Manchester United yozgi transfer bozorida qanday qaror qabul qiladi?
"Old Trafford" atrofida kayfiyat g‘alati. Tribunadagi muxlislar bir narsani yaxshi bilishadi: klub yillar davomida transfer bozorida millionlarni havoga sovurdi. Endi esa tejamkorlikka boshqacha qarashadi. Lekin shu bilan birga, ularni bitta savol qiynayapti: Michael Carrick to‘rt frontda kurashish uchun yetarlicha sifatga egami?
2025-26 mavsumidagi kutilmagan uchinchi o‘rin, "Champions League"ga qaytish, hammani bitta narsaga ishontirgandi – yozda "United" katta pul sarflaydi. Hozircha esa – mutlaq sokinlik. Hech bir bitim rasman yopilmagan. Atalanta"dan Ederson uchun 35 million funtlik kelishuv yakuniga yetmay turibdi: braziliyalik futbolchi "World Cup"da yurtini himoya qilayotgani bois jarayon cho‘zildi. Klub ichkarisida bu transfer deyarli rasmiy deb qaraladi, ammo tribunada sabr tugayapti: Elliot Anderson allaqachon "Manchester City"ga ketdi, Fernandes va Tonali esa "Spurs"ga qo‘shildi.
Shu fon’da savol yanada keskinlashadi: endi "United" nima qilishi kerak?
Ugarte jarohati va bo‘sh qolgan markaz
Bugungi bozor markaziy yarim himoyachilarni aqldan ozdiradigan narxda baholayapti. To‘p bilan ham, to‘psiz ham o‘yin boshqaradigan futbolchini topish oson emas. Carrick uchun esa bu pozitsiya hayot-mamot masalasiga aylanib ulgurgan: "World Cup"da Manuel Ugarte olgan og‘ir jarohat "United"ning rejasini chilparchin qildi.
Shunga qaramay, variantlar butunlay tugab qolganicha yo‘q. Bozor hanuzda imkoniyat taklif qilmoqda – faqat to‘g‘ri nomni tanlash kerak.
Quyida transfer bozorida hanuz mavjud bo‘lgan eng jiddiy yetti variantdan ayrimlari.
Ayyoub Bouaddi – avlod iste’dodimi yoki haddan tashqari xatar?
"Lille" safida ham e’tibor markazida bo‘lgan Ayyoub Bouaddi "World Cup"ni portlash bilan boshladi. Atigi 18 yosh. Lekin Marokash safida Braziliyaga qarshi ochilish o‘yinidagi sovuqqon, yetuk o‘yinidan keyin u haqda butun futbol olami gapira boshladi.
"United"ga aynan shunday futbolchi kerak: to‘pni o‘zi olib chiqadigan, raqibdan tortib oladigan, pressing ostida ham boshini yo‘qotmaydigan yarim himoyachi. Shuning uchun ham Bouaddi nomi darhol "Old Trafford" bilan bog‘landi. Lekin u bilan bir qatorda deyarli har bir yirik yevropalik grand ham navbatda turibdi.
Yana bir nozik jihat bor: klub allaqachon Ederson uchun katta mablag‘ tikkan paytda, "United" Bouaddi uchun ham katta summa to‘lashga tayyormi? Savol ochiq qolmoqda. Bitta narsa aniq – bu yigit avlod darajasidagi iste’dodga o‘xshaydi va bozor buni biladi.
Sander Berge – arzon, ammo foydali yechim
Kutilmagan, lekin mantiqli yo‘l. Sander Berge yillar davomida Angliyaning top jamoalariga o‘tishi mumkin bo‘lgan futbolchi sifatida tilga olinib keldi. "Sheffield United"dagi ishlari, keyin bir yillik "Burnley" davri va nihoyat 2024 yilda "Fulham"ga ko‘chishi – hammasi unga boshqa darajaga chiqish eshigini ochayotgandek ko‘ringan, ammo bu eshik hech qachon oxirigacha ochilmadi.
Endi u yana sahnada. "World Cup"dagi ishonchli o‘yinlari fonida "United"ning unga bo‘lgan qiziqishi yana jonlandi. Desperatsiya? Balki. Lekin bu yomon g‘oya emas.
28 yoshli norvegiyalik jismonan kuchli, to‘pni bosim ostida ushlab tura oladi, jarima maydoni atrofida ham, chuqurda ham foydali. Eng muhimi – u "United" hozir egallab turgan profillardan butunlay boshqacha. Va u uchun talab qilinadigan to‘lov ham bozor sharoitiga nisbatan ancha oqilona bo‘ladi.
Carlos Baleba – 100 millionlik savol
Jason Wilcox bir narsaga ishongan: Carlos Baleba "Premier League"dagi eng yaxshi markaziy yarim himoyachilardan biriga aylanishi mumkin. O‘tgan yozda "United" uni qo‘lga kiritish uchun jiddiy harakat qildi, lekin "Brighton" qo‘ymadi – 100 million funtlik narx belgilandi va klub bu chiziqdan o‘tmadi.
Eng qizig‘i shundaki, "Seagulls" hozir ham bu narxdan qaytmayapti. Holbuki, Baleba 2025-26 mavsumida hech ham portlovchi darajada o‘ynagani yo‘q, ko‘proq "potensial" haqida gap ketmoqda. 22 yoshli kamerunlik dinamik, agressiv, pressingda faol – "United" markazi uchun juda foydali bo‘lishi mumkin.
Ammo bitta katta "lekin" bor: hali o‘zini to‘liq isbotlamagan futbolchi uchun 100 million funt to‘lash – yangi sport rahbariyati qurayotgan tejamkor modelga butunlay zid. Talant bor, lekin narx chindan ham haddan tashqari yuqori.
Alex Scott – narxi haddan oshgan ingliz yulduzchasi?
Alex Scott asta-sekin, lekin qat’iy qadamlar bilan yuqoriga ko‘tarildi. "Bournemouth"ning tarixiy muvaffaqiyati – "Premier League"da oltinchi o‘rin va ilk bor Yevropa maydoniga chiqishida u markazdagi asosiy tayanch bo‘ldi.
Ko‘plab mutaxassislar uni bu yozgi "World Cup" uchun Angliya tarkibiga kiritilmagani adolatsizlik deb baholadi. Shu bilan birga, Andoni Iraola "Anfield"ga ketganidan beri Scott nomi uzluksiz tarzda "Liverpool" bilan bog‘lanib kelmoqda.
"United" ham bu poygada. 22 yoshli yarim himoyachi o‘tgan mavsumda chuqur pozitsiyadan turib 4 ta gol urdi, 2 ta golli uzatma berdi. Hisob-kitob oddiy: yosh, ingliz, texnik jihatdan yetuk, taktika bo‘yicha tez o‘sayotgan futbolchi.
"Bournemouth" esa ochiq gapirmoqda: sotish mumkin, lekin faqat "to‘g‘ri narx" evaziga. Ichkaridan kelayotgan xabarlar esa shunday deydi – 70 million funtdan kamiga ular stolga o‘tirmaydi. "United" uchun bu murakkab tanlov: u bu pulga arziydimi? Yoki bu yana bir ortiqcha to‘lov bo‘lib qoladimi?
Andrey Santos – realistik variantmi yoki xavfli lotereya?
Hafta oxirida paydo bo‘lgan yangiliklardan biri: Andrey Santos ham "United" ro‘yxatida. Klubning onlayn muxlislari orasidagi reaksiya esa ancha sovuq bo‘ldi.
Braziliyalik yarim himoyachi 2021 yilda atigi 16 yoshida "Vasco da Gama" safida debyut qilganida uni kelajakdagi "Seleção" yulduzi sifatida ko‘rishgan. Ammo hozirgi manzara boshqacha: Carlo Ancelotti uni "World Cup" tarkibiga ham kiritmadi – bu esa Braziliya markazida dinamika yetishmayotgan bir paytda yanada ajablanarli ko‘rinadi.
U 2023 yildan beri "Chelsea"ga tegishli, lekin faqat o‘tgan mavsumda, Liam Rosenior qo‘l ostida, jiddiy o‘yin amaliyoti ola boshladi. Shuning uchun "United" muxlislari bu nomni ko‘rib, hayajondan sakrab tushgani yo‘q – u hali yuqori darajada o‘zini to‘liq ko‘rsatgani yo‘q.
Shunga qaramay, unda futbolchi bor. Enzo Maresca ham uni chuqur markaziy rolga mos keladigan, to‘pni pastdan olib chiqadigan o‘yinchi sifatida ko‘rgan edi. Eng muhim jihat – u ro‘yxatdagi eng realistik transfer bo‘lishi mumkin. "Chelsea" Santosni sotishga ochiq, bu esa muzokaralarda "United"ga kuchli pozitsiya beradi.
Shu omilning o‘ziyoq uni yaqin haftalarda "Old Trafford"ga kelishi ehtimoli eng yuqori bo‘lgan nomga aylantiryapti.
"United"ning hozirgi bosh og‘rig‘i oddiy: avlod iste’dodiga katta pul tikishmi, xavfsiz, ammo kamroq shov-shuvli variantni tanlashmi yoki bozor bosimiga dosh berib, umuman boshqa yo‘l izlashmi?
Yoz qisqa. "Champions League" qaytgan, ambitsiyalar kattalashgan, markaz esa hanuzda savollar bilan to‘la. Endi Carrick va rahbariyat qaysi ismni tanlaydi – va bu tanlov "Old Trafford"dagi yangi davrni boshlab beradimi?
