Man Utd va Tchouameni: orzu bor, ammo narx osmonida
Manchester United yozgi rejalari markaziga yana bir bor yarim himoyani qo‘ydi. Michael Carrick qo‘l ostida klubning ohangi o‘zgardi, kayfiyat ham. Endi esa navbat keyngi bosqichga – chempionlikka haqiqiy da’vogarlik va Champions League maydoniga qaytishga.
Buning uchun esa o‘rtadagi chiziqni yanada mustahkamlash shart.
Andrey Santos va Youri Tielemans allaqachon kelib bo‘ldi, lekin reja – uchinchi markaziy yarim himoyachi, bu safar aniqroq himoyaviy profildagi futbolchini olib kelish. Klub shoshilmayapti, bozordagi vaziyatni sinchiklab kuzatyapti, raqiblarning harakatini ham hisobga olyapti.
Shu fon’da eski orzu yana kun tartibiga qaytdi: Real Madrid yulduzi Aurelien Tchouameni.
Real Madrid pul topishi kerak – lekin qanchaga?
Yillar davomida Tchouameni Old Trafford uchun “orzu transfer” sifatida tilga olinib keladi. Biroq Real Madrid uchun uning qadri hamisha shunchaki yuqori emas, balki deyarli “tegish mumkin emas” darajasida bo‘lgan.
Bernabeu’da shartnoma uzaytirilishi haqida xabarlar chiqqanida, bu eshik yana yopilgandek ko‘ringan edi. Ammo Madrid yozda Manchester City yulduzi Rodri’ni olib kelishni ko‘zlayotgani haqidagi ma’lumotlar tarqalishi bilan savol qayta paydo bo‘ldi: Los Blancos katta transfer qilish uchun katta sotuvga ham tayyormi?
Gap shundaki, Real katta xaridlar qilmoqchi bo‘lsa, katta daromad ham kerak bo‘ladi.
“Talk of the Devils” podkastida so‘zlagan jurnalist Andy Mitten manzara qanchalik murakkabligini ochiq aytib berdi. Uning ma’lumotlariga ko‘ra, Real Madrid aynan shu yozda “katta sotuv”ga majbur bo‘lishi mumkin, lekin bu, albatta, arzon bo‘lmaydi.
Mittenning ta’kidlashicha, Madrid atrofida aylanayotgan Premier League pullariga qarab, “biz ham shundan bir parcha olamiz” degan fikr shakllanayotgan bo‘lishi mumkin. Bu esa Tchouameni uchun narxni mantiq chegarasidan chiqarib yuborishi ehtimolini oshiradi.
Uning so‘zlariga ko‘ra, Manchester United uzoq yillardan beri fransiyalikni kuzatib keladi va uni juda yuqori baholaydi, ammo “ahmoqona darajadagi” summa to‘lashga borish – hozirgi klub siyosatida qiyin qaror. Ustiga ustak, Tchouameni maoshi ham hisobga olinishi kerak.
Bir muhim nuqta bor: Tchouameni Madridda baxtli. Bu bir necha bor ta’kidlangan. Shunga qaramay, futbol olamida vaziyat bir lahzada o‘zgarishi mumkin – ayniqsa, klub balansni saqlash uchun kimnidir sotishga majbur bo‘lsa.
Ichkaridan signal: “Hozircha real emas”
Manchester Evening News muxbiri Steven Railston esa yanada sovuqroq baho berdi. Uning aytishicha, klub ichkarisidagi manba bilan Trondxeymda bo‘lgan suhbat chog‘ida Tchouameni bo‘yicha pozitsiya aniq ifoda etilgan: hozircha bu transfer moliyaviy jihatdan real emas.
Manchester United ichkarisidagi kayfiyat shunday: agar Real Madrid uni sotishga tayyor bo‘lsa ham, so‘raladigan narx klub imkoniyatidan yuqori bo‘lib qoladi. Tchouameni – orzu, lekin orzuning ham narxi bor.
Shunga qaramay, agar Madrid tomoni bozor narxiga yaqinroq raqamlar haqida signal bersa, United bu imkoniyatni darhol ko‘rib chiqishga tayyor. Hozircha esa bunday signal yo‘q. Savol ochiq turibdi: Real Madrid haqiqatan ham uni sotmoqchimi yoki bu faqat bozor shovqini xolos?
Alex Scott: “Cherries” devori va Chelsea soyasi
Manchester United uchun yagona nom Tchouameni emas. Bournemouth markaziy yarim himoyachisi Alex Scott ham klub radarida. 22 yoshli futbolchi o‘tgan mavsum Premier League sahnasida o‘zini ko‘rsatdi va tezda top-klublar ro‘yxatiga kirib bordi.
25 iyunda TEAMtalk xabariga ko‘ra, United Scott bo‘yicha so‘rov yuborgan, ammo Bournemouth darhol rad etgan. Klub pozitsiyasi aniq: u sotilmaydi.
Bu qat’iylikni so‘nggi haftalarda Chelsea ham his qildi – London klubi taklifi ham rad etildi. “Cherries” yozda Scott’ni qo‘yib yuborishni istamayapti. Reja boshqacha: transfer oynasi yopilgach, u bilan yangi shartnoma tuzish, lekin kelajakda chiqish bandi orqali katta transferga yo‘l qoldirish.
“The Athletic” jurnalisti Laurie Whitwell fikricha, agar baribir bir kun kelib Bournemouth devori yorilsa, hozircha eng qulay pozitsiyada turgan klub – Chelsea. U “Talk of the Devils” dasturida shuni ta’kidladi: agar London klubi allaqachon jiddiy taklif bilan chiqqan bo‘lsa va u rad etilgan bo‘lsa, demak, gap kichik summalar haqida emas.
Shu bois, hozirgi manzarada Scott uchun kurashda Manchester United emas, aynan Chelsea oldinga chiqib turgandek.
Reja B va C: Kone va yashirin variant
Manchester United esa uchinchi yarim himoyachi bo‘yicha faqat bitta nomga qaram bo‘lib qolmagan. Klub allaqachon Roma futbolchisi Manu Kone vakillari bilan aloqaga chiqqani tasdiqlangan, uning jamoasi esa yozgi transferga yo‘l ochib qo‘ygan.
Bundan tashqari, klub 40 million funt atrofida baholanayotgan, Premier League’da yetarlicha e’tibor olmagan yana bir markaziy yarim himoyachini ham jiddiy ko‘rib chiqmoqda. Ism hozircha oshkor qilinmayapti, ammo ichki manbalar bozor stolidagi variantlar soni beshtacha futbolchi atrofida aylanishini aytmoqda.
Old Traffordga kim keladi? Tchouameni kabi super yulduzmi, Scott kabi istiqbolli ingliz talanti yoki Kone singari tayyor, ammo kamroq shov-shuvli nommi?
Yoz hali oldinda. Savol esa aniq: Manchester United chempionlikka haqiqiy zarba berish uchun o‘rtadagi bo‘sh katakni qaysi ism bilan to‘ldiradi?
