Los Angeles Lakers rekord summaga sotilmoqda: yangi davr boshlanadimi?
Los Angeles’da sport sahnasi yana larzaga keldi. Basketbol olamining eng yirik brendlaridan biri – Los Angeles Lakers – yangi egalar qo‘liga o‘tmoqda. Klubni amerikalik biznesmenlar Josh Kushner va Bob Iger 12 milliard dollardan oshiq narxda sotib olayapti. Bu professional sport tarixidagi navbatdagi rekord bitim.
Rekorddan ham qimmat brend
Atigi bir yil avval Mark Walter Lakers’ning nazorat paketini Buss oilasidan taxminan 10 milliard dollarlik bahoda qo‘lga kiritgandi. O‘shanda ham bu raqam ligadagi klub qiymatlari bo‘yicha chegarani keskin ko‘targan edi. Endi esa yangi kelishuv o‘sha darajani bemalol yangilab, franchayzing qiymatini osmoniga uchirdi.
Qiziq tomoni shundaki, Kushner va Iger dastlab Las Vegas’dagi kengaytma loyihasida faol bo‘lib, yangi jamoa atrofidagi jarayonlarga sho‘ng‘igan edi. Lekin yo‘nalish keskin o‘zgardi. Ular kutilmaganda aynan Lakers’ni nishonga olib, Mark Walterga agressiv taklif bilan chiqdi. Taklif shunchalik kuchli bo‘ldiki, o‘tgan yilgina tarixiy bitimni amalga oshirgan Walter ham ortga chekinishni ma’qul ko‘rdi.
Kushner va Iger o‘z bayonotida Lakers nomi bilan bog‘liq mas’uliyatni alohida ta’kidladi. Ular o‘zlarini “Lakers merosining navbatdagi qo‘riqchilari” sifatida ko‘rayotganini aytib, Jerry va Jeanie Buss rahbarligi hamda ko‘rgan ishlariga katta hurmat bildirib o‘tdi. Ularning niyati aniq: mavjud poydevorni mustahkamlash, maydonda eng yuqori darajada raqobat qilish va klub, muxlislar hamda Los Angeles shahri manfaatiga xizmat qilish.
Qisqa, ammo shov-shuvli Walter davri
Mark Walter uchun Lakers egaligi qisqa bo‘ldi, ammo izsiz emas. U o‘tgan yil oktyabrida NBA egalari tomonidan bir ovozdan ma’qullanganidan so‘ng klubning asosiy egasiga aylangandi. Endi esa u yana sahnani tark etmoqda.
Walter o‘z bayonotida Lakers’ni boshqarishni “hayotidagi eng katta sharflardan biri” deb atadi. U moliyaviy jihatdan bu bitim ulkan sarmoya bo‘lganini tan oldi, lekin o‘zi bilan olib ketadigan narsa – aynan jamoa atrofidagi hamjamiyat, muxlislar va klubni oiladek qabul qiladigan shahar ekanini urg‘uladi. Uning so‘zlariga ko‘ra, Lakers Los Angeles’ga tegishli va kelajak hanuz yorqin.
Walter va uning TWG Global kompaniyasi sport olamida anchadan beri yirik o‘yinchi. Ularning portfelida Los Angeles Dodgers, Los Angeles Sparks, Angliyaning Premier League klubi Chelsea va Professional Women's Hockey League jamoalari bor. TWG Motorsports orqali esa Cadillac Formula 1 hamda bir nechta avto-poyga jamoalarini boshqaradi.
Ammo Walter nomi faqat sport bilan emas, moliyaviy tergovlar bilan ham tilga olinmoqda. U sug‘urta sohasida qurilgan ulkan moliyaviy imperiya ortida turgan shaxs sifatida, hozirda federal darajada soliq firibgarligi ehtimoli bo‘yicha tekshiruv ostida.
Manhattan prokurorlari Delaware Life Insurance Co. va Clear Spring Life and Annuity Co. kabi, Walter nazorati ostidagi ikki sug‘urta kompaniyasi o‘zlarining xususiy kredit aktivlari boshqa Walterga tegishli loyihalarni moliyalashtirayotganini to‘liq ochib bermagan-bermaganini o‘rganmoqda. Shu bilan birga, Securities and Exchange Commission ham parallel surishtiruv yuritayotgani aytilgan.
Shunday fon ostida kelgan 12 milliard dollarlik taklif Walter uchun strategik chiqish eshigiga aylandi. U Lakers’dan ketmoqda, lekin sport biznesidagi izlari hanuz chuqur.
Yangi egalarning profili: texnologiya, media va futbol
Yangi davr boshida turgan ikki ism – Josh Kushner va Bob Iger – basketbol maydonidan ko‘ra ko‘proq texnologiya, media va sarmoya olamida tanilgan.
41 yoshli Kushner Thrive Capital venchur fondining asoschisi va rahbari. U, shuningdek, Oscar Health’ning hammuassisi va vitse-raisidir. Uning portfelida texnologiya startaplari, sog‘liqni saqlash va raqamli xizmatlar bor – bu esa Lakers’ni raqamli asrga moslab qayta brendlash, muxlislar tajribasini yangilash kabi yo‘nalishlarda katta imkoniyatlar eshigini ochishi mumkin.
75 yoshli Bob Iger esa global media sahnasida alohida o‘rin egallaydi. U yaqinda Disney bosh direktori lavozimini Josh D'Amaro’ga topshirib, o‘zining ikkinchi davrasini yakunladi. 2024 yilda esa u Willow Bay bilan birga NWSL klubi Angel City FC’ning nazorat paketini qo‘lga kiritib, professional ayollar futboliga ham kirib keldi. Endi esa uning portfeliga NBA’ning eng yirik brendlaridan biri qo‘shilmoqda.
Igerning media va brend boshqaruvidagi tajribasi, Kushnerning texnologiya va investitsiyadagi agressiv yondashuvi – bu ikkilangan profil Lakers’ni faqat sport klubi emas, balki global ko‘ngilochar platforma sifatida qayta formatlashga urinishi mumkinligidan darak beradi.
Savollar ko‘p, javoblar esa maydonda bo‘ladi
Bu bitim nafaqat NBA, balki butun sport biznesi bozoridagi baholarni yana bir bor ko‘tarib yubordi. Agar Lakers 12 milliard dollardan yuqori narxda qo‘l almashayotgan bo‘lsa, ligadagi boshqa yirik brendlar, televizion huquqlar, raqamli platformalar va stadion loyihalari qanday qayta baholanadi?
Yana bir savol – yangi egalik sport tomonini qanday boshqaradi? Rekord summalar, media va texnologiyaga boy fon, global brend kuchi. Endi bu hammasi Staples Center parketida (hozirgi nomi qanday bo‘lishidan qat’i nazar) natija bilan o‘lchanadi.
Lakers muxlislari uchun esa asosiy mezon o‘sha-o‘sha: jamoa yana chempionlik uchun kurashadimi yoki yo‘q. Yangi davr javobni aynan shu savoldan boshlaydi.
