Liverpool Yankuba Minteh uchun kurashni kuchaytirmoqda
Yozgi bozor qizigan sari, Liverpool o‘zining asosiy transfer maqsadlaridan birini qo‘ldan chiqarmaslik uchun bosimni oshiryapti. Klub Brighton bilan Yankuba Minteh borasida muzokaralarni davom ettirmoqda va bu ishni shoshilmay, lekin qat’iy olib boryapti.
Florian Plettenberg (Sky Sports Germany) xabariga ko‘ra, mersisaydliklar gambiyalik vingerga hanuz “juda kuchli qiziqish” bildiryapti. Eng muhim nuqta: ularni Mintehning o‘yin profili Mo Salah ketganidan keyin bo‘shab qolgan o‘ng qanotdagi rolga juda yaqin deb bilishmoqda.
O‘tgan mavsumda Brighton safida barcha musobaqalar hisobida 36 o‘yin, yetti gollik ishtirok. Statistikada portlash emas, lekin Premyer-ligadagi ikki yillik tajriba, chap oyoqli bo‘lishi va o‘ng qanotdan ichkariga kirib o‘ynashi — bozor sharoitida juda kam uchraydigan to‘plam.
Liverpoolning ikkita yo‘li: Minteh yoki Mbaye
Liverpool yozgi rejasini faqat bitta ismga tikib qo‘ymagan. Klub hali ham PSG vingeri Ibrahim Mbaye bilan bog‘liq variantni ochiq qoldirgan. Ammo hozirgi manzara bir narsani ko‘rsatib turibdi: Minteh — asosiy nishon.
Plettenberg ma’lumotiga ko‘ra, 22 yoshli futbolchi yaqinda olgan jarohatidan so‘ng to‘liq optimal holatga kelishi uchun yana 2–3 oy kerak bo‘ladi. Shunga qaramay, Liverpool uni hozir, jarohat fonida, katta to‘lov evaziga olishga tayyor.
Bu yerda qiziq paradoks paydo bo‘ladi. Klub 60 million funtga baholanayotgan, hali katta futbolga endi kirib kelayotgan, Premyer-ligada bir daqiqa ham o‘ynamagan 18 yoshli Mbaye o‘rniga, jarohatli bo‘lsa-da, Minteh uchun 65–70 million atrofidagi summani ko‘tarishga ko‘proq moyil.
Bozor shafqatsiz. Ayniqsa, vingerlar bozorida.
Nega aynan Minteh?
Liverpool skautlari va transfer guruhi nuqtayi nazaridan qaralsa, Mbaye uchun 60 million — yosh va tajribasiz futbolchi uchun juda katta sarmoya. Uning salohiyati yuqori, lekin u hali sinovdan o‘tmagan. Premyer-liga bosimi, temp, jismoniy o‘yin — bularning bari faqat nazariy emas, amaliy sinov talab qiladi.
Minteh esa bu bosqichdan allaqachon o‘tib bo‘lgan. Ikki mavsumlik Premyer-liga tajribasi, Brighton tizimida ishlash, yuqori intensiv pressing va tezkor o‘tish fazalariga moslashgan bo‘lishi — Liverpool qarorini og‘irlashtirayotgan asosiy omillar.
Chap oyoqli, o‘ng qanotda o‘ynaydigan futbolchi hozirgi bozor sharoitida deyarli oltin kabi qimmat. Ayniqsa, Salah ketganidan keyin klub tizimi uchun bu profil strategik ahamiyatga ega.
Liverpool ichida Mbaye haqida ham yuqori fikr bor. Ko‘pchilik uning “shift”i, ya’ni maksimal darajasi, Mintehnikidan balandroq bo‘lishi mumkinligini tan oladi. Agar Brighton bilan narx borasida kelishuv topilmasa, aynan shu omil Senegal terma jamoasi vakili foydasiga vaziyatni o‘zgartirib yuborishi ehtimoldan xoli emas.
Yana bir muhim farq: Mbaye, jarohatsiz va yosh bo‘lgani uchun, tarkibga darhol qo‘shilib ketishi mumkin. Minteh bilan esa Liverpool bir necha oy kutishga majbur bo‘ladi. Bu esa murabbiy shtabi uchun taktika va rotatsiya nuqtayi nazaridan ancha nozik qaror.
Narx, xavf va vaqt bosimi
Liverpool rahbariyati ichida ham bu transfer bo‘yicha bahslar bo‘layotgani tasavvur qilish qiyin emas. 65–70 million funt — jarohatli futbolchi uchun ham, bozor sharoitidan qat’i nazar, yengil qaror emas. Lekin klub bu narxni Premyer-liga tajribasi, mos profil va tizimga tez moslashish imkoniyati bilan oqlashga urinmoqda.
Mbaye bilan solishtirganda, xavf boshqacha ko‘rinishda. Unga kamroq to‘lash mumkin bo‘lsa-da, u hali bu ligani ko‘rmagan, bu tezlikni his qilmagan, bu bosimni boshidan kechirmagan. Uning “potensial”i yuqori, lekin bu so‘z transfer bozorida ko‘p marta kuygan klublar uchun ehtiyotkorlik bilan ishlatiladi.
Hozircha esa bir haqiqat aniq: joriy oynada yakuniy bitimga eng yaqin turgan nom — Yankuba Minteh. Brighton va Liverpool hali transfer summasida o‘rtacha nuqtani topgani yo‘q, lekin muzokaralar to‘xtagani yo‘q, sovimagani ham.
Savol endi shunda: Liverpool Salahdan keyingi davrni ishonchli, sinovdan o‘tgan, lekin jarohatdan qaytayotgan vinger bilan boshlaydimi yoki hali Premyer-ligada birinchi qadamini ham qo‘ygan, lekin ulkan salohiyatga ega bo‘lgan yosh yulduzga tikadimi?
