Mark van Bommel Belgiya terma jamoasi bosh murabbiyi sifatida
Belgiya terma jamoasi boshida endi Mark van Bommel turibdi. Jahon chempionati chorak finaligacha yetib borgan safar ortda qoldi, endi esa yangi davr boshlanmoqda.
Van Bommel – maydondagi jangchidan milliy terma murabbiyligigacha
Niderlandiya sobiq yarim himoyachisi nomi Yevropa futboliga yaxshi tanish. U o‘yinchi sifatida Barcelona, Bayern Munich, AC Milan kabi yirik klublar sharafini himoya qilgan, 2010-yilgi Jahon chempionati finaliga chiqqan Niderlandiya terma jamoasining markazida turgan edi. O‘sha finalda Ispaniyaga yutqazilgan bo‘lsa-da, Van Bommelning xarakteri va tajribasi butun dunyoga ko‘rinib bo‘lgandi.
Endi u shu qat’iyatni Belgiya terma jamoasiga olib kirishi kerak.
U Rudi Garcia o‘rnini egalladi. Garcia shartnomasi 31-iyul kuni yakunlanishi ma’lum bo‘lgach, federatsiya ko‘p kutmadi va qarorni tezda e’lon qildi.
Belgiyaning yangi yo‘li
Van Bommel ilk bayonotidanoq ohangni aniq belgilab berdi. Uning fikricha, bu avlod hali ham juda katta imkoniyatlarga ega.
“Belgiya ajoyib futbolchilarga va ulkan salohiyatga ega. Murabbiylar shtabim bilan birga intizomli, maqsadga intiluvchan va eng kuchlilar bilan raqobat qilishdan qo‘rqmaydigan jamoa qurmoqchimiz”, – dedi u.
So‘zlarida shunchaki odatiy diplomatiya emas, o‘ziga xos ishonch seziladi. Sababi bor: Van Bommel Belgiya futbolini ichidan biladi.
2023-yilda u Royal Antwerp FC bilan tarixiy dublga erishdi – chempionat va kubokni yutdi. Bu klub uchun 1957-yildan beri ilk liga chempionligi edi. Belgiyadagi bu muvaffaqiyat uning murabbiy sifatidagi obro‘sini keskin oshirdi va hozirgi tayinlovga yo‘l ochdi.
“G‘alaba hech qachon kafolatlanmaydi, lekin mehnat, halollik va fidoyilik – ha. Biz har kuni bu jamoani yaxshilash va Belgiya xalqini faxrlantirish uchun bor kuchimizni beramiz”, – dedi Van Bommel.
Kuchli shtab va ichki raqobat
Yangi bosh murabbiy yolg‘iz kelmadi. Uning yordamchilari sifatida Boudewijn Zenden, Maarten Martens va Reinier Robbemond tayinlandi. Har biri o‘z vaqtida yuqori saviyadagi futbolchi bo‘lgan, murabbiylikda ham tajribaga ega.
Bu uchlik Van Bommel bilan birga Belgiya terma jamoasiga xalqaro maydonda sinovdan o‘tgan qarash va uslubni olib kiradi. Belgiyaning “oltin avlod”i sekin-asta sahnadan ketayotgan bir paytda, yangi tuzilayotgan jamoa uchun bunday kombinatsiya ayni muddao.
Belgiya futbol federatsiyasi sport direktori Vincent Mannaert ham aynan shuni urg‘uladi. U Van Bommel va uning shtabini yuqori motivatsiyaga ega, tajribali va natija uchun kurashishga tayyor murabbiylar sifatida ta’rifladi, ularning xalqaro tajribasi “Red Devils” tarkibini ham individual, ham jamoaviy darajada yangi bosqichga olib chiqishiga ishonch bildirdi.
Savol endi bitta: bu avlodni oxirigacha yetaklay oladimi?
Belgiya so‘nggi yillarda ko‘p marotaba favorit sifatida yirik turnirlarga borgan, ammo asosiy sovrinni olib keta olmagan. Endi rulda – maydonda hech qachon yon bermagan, murabbiy sifatida esa Belgiya chempionatini zabt etgan Mark van Bommel.
Unga ishonch katta. Bosim ham shuncha.
Savol shunday: u bu terma jamoani nihoyat orzu qilingan cho‘qqiga olib chiqadimi yoki bu ham navbatdagi o‘tish davri bo‘lib qoladimi?
