryapti. Demak, Hall atrofidagi reja – sotish emas, ichki raqobatni oshirish. Klub rahbariyati uni tarkibdagi muhim bo‘lak sifatida ko‘rayotgani shundoq ko‘rinib turibdi.
Shunga qaramay, ichkarida hamma ham uni mutlaqo almashtirib bo‘lmaydigan futbolchi deb hisoblamaydi. O‘tgan mavsumning aprel oyida Hall ma’lum vaqt asosiy tarkibdan tushib qolgani ham shuni ko‘rsatadi. Lekin bu hozircha Manchester United uchun eshik ochildi, degani emas.
“Erishish mumkin bo‘lgan nishon” – lekin hozir emas
Sky Sports News’ning “A big summer for... Manchester United” podkastida Danyal Khan Hall atrofidagi vaziyatni ancha oldin ochib bergan edi. U mart oyidayoq Manchester United qiziqishi haqida gapirganda, ko‘pchilik bunga jiddiy qaramagan, bu transfer deyarli imkonsizdek ko‘ringan.
Mavsum yakuniga kelib manzara biroz o‘zgardi. Newcastle kelasi mavsumda Champions League o‘ynamaydi, tarkibda ayrim o‘zgarishlar kutilmoqda, murabbiylik shtabidagi siljishlar ham o‘z ta’sirini o‘tkazmoqda. Bu omillar fonida Hall bozor nuqtai nazaridan “yetib bo‘ladigan” nishonga o‘xshab qoldi.
Manchester United ham aynan shuni his qildi: yosh ingliz himoyachisi bo‘yicha imkoniyat paydo bo‘lgandek tuyuldi. Ammo klubning ilk urinishidayoq Newcastle qat’iy rad javobini berdi.
Old Trafford rejalari: faqat Hall bilan cheklanmaydi
Manchester United rahbariyati yozgi oynani faqat bitta pozitsiya bilan cheklamoqchi emas. Chap qanot himoyachisi ustuvor yo‘nalish bo‘lib qolayotgan bo‘lsa-da, Carrick yana bir markaziy yarim himoyachi bilan jamoani kuchaytirish variantini ham ko‘rib chiqmoqda.
Shu bilan birga, Hall bo‘yicha eshik butunlay yopildi, deyish ham erta. Transfer oynasi uzun, bozor keskin burilishlarga boy. Hozircha Newcastle “sotilmaydi” deydi, Manchester United esa boshqa variantlarni baholay turib, Hall nomini ro‘yxatdan o‘chirmayapti.
Savol ochiq qolmoqda: Old Trafford yangi chap qanot himoyachisini qayerdan topadi – bozor ichidanmi yoki baribir St James’ Park devorlarini larzaga keltiradigan taklif bilanmi?
