Liverpoolning yangi sport direktori: ichki yoki tashqi nomzod?
“Liverpool”da yozgi transfer oynasi hali rasman ochilgani yo‘q, lekin klub allaqachon eng muhim transferlardan birini qidirmoqda – sport direktori. Bu safar gap maydondagi yulduz haqida emas, kulis ortidagi asosiy boshqaruvchi haqida ketmoqda.
Richard Hughes oy boshida “Al-Hilal”ga yo‘l olishi tasdiqlangach, bo‘shab qolgan lavozim atrofida Anfieldda jiddiy harakat boshlandi. Jarayonni Fenway Sports Group prezidenti Mike Gordon shaxsan boshqarayotgani ham bu qarorning klub strategiyasi uchun qanchalik og‘ir tosh ekanini ko‘rsatib turibdi.
Ichki nomzod – Julian Ward sahnaga qaytadimi?
Klub ichkarisida ko‘zlar avvalo bir ismga qadalgan: Julian Ward. Hozirgi texnik direktor sifatida u allaqachon tizimni, skaut tarmog‘ini va “Liverpool”ning transfer falsafasini chuqur biladi. Klub rahbariyatiga yaqin manbalarga ko‘ra, aynan u Hughes o‘rnini egallash uchun eng kuchli ichki nomzod sifatida ko‘rilmoqda.
“Liverpool” rahbariyati odatda barqarorlikni qadrlaydi. Shu bois ichki tayinlov g‘oyasi juda jozibador: uslub o‘zgarmaydi, ish jarayoni uzilmaydi, murabbiy shtabi bilan aloqalar buzilmaydi. Bunday qaror ko‘pincha xavfsiz yo‘l sifatida baholanadi.
Ammo Anfielddagi suhbatlar faqat ichki variant bilan cheklanib qolmagan.
“Brentford” modeli va Lee Dykes omili
Klub tashqarisida ham bir nechta nomlar ko‘rib chiqilmoqda. Ulardan biri – “Brentford” texnik direktori Lee Dykes. “Liverpool” allaqachon u bilan uchrashgan, bu esa qiziqish rasmiy darajaga chiqqanini anglatadi.
Dykes 2019-yil may oyida “Brentford”ga kelganidan beri klubning eng katta kuchlaridan biriga aylandi. 2021-yilda “Brentford”ning Premier Leaguega ko‘tarilishi va undan keyingi yillarda o‘rta pog‘onada mustahkamlanishi – bevosita uning transfer siyosati, analitik yondashuvi va bozorni o‘qish qobiliyati bilan bog‘liq.
“Liverpool” uchun bunday profil juda mos: raqobatbardosh, byudjetni aqlli boshqaradigan, tizimli qurilishga urg‘u beradigan mutaxassis. Ayniqsa, moliyaviy jihatdan superklublar bilan to‘qnash kelayotgan bugungi futbolda.
Phil Giles – qoyilmaqom, ammo qiyin variant
“Brentford”dagi yana bir ism – sporting director Phil Giles ham “Liverpool” tomonidan yuqori baholanmoqda. Uning ishi, klubni Premier League darajasiga olib chiqishdagi roli, tizim yaratishdagi hissasi Anfielddagi qaror qabul qiluvchilarni befarq qoldirmagan.
Lekin bu yerda katta “lekin” bor. West Londonni tark etishga Gilesni ko‘ndirish oson bo‘lmaydi. “Brentford” uni klub loyihasining asosiy ustunlaridan biri sifatida ko‘radi, shartnoma, ishonch va erkinlik darajasi esa uni boshqa joyga olib chiqishni murakkablashtiradi. “Liverpool” qanchalik jozibador bo‘lmasin, bu transfer oddiy muzokara bilan hal bo‘ladigan turdagi emas.
FSG stolida bir nechta nomzod
FSG faqat bitta tashqi nomzodga yopishib olgani yo‘q. Lee Dykes bilan birga boshqa bir qator mutaxassislar bilan ham muloqot bo‘lgan. Bu – klub shoshmayotgani, variantlarni solishtirayotgani, ichki va tashqi nomzodlar o‘rtasida to‘liq tahlil qilinayotganini ko‘rsatadi.
Bir tomonda tizimni ichkaridan biladigan Julian Ward. Ikkinchi tomonda esa “Brentford” modeli orqali o‘zini ko‘rsatgan, raqamlar va bozorni boshqarishda kuchli bo‘lgan Dykes va yuqori baholangan Giles kabi mutaxassislar.
Savol endi bitta: “Liverpool” barqarorlikni tanlaydimi yoki yangi yo‘l ochadigan tashqi g‘oya ortidan ketadimi?
