Man Utd yozgi rejani o‘zgartirmoqda: chap qanot himoyasiga e'tibor
Manchester United yozgi transfer oynasida uchinchi yarim himoyachini olib kelish rejalarini muzlatib qo‘yishi va butun e’tiborini chap qanot himoyasini kuchaytirishga qaratishi mumkin. Bu – ichkaridan chiqayotgan ishonchli ma’lumot.
Yoz boshida hamma narsa aniq edi: INEOS davridagi ilk to‘liq transfer oynasida asosiy vazifa – yarim himoyani qayta qurish. Klub Elliot Anderson va Mateus Fernandes bo‘yicha urinishlardan so‘ng Atalanta bilan Ederson uchun 38 million funtlik kelishuvga erishdi. Hammasi tayyor edi, biroq tibbiy ko‘rik hammasini ag‘dar-to‘ntar qilib yubordi – Ederson tibbiy tekshiruvdan o‘ta olmadi va bitim bekor qilindi.
Shundan keyin Manchester United ortga chekinmadi. Klub Chelsea bilan kelishib, 50 million funt evaziga braziliyalik Andrey Santosni olib keldi, so‘ng Aston Villa bilan shartnomadagi bandni ishga tushirib, Youri Tielemans uchun 35 million funt to‘ladi. Yangi markaziy blok shakllanayotgandek ko‘rindi.
Uchinchi yarim himoyachi o‘rniga Mason Mount?
Reja bo‘yicha, bu bilan to‘xtab qolishmasdi. Klub uchinchi yarim himoyachi ustida ishlashni davom ettirdi: Roma futbolchisi Manu Kone, Brighton a’zosi Carlos Baleba nomzod sifatida ko‘rib chiqildi, Old Trafford rahbariyati esa Aurelien Tchouameni kabi yulduzni Real Madriddan olib kelish orzusidan ham voz kechgani yo‘q.
Ammo hozircha hech biri bilan kelishuv yo‘q. Byudjet cheksiz emas. Shu sabab ham taxtadagi figura o‘zgarishi mumkin.
The Athletic nashrining Manchester United bo‘yicha muxbiri Laurie Whitwell xabariga ko‘ra, Michael Carrick yangi mavsumda to‘rtinchi yarim himoyachi sifatida Mason Mountga tayansa bo‘ladi. Santos, Tielemans va Kobbie Mainoo bilan bir qatorda.
Mount yozgi o‘rtoqlik uchrashuvlarida chuqurroq, markaziy rolda o‘ynab, murabbiy shtabini ishontira boshladi. Uning Manchester Unitedga kelganidan beri jarohatlar bilan qiynalayotgani rahbariyatni hushyor tutmoqda, ammo sog‘lom bo‘lsa, Carrick rejalarida muhim qurolga aylanishi mumkinligi aniq sezilmoqda.
Shu nuqtada savol paydo bo‘ladi: uchinchi yarim himoyachiga pul sarflash shartmi? Klub ichkarisida javob tobora “yo‘q” tomonga og‘moqda.
E’tibor – chap qanot himoyasiga: Lewis Hall markazda
Whitwell ma’lumotiga ko‘ra, klub endi resurslarni boshqa chiziqqa yo‘naltirishni jiddiy ko‘rib chiqmoqda. Gap chap qanot himoyasi haqida ketmoqda. Nom esa aniq: Lewis Hall.
Manchester United shtabida Hall juda yuqori baholanadi. Uning texnikasi, pressing ostida to‘p bilan chiqib ketish qobiliyati va yoshiga qaramay sovuqqonligi Old Trafforddagi qaror qabul qiluvchilarni o‘ziga tortmoqda. Biroq bu transfer oddiy bo‘lmaydi.
Newcastle United ichki doiralarda Hall sotilmasligini qat’iy ta’kidlamoqda. Klub allaqachon Anthony Gordon va Sandro Tonali bilan xayrlashdi, Bruno Guimaraes esa Arsenal bilan muzokaralarda. Shunday sharoitda yana bir asosiy aktivni qo‘yib yuborish – sport nuqtayi nazaridan ham, siyosiy jihatdan ham juda xavfli qaror.
Ammo Newcastle bu yozda “sotmaymiz” degan ikki ism – Alexander Isak va Tonali – baribir klubni tark etdi. So‘zlar va bozor bosimi o‘rtasida farq borligini bu yoz ayniqsa yaqqol ko‘rsatdi.
Hallning o‘zi ham ikkilanmoqda
Lewis Hallning o‘zi ham klub kelajagi borasida o‘ylab qolgan. Eddie Howe iste’fosidan so‘ng Newcastle loyihasi atrofida savollar ko‘paydi va aynan shu noaniqlik futbolchini ketish fikriga yaqinlashtirayotgani aytilmoqda.
O‘tgan hafta Manchester United Hall bo‘yicha ilk rasmiy qadamni tashlashga, Newcastlega katta boshlang‘ich taklif yuborishga hozirlanayotgani oshkor bo‘lgandi. Bu jarayonni klubning futbol bo‘yicha direktori Jason Wilcox shaxsan boshqaryapti. Bu – transfer oddiy imkoniyat emas, balki strategik maqsad ekanini ko‘rsatib turibdi.
Hallga bo‘lgan qiziqish esa faqat Old Trafford bilan cheklanmaydi. Uning sobiq klubi Chelsea ham yosh ingliz futbolchisini qaytarib olish fikrida. Lekin hozircha poygada oldingi qatorda turgan aynan Manchester United.
Endi asosiy savol: Carrick va INEOS uchinchi yarim himoyachidan voz kechib, chap qanot himoyasini Hall bilan ishonib topshiradimi yoki bozor bosimi ularni yana markazga qaytaradimi? Yozgi oynaning qolgan qismida Manchester Unitedning butun mavsum taqdirini belgilab qo‘yishi mumkin bo‘lgan aynan shu qaror pishib yetilyapti.
