Martin Sherif: Everton hujumchisi garov qoidalarini buzishda ayblandi
Angliya futbolida yana bir garov mojarosi. Bu safar markazda – 20 yoshli, istiqbolli hujumchi Martin Sherif.
Angliya Futbol Assotsiatsiyasi (FA) Everton klubi futbolchisini 15 oy davomida garov qoidalarini buzganlikda ayblab, rasmiy tarzda ish qo‘zg‘atdi. Tergov markazida aniq raqamlar turibdi: 2024-yil 20-noyabrdan 2026-yil 12-fevralgacha bo‘lgan davrda 61 ta o‘yin bo‘yicha garov tikilgani iddao qilinmoqda.
FA bayonotida qisqa, lekin keskin jumla yozildi: Martin Sherif FAning garovga oid E1.2-qoidasini buzganlikda ayblanmoqda. Bu modda futbolchilar, murabbiylar va boshqa ishtirokchilarga futbol uchrashuvlariga garov qo‘yishni qat’iyan man etadi.
Sherifka 17-avgust, dushanbagacha rasmiy javob berish muddati belgilandi. Endi u yoki ayblovlarni tan oladi, yoki o‘zini himoya qilish uchun dalillar keltiradi. Har ikki yo‘l ham uning kelajagini keskin o‘zgartirishi mumkin.
Liberiyadan Liverpulga: tez ko‘tarilgan, tez to‘xtatilgan yo‘l
Liberiyada tug‘ilgan hujumchi 2019-yilda Everton akademiyasiga kelganida, u haqida “kelajak yulduzi” deya gapirishgan. Tezligi, tana kurashlaridagi qat’iyligi va pressingdagi mehnatkashligi bilan yoshlar jamoalarida tez ajralib turgan Sherif 2025-yil boshida birinchi jamoa bilan mashg‘ulotlarni boshladi. Bu o‘zi orzu qilgan eshiklarning ochilayotgandek ko‘ringan lahzasi edi.
Keyin esa karerasini tezlashtirish uchun tanish yo‘l tanlandi – ijaraga ketish.
O‘tgan yozda u League One vakili Rotherham United safiga ijaraga berildi. U yerda Sherif 10 o‘yinda maydonga tushib, 2 ta gol urdi. U hali ham xom, lekin xavfli hujumchi sifatida ko‘rinish bera boshlagan payt edi. Ammo jarohatlar seriyasi hammasini to‘xtatib qo‘ydi. Everton uni dekabr oyida qaytarib oldi – reabilitatsiya, tiklanish, keyingi qadamni o‘ylash uchun.
Fevralda yana yangi sahifa ochildi: bu safar Port Vale. Yana League One, yana o‘zini ko‘rsatish imkoniyati. Sherif mavsumning qolgan qismida 17 o‘yinda maydonga tushib, yana 2 ta gol kiritdi. Biroq klub baribir chekinish chizig‘idan chiqolmay, ligadan tushib ketdi. Shaxsiy statistika yomon emas, lekin umumiy fon – og‘ir.
Endi esa bu raqamlar va o‘yinlar ustiga yangi, ancha xavfli raqam qo‘shildi: 61 ta garov.
Karyera burilish nuqtasida
FAning bunday ishlar bo‘yicha amaliyoti qat’iy. So‘nggi yillarda yuqori darajadagi bir nechta futbolchi garov qoidalarini buzganlik uchun uzoq muddatga diskvalifikatsiya qilingan. Shuning uchun Sherif ishi ham shunchaki ogohlantirish bilan tugashi ehtimoli juda past.
Hozircha faqat bitta narsa aniq: 20 yoshli hujumchining karyerasi burilish nuqtasiga kelib qoldi. Everton uni bir paytlar kelajak rejasining bir bo‘lagi sifatida ko‘rgan edi. Endi esa klub va futbolchi FA qarorini kutishga majbur.
Savol shunday: Martin Sherif bu bo‘hrondan chiqib, o‘zini maydonda qayta isbotlay oladimi yoki uning nomi Angliya futbolidagi navbatdagi garov mojarosi sifatida eslab qoladimi?
