Miguel Oliveira: MotoGP’dan Superbike’ga o‘tish
15 yil davomida GP paddokida yashagan Miguel Oliveira 2026-yilda yangi bob ochdi: endi u World Superbike Championship maydonida, qo‘lida esa BMW M1000RR. Nemis ishlab chiqaruvchisining bu motosikli so‘nggi yillarda seriyada dovrug‘ qozongan – Toprak Razgatlioglu 2024 va 2025-yillarda aynan shu texnikada ketma-ket ikki bor chempionlikni tortib olgan.
Endi esa BMW ranglarida boshqa bir taniqli ism – 31 yoshli Oliveira.
MotoGP’dan Superbike’ga: boshqa olam, boshqa ritm
2019-yildan 2025-yilgacha Oliveira MotoGP’da qatnashdi, KTM, Aprilia va Yamaha bilan turli loyihalarda kurashdi. 2026-yil esa uni majburiy burilish kutib turardi – Superbike’ga o‘tish.
U qaysi birini ko‘proq yoqtiradi – MotoGP prototipi yoki seriyaviy Superbike?
“Bu bog‘liq. Agar ikkalasida ham tez bo‘lsang, ikkalasi ham juda maroqli”, deydi Oliveira. “Aniq bir afzallik yo‘q, Superbike ham ajoyib zavq beradigan mototsikl. Lekin ular shunchalik boshqacha-ki, aslida solishtirib bo‘lmaydi.”
MotoGP texnikasi – sof prototip: taxminan 300 ot kuchi, murakkab aerodinamika, elektronikaga to‘la boshqaruv. Superbike esa zavoddan chiqqan seriyaviy modelning o‘zgartirilgan, jangga tayyorlangan talqini. Quvvati taxminan 250 ot kuchi, aerodinamikasi ancha sodda, lekin elektronika bu yerda ham yuqori darajada.
Tormoz tizimi ham chegarani aniq chizib beradi: Superbike’da po‘lat disklar ishlatilsa, MotoGP karbon disklarga tayanadi. Qiziq jihat – 2027-yildan Superbike’da karbon-keramik tormozlar joriy etiladi. Ya’ni seriya chempionati ham texnik jihatdan yuqoriga sakrash arafasida.
“Superbike ko‘proq harakat qiladi”
Oliveira farqni nafaqat raqamlarda, balki tanasida ham his qiladi.
MotoGP mototsikli ancha qattiq, shassisi bo‘sh joy qoldirmaydi. Superbike esa haydovchiga ko‘proq “tirik” texnika hissini beradi.
“Harakat asosan shinalardan keladi. Lekin haqiqat shuki, Superbike biroz ko‘proq ‘o‘ynaydi’. MotoGP’dan farqli ravishda, u boshqa yondashuvni talab qiladi”, deya tushuntiradi portugaliyalik.
Bitta burilishga kirish, tormoz nuqtasini topish, mototsiklni tiklash – hammasi boshqa ritmda, boshqa sezgi bilan bajariladi. Aynan shu murakkablik ko‘p haydovchilarni seriya chempionatiga tortadi: texnika o‘xshash, lekin yo‘l tutish uslubi butunlay boshqacha.
2027: ikki dunyo almashadigan yil
Oldinda esa texnik inqilob turibdi. 2027-yilga kelib MotoGP qoidalari tubdan o‘zgaradi: dvigatel hajmi 1000 kub santimetrdan 850 kub santimetrga qisqaradi, ride height moslama tizimlari butunlay taqiqlanadi, aerodinamika soddalashtiriladi. Eng katta burilishlardan biri – shinalar yetkazib beruvchisining almashtirilishi: Michelin o‘rnini Pirelli egallaydi.
Superbike’da esa manzara aksincha: aynan 2027-yildan Pirelli o‘rniga Michelin keladi. Ya’ni ikki dunyo o‘zaro shinalarni “almashadi”.
Michelin Superbike World Championship’ni 2027-yilgi mavsumoldi ilk testidan boshlab qamrab oladi. Bu sinov mavsum finalidan so‘ng, 22–23 oktyabr kunlari Jerezda o‘tkaziladi.
2026-yil iyun boshida MotorLand Aragón trekida Superbike yulduzlari fransuz shinalarini ilk bor sinab ko‘rish imkoniga ega bo‘lishdi. Ammo Oliveira bu safar chetda qoldi – jarohat uni trekdan uzoqroqda ushlab turdi.
“Men hali Michelin shinalarini sinab ko‘rmaganman – bunga imkon bo‘lmadi. Lekin ular bilan haydash albatta juda boshqacha bo‘ladi”, deydi u.
Oldinda yangi shinalar, yangi tormozlar, o‘zgarayotgan texnik qoidalar va yangi raqiblar. Savol bitta: uzoq yillar prototiplar olamida pishigan Miguel Oliveira seriyaviy jang maydonida ham o‘zini uyidagidek his qila oladimi?
