Moyes: Oynchilarni yo‘qotdik, lekin bahona qidirmayman
Transfer oynasi yopildi, lekin David Moyes kayfiyati hanuz ochiq-oydin: u hafsalasi pir, lekin taslim emas.
“Men ko‘proq ish bitishini xohlagan edim”
Matbuot anjumanining ilk savoli transferlar haqida bo‘ldi. Moyes bir zum ham o‘ylanmay javob berdi: u oynadan mamnun emas.
“Ko‘proq ish qilishni xohlagan edim, oxirida narsalar biz xohlagandek ketmadi”, – deya tan oldi u. Gap qisqa: rejalashtirilgan kuchaytirishlar to‘liq amalga oshmadi, ayrim bitimlar so‘nggi chiziqda yiqildi.
Balogun atrofidagi vaziyat ham shunga misol. Moyes bunga bahona sifatida qarashni rad etdi: “Hech kimning aybi emas. Ba’zan futbolchilarning tibbiy ko‘rigida muammolar chiqadi, bundan ortiq narsa yo‘q”. Klub tibbiyot xulosasiga to‘qnash keldi, transfer esa shu yerda to‘xtadi.
Garner, bozor va “Chelsea” mish-mishlari
James Garner mavzusi esa alohida chiziq. U o‘tgan mavsumda yorqin o‘yin ko‘rsatdi, tabiiyki, bu e’tibor tortadi. Moyes bunga tayyor.
Unga ko‘ra, yuqori darajaga chiqayotgan har bir futbolchi bozorni qiziqtiradi, buni qabul qilish kerak. Murabbiy Garnerdan o‘tgan mavsumdagi kabi o‘sishda davom etishini kutmoqda.
“Chelsea Garner uchun kech taklif berdi”, degan da’volar esa Moyes uchun chiziqdan o‘tgan gap bo‘ldi. U gapni keskin tugatdi: “Mutlaqo yolg‘on. Bunda hech qanday haqiqat yo‘q edi”. Shu bilan bu mavzuga nuqta qo‘ydi.
Ambitsiyalar, yangi egalar va ichki muvofiqlik
Mavsum oldidan ambitsiyalar? Bu yerda ham murabbiy ochiq gapirdi: “Unchalik yaxshi emas” – u transfer oynasini shaxsiy nuqtai nazardan shunday qabul qilgan.
Shunga qaramay, u o‘tgan mavsumni eslatdi: jamoa kutilganidan yaxshiroq natija ko‘rsatdi. Endi xuddi shunday sakrashni yana bir bor takrorlash niyatida. Buning uchun esa yordam kerak – faqat maydonda emas.
Moyes Bournemouth safariga kelgan muxlislarni alohida tilga oldi va endi navbatdagi katta sinov – United ga qarshi o‘yinda ham ularning yelkasiga tayanishini aytdi. Tribuna bosimi, ayniqsa shunday noaniq davrda, murabbiy uchun qurol.
Savol esa kattaroq: murabbiy, rahbariyat va TFG bir yo‘nalishda harakat qilyaptimi? Moyes javobni uzoq o‘ylamadi: muvaffaqiyat uchun hamma bo‘g‘in bir-biriga ulanib ishlashi shart. Klubda yangi egalik davri endi boshlanmoqda, ular hali PL klubini boshqarish mas’uliyatini chuqur o‘rganib borishyapti. Murabbiy ishonch bildirdi: bu tushunish chuqurlashgani sari, ichki muvofiqlik ham kuchayadi.
Shu bilan birga, u TFG ning investitsiya qidirish jarayoni bo‘yicha o‘zi bilan hech qanday suhbat bo‘lmaganini ochiq aytdi. Bu ham klub ichida hali hal qilinmagan savollar borligini ko‘rsatadi.
Akademiya: imkoniyat bormi yoki zaruratmi?
Moyes akademiya haqida so‘ralganda, o‘ta ehtiyotkor ohangni tanladi. Hozircha aniq tayyor futbolchi bormi? U bunga ishonch bilan “ha” deyolmadi. Shunga qaramay, mavsum davomida ularning ba’zilari sahnaga chiqishi mumkinligini tan oldi – zarurat majbur qilishi ehtimoli katta.
Braiden Graham misoli shunday. “Avvalo, men uni hujumchi deb hisoblamayman”, – dedi Moyes. U Braidenni yoqtirishini, u pre-season davrida ko‘p o‘ynaganini aytdi. Rivojlanish bor, lekin murabbiy halol: bu mavsumda uni PL gollari manbai sifatida ko‘rish qiyin.
Bu, albatta, hujum chizig‘idagi bo‘shliqni yanada yaqqol ko‘rsatadi. Ayniqsa, o‘rtoqlik uchrashuvlarida ayrim variantlarni sinab ko‘rish imkoni bo‘lmaganini eslaganda. Moyes tan oldi: agar hozirgi vaziyatni oldindan bilganida, ba’zi futbolchilarni yozgi o‘yinlarda old chiziqda sinab ko‘rgan bo‘lardi.
Bo‘sh bozor va talabchan murabbiy
Savollar erkin bo‘lim yopilgach ham davom etdi. Giulia tomonidan berilgan, George va Johnson bilan Barry ga ko‘mak borasida suhbat bo‘lganmi, degan savolga Moyes hali bunga qo‘l urmaganini aytdi. Hozircha u mavjud ishiga jam bo‘lgan, muammolar chiqqan sari ularga yechim topishi kerak bo‘ladi.
Bo‘sh agentlar bozorini ko‘rib chiqish – variant. Moyes bunga ochiq. Lekin bitta qat’iy tamoyil bor: jamoani haqiqatan kuchaytiradigan futbolchi bo‘lishi kerak. Shunchaki raqam to‘ldirish uchun emas. U yangi keladiganlarga klub ularga yaxshi platforma bera olishini his qildirishni xohlaydi – kimlargadir esa bu o‘z terma jamoasiga yo‘l bo‘lishi mumkin. U bu yerda aniq nomlarni tilga oldi: Hackney, Branthwaite kabi futbolchilar uchun bu juda muhim.
Ketganlar, qolganlar va Armstrong muzokaralari
Mavsum oralig‘ida bir nechta asosiy futbolchilar bilan xayrlashish Moyesga yoqmagan. U ochiq aytdi: hamma ketganlarni yo‘qotishni istamagan. Ammo bozor shafqatsiz, ayrim holatlarda klub pul ishlashga majbur bo‘ladi.
U Everton ning pul tushumiga ehtiyoji bo‘lganini eslatib o‘tdi. “Oxir-oqibat, Armstrong bo‘yicha gaplar shular bilan bog‘liq edi”, – dedi u. Klub ichida bu mavzu muhokama qilingan, lekin u Ndiaye ni qo‘yib yuborishni xohlamaganini ham yashirmadi. Bunday vaziyatni u ilgari ham ko‘rgan – Rooney bilan bo‘lgan davrni eslatib o‘tdi. Yulduzlar ketadi, klub esa yashashda davom etadi.
Moyes o‘zini oqlashga urinmadi: “Men PL uchun qanday tarkib qurish kerakligini bilaman. Ba’zi narsalar bizga qarshi bo‘ldi, ba’zilarini esa o‘zimiz yaxshiroq qilolardik”. Bu jumla murabbiyning o‘ziga bo‘lgan talabchanligini aniq ko‘rsatadi.
Ichkarida kayfiyat boshqacha
Shunga qaramay, u kiyinish xonasidagi ruhiyatni ijobiy deb ta’rifladi. “Bu yerda, ichkarida, biz mavsumni qanday boshlaganimizdan juda ko‘p ijobiylik va ishonch bor”, – dedi u. Endi uning vazifasi aniq: shu ishonchni saqlash, futbolchilarga kerakli ko‘mak va orqa chiziqni berish.
Transfer oynasi yopildi, shikoyat qilishga vaqt yo‘q. Endi sinov – maydonda. United ga qarshi o‘yin, keyin esa butun PL marafoni. Savol bitta: bu qisqargan, lekin birlashgan tarkib yana bir bor kutilmagan marrani zabt eta oladimi?
