Messi jarimasi: Subaru Parkdagi asabiy tun
MLSning odatda sokin, oilaviy shanbalaridan biri bu safar boshqacha yakunlandi. Yulduzlar, bosim, oxirgi daqiqalardagi dramatika — va Lionel Messi uchun kutilmagan jarima.
39 yoshli Inter Miami yetakchisi Philadelphia Union bilan kechgan keskin o‘yinda raqib futbolchiga qo‘l ko‘targani uchun liga tomonidan jarimaga tortildi. Epizod o‘yinning eng asabiy pallalaridan birida, qo‘shimcha vaqtda yuz berdi.
Asablar chiday olmadi
Subaru Parkdagi uchrashuv 2:2 hisobida yakunlandi, lekin hisob varaqasi bu kechaning hikoyasini to‘liq aytib bera olmaydi. Oxirgi daqiqalarda maydonda keskinlik shunchalik oshdiki, hatto Messi ham o‘zini tiya olmadi.
Quinn Sullivan bilan bo‘lgan to‘qnashuv turning markaziga aylandi. Topni o‘ynab bo‘lgan Messi raqibining tirsagi bilan zarba yeganini his qildi va darhol javob qaytardi — Sullivan bosh orqa qismiga qo‘li bilan urib yubordi. Hakam zudlik bilan aralashdi, vaziyat nazoratdan chiqib ketishiga yo‘l qo‘ymadi, lekin kamera va intizomiy organlar bu holatni ko‘rmasdan o‘tmadi.
MLS Intizomiy qo‘mitasi rasmiy bayonotida shunday yozildi: Inter Miami hujumchisi Lionel Messi raqib futbolchining yuziga/boshiga/bo‘yniga qo‘l tekkizish bo‘yicha liga siyosatini buzgani uchun noma’lum miqdorda jarimaga tortildi. Epizod 19-avgust kuni Philadelphia Unionga qarshi o‘yinning 101-daqiqasidan keyingi daqiqalarda qayd etilgan.
Qizil kartochkalar, to‘qnashuvlar va keskin yakun
Bu faqat bitta epizod emasdi. O‘yin ohiriga kelib butunlay taranglashdi. To‘qnashuvlar, keskin bahslar, asablar — hammasi bir nuqtada portlashi tayin edi.
Uzoq cho‘zilgan qo‘shimcha daqiqalarda ikkita qizil kartochka uchrashuvning kayfiyatini aniq ifodalab berdi. Inter Miami futbolchisi Yannick Bright va Philadelphia Union vakili Cavan Sullivan maydondan haydaldi. Ikkalasi ham hakamning qat’iy qaroridan qutulib qola olmadi.
Miami himoyachisi Ian Fray ham Quinn Sullivan bilan bo‘lgan alohida to‘qnashuvi uchun MLS tomonidan jarimaga tortildi. Demak, bu kecha faqat natija bilan emas, intizomiy choralari bilan ham esda qoladigan bo‘ldi.
Turnir jadvali va bosim
Shu shov-shuvli kechadan so‘ng ham Inter Miami sharqiy konferensiyada yuqori pog‘onada qolmoqda. Jamoa hozircha ikkinchi o‘rinda, peshqadam Nashville’dan yetti ochkoga ortda.
Demak, har bir o‘yin, har bir epizod, har bir hissiyot endi yanada qimmatga tushadi. Ayniqsa Messi uchun. Uning har bir harakati, har bir reaktsiyasi nafaqat muxlislar, balki liga ko‘z o‘ngida ham lupa ostida.
Savol esa oddiy: bu kichik, lekin ramziy jarima — tajribali yulduz va asabiylashayotgan Inter Miami uchun ogohlantiruvmi yoki faqatgina keskin kechgan bir tunning yon mahsulotimi?
