Manchester United ayollar jamoasi: ichkariga kirish uchun kurashmoqda
Manchester United ayollar jamoasi o‘tgan mavsumda Champions League chorak finaligacha yetib bordi, yevropalik grandlar bilan bemalol olishdi. Lekin yakunda – Yevropa yo‘q, liga jadvalida pastroq pog‘ona, chiptasiz qolgan klub. Jamoaning hozirgi holatini bundan aniqroq tasvirlab berish qiyin: eng yuqori sahnaga juda yaqin, ba’zan teng kurashishga qodir, ammo u yerda qolib ketish, yanada yuqoriga sakrash uchun zarur bo‘lgan barqarorlik yetishmaydi.
Bunga hayron bo‘lish ham qiyin. Manchester United ayollar jamoasi atigi sakkiz yil avval qayta tashkil etilgan. City, Arsenal va Chelsea esa bu maydonda ancha yillardan beri o‘tiribdi, infratuzilma, tizim, akademiya, transfer tarmog‘i – hammasi ildiz otgan. United bu vaqt ichida yo‘l bosdi: Champions League yo‘llanmasi, uchta final, FA Cupdagi ilk katta sovrin. Lekin baribir masofa katta. Raqiblar poyezdi allaqachon tezlik olgan, United esa hali ham relslarni tekislab yuribdi.
Katta sakrashlar – maydonda ham, maydondan tashqarida ham – shart edi. Raqiblar ham aynan shuni qilayotgan bir paytda bu yanada murakkab bo‘ladi. Hozircha United qilgan ishlar yetmayapti.
Kenglik yetishmaydigan tarkib
Eng og‘riqli nuqta – tarkib chuqurligi. Ayniqsa o‘tgan mavsumda, klub Champions League bilan birga to‘rt frontda kurashganida bu juda yaqqol ko‘rindi. O‘rinbosarlar skameykasi qisqa bo‘lsa, marafonda nafas yetmaydi. Bu yozda bu muammo keskin hal qilinishi kerak. O‘tgan yil bu qilinganicha yo‘q.
Transfer siyosati butunlay noto‘g‘ri ham emas aslida. O‘tgan yozga nazar tashlasak, Julia Zigiotti Olme va Jess Park – sof omadli bitimlar. Lekin muammo shunda ediki, ular atigi uch nafar yangi futbolchi orasida edi. Marc Skinner jamoasi to‘rt turnirda kurashishga hozirlanayotgan paytda bu mutlaqo yetarli bo‘lishi mumkin emasdi – shunday bo‘lib chiqdi ham, qishki oynadagi harakatlarga qaramay.
Yozgi oynaning hozirgacha bo‘lgan qismi esa vaziyat o‘zgarishidan darak bermayapti. Shu orada raqiblar esa ishni allaqachon boshlab yuborgan.
Raqiblar tezlikni oshiryapti
City mavsumni WSL va FA Cup bilan yakunlab, bozor juda shovqinli bo‘lmaydi, deb ogohlantirgandi. Baribir ular ishini qildi: Mead – katta o‘yinlar tajribasiga ega, sovrin ko‘rgan hujumchi; Charles – chap qanot himoyasidagi bo‘shliqni to‘ldiradigan Angliya terma jamoasi futbolchisi. Eng muhimi, Khadija Shaw klubda qoldi, WSL Golden Boot sohibasi bilan yangi shartnoma imzolandi.
Arsenal esa yetti yillik WSL chempionlik tanaffusiga nuqta qo‘yish niyatida juda tajovuzkor bo‘lib harakat qilmoqda. Ikki haftalik oraliqda Stanway, Ona Batlle, Selina Cerci, Geraldine Reuteler va Lisa Baum e’lon qilindi. Barcelona bilan shartnomasi tugagan Salma Paralluelo bo‘yicha qiziqish esa davom etmoqda. Bunday yoz – jamoani WSL tepasiga olib chiqadigan turdagi ish.
Chelsea uchun oyning o‘zi ideal ketmayapti, lekin u yerda ham sifatli ish bor. Shaw, keyin Paralluelo, so‘ng Felicia Schroderni olish urinishlari samarasiz yakunlandi, lekin klub Katie McCabe bilan shartnoma tuzdi va NWSLda o‘tgan yilning eng yorqin futbolchilaridan biri bo‘lgan, atigi 21 yoshli Matsukubo bilan tarkibni kuchaytirdi. Centre forward izlanishi ham yakuniga yetgandek: Vrouwen Voetbal Nieuws xabariga ko‘ra, Paris Saint-Germain hujumchisi Romee Leuchter yo‘lda.
United-ning yozgi sukunati
United-chi? Hozircha yagona yangilik – Andrea Medina. 22 yoshli, markaziy himoyachi ham, chap qanot himoyachisi ham bo‘la oladigan iqtidor. Juda yaxshi transfer, ayniqsa chuqurlik masalasini hisobga olsak. Lekin hozircha faqat u xolos.
Yana bir muhim jihat – mish-mishlar ham kam. Red Devils bo‘yicha asosiy transfer xabarlari kirib kelayotgan futbolchilar emas, ketishi mumkin bo‘lganlar haqida. Dushanba kuni Melvine Malard Chelsea bilan kelishuvga juda yaqin ekani keng yoritildi. The Athletic ma’lumotiga ko‘ra, klub o‘tgan mavsumning eng ko‘p gol urgani Elisabeth Terlandni ham sotishga ochiq, agar kerakli narxdagi taklif tushsa. Aks holda Norvegiya hujumchisi kelasi yozda erkin agent sifatida ketib qolishi mumkin.
Terland noyabrda yangi shartnomani rad etgan edi. U kelasi yil shartnomasi tugaydigan yagona yulduz emas. Ella Toone ham shartnomasining so‘nggi yiliga kirdi. O‘tgan oy kelajagi haqida so‘ralganda, Angliya yarim himoyachisi aniq javob bermadi.
“Endi gaplashadigan payt keldi, – dedi Toone. – Men uchun eng to‘g‘ri qarorni qabul qilishim kerakligini bilaman”.
Faqat tepaga emas, orqaga ham qarash kerak
United faqat City, Arsenal va Chelsea bilan masofani qisqartirish haqida o‘ylab o‘tira olmaydi. Orqaga qarash va o‘rtamiyonalar klasterida nimalar bo‘layotganini ham ko‘rish zarur. Chunki u yerda ham tezlik oshgan.
London City Lionesses – eng yaqqol xavf. Klub egasi – milliarder Michele Kang, u Trinity Rodman o‘ynaydigan Washington Spirit va sakkiz karra Yevropa chempioni Lyonga ham egalik qiladi. Bu yozning eng shov-shuvli transferi aynan shu yerda – ikki karra Ballon d’Or sohibasi Putellas Angliyaga keldi. To‘rt karra Champions League g‘olibi Mapi Leon, sobiq Lionesses yulduzi Mary Earps va Germaniya terma jamoasi hujumchisi, sermahsul Nicole Anyomi ham klubga qo‘shildi.
Xavf faqat ularda emas. Tottenham o‘tgan mavsumda Uniteddan atigi bir o‘rin va to‘rt ochkoga ortda qolgan, o‘zaro uchrashuvlarda esa ikkala o‘yinni durang o‘tkazgan edi. Hozir ular yozgi oynani juda faol boshladi – allaqachon besh yangi futbolchi. Ular orasida Shekiera Martinez bor, u quyi qismda qolib ketgan West Ham safida 32 liga o‘yinida 16 gol urdi. Kirsty Hanson – o‘tgan mavsum WSLda faqat Shaw va Russo undan ko‘proq gol urgan. Darvozabon Selma Panengstuen esa xabarlarga ko‘ra, Arsenal va PSG takliflariga qaramay, Spursni tanlagan.
Brighton ham bo‘sh kelmayapti. O‘tgan mavsumda FA Cup finaligacha yetib borgan jamoa endi o‘sha muvaffaqiyatni liga natijalariga ko‘chirmoqchi. Klub sobiq Arsenal yarim himoyachisi Lia Walti bilan shartnoma imzoladi – juda sifatli bitim.
Klub oldida turgan oyning og‘irligi
Endi savol: United qanday javob qaytaradi?
O‘tgan yozda ayollar futbolida transferlar moliyaviy rekordlarni yangilayotganda, bosh murabbiy Skinner klub Olivia Smithni Arsenalga, Grace Geyoroni London Cityga olib borgan yetti xonali summalar bilan raqobatlasha olmasligini ochiq tan olgandi.
“Real holat shuki, biz o‘z yo‘limizni topishimiz kerak”, – degan edi u. United bu cheklovlarga qaramay, ma’lum ishlarni qildi, lekin to‘rt frontda haqiqiy raqobatbardosh tarkib tuzish uchun bu yetmadi.
Bu safar to‘rt front bo‘lmaydi. Champions League yo‘q. Klub aynan shundan foydalanmoqchi: City o‘tgan mavsumda yevropasiz qolib, WSLdagi o‘n yillik tanaffusdan keyin yana chempion bo‘ldi. United ham o‘xshash ssenariyni umid qilmoqda.
Qishda kelgan futbolchilardan ham ko‘proq narsa kutiladi. Ular endi yangi mavsumni moslashib, tanish muhitda boshlaydi. Ayniqsa, Bayern Munichdan juda zo‘r gol statistikasi bilan kelgan, lekin ilk 18 o‘yinida atigi ikki marta to‘p kiritgan Lea Schuller uchun bu mavsum hal qiluvchi bo‘lishi mumkin.
Lekin bu jamoa hali ham jiddiy kuchaytirishga muhtoj. Gap faqat City, Arsenal va Chelsea bilan olishish haqida emas, balki pastroqda joylashgan, lekin juda tez o‘sayotgan raqiblar bilan ham. Bu yozgi oyna klub uchun ulkan sinov. Sokin start – muvaffaqiyatsiz yakun bo‘ladi, degani emas, lekin o‘tgan mavsumning achchiq saboqlaridan keyin muxlislar kutgan javob hozircha ko‘rinmayapti.
Manchester United ayollar jamoasi eshik oldida turibdi. Savol shuki, bu yozda ularni nihoyat ichkariga olib kiradigan qarorlar qabul qilinadimi – yoki yana bir mavsum ostonada qolish bilan yakunlanadimi?
