Liverpool’da yangi davr: FSG ulushining 30 foizini sotdi

“Anfield” atrofida uzoq vaqtdan beri aytilayotgan sarlavha bugun rasman haqiqatga aylandi. Fenway Sports Group klubdagi 30 foizlik ulushini 1892 Holdings konsortsiumiga sotishga kelishib oldi. Bitim qiymati – 1,65 milliard funt. Bu “Liverpool”ni 5,5 milliard funtlik klub sifatida baholaydi.

Eng muhim nuqta: boshqaruv hanuz FSG qo‘lida.

Bhatia – yangi vitse-prezident, yangi markaziy figura

Konsortsiumning yuzi – Amit Bhatia. U kengaytirilgan direktorlar kengashida klubning yangi vitse-prezidenti bo‘ladi. Bhatia – Hindiston po‘lat magnati Lakshmi Mittalning kuyovi, uzoq yillar “Queens Park Rangers” hammuassisi sifatida ingliz futbolida tanilgan nom.

U 1892 Holdings nomli tuzilmani yaratdi va muzokaralarga shaxsan boshchilik qildi. Nom bejiz tanlanmagan – klubning tashkil topgan yili eslatib o‘tilgan. Orqasida esa kuchli moliyaviy blok turibdi: Mittal Family Trust, K5 Sports fondi (uning asosiy investori – Jeff Bezos) hamda Elaine va Eduardo Saverin oilaviy ofisi – EE Capital.

Direktorlar kengashi ham yangilanadi. Elaine Saverin va K5 Global hammuassisi va boshqaruvchi hamkori Bryan Baum ham “Liverpool” boshqaruviga qo‘shiladi. Jeff Bezos esa investor sifatida ishtirok etadi, lekin kengashga kirmaydi – u bu loyihada passiv rolni tanlagan.

Superboylar kulis ortida, FSG esa sahnada qoladi

Raqamlar hayratlanarli. Bezosning boyligi taxminan 272 milliard dollar. Eduardo Saverin – 33 milliard dollar atrofida. Mittal oilasi – qariyb 17 milliard dollar. Bunday kapital fonida ham FSG klubning operatsion boshqaruvini o‘zida saqlab qoladi va asosiy aksiyador bo‘lib qoladi.

Bitim tartibga soluvchi organlar tasdig‘idan o‘tishi kerak. Bu jarayon 90 kungacha cho‘zilishi mumkin. Shu vaqt ichida na yozgi transfer rejasi, na kundalik ish jarayonida o‘zgarish bo‘ladi. Rahbariyat, strukturaviy lavozimlar, sport siyosati – hammasi avvalgidek qoladi.

FSG bu kelishuvni chiqib ketish strategiyasi sifatida ko‘rmayotganini qat’iy ta’kidlaydi. 2010 yilda Tom Hicks va George Gillett davridagi deyarli halokatli boshqaruvdan so‘ng klubni 300 million funtga sotib olgan guruh o‘zini hanuz uzoq muddatli egalar sifatida ko‘rsatmoqda. Bitim FSGni kelajakda ulushini yana sotishga majbur etmaydi, xuddi 1892 Holdings’ni ham ulushni oshirishga majbur qilmaydi. Ammo Bhatia va hamkorlariga, agar kun kelib FSG sotishga qaror qilsa, ulushni ko‘paytirish imkonini beradi.

Nega aynan Bhatia? Puldan ham ortiq narsa

FSGni bu taklifga tortgan narsa – faqat kapital emas, konsortsiumning tarkibi va falsafasi. Asosiy egasi John W Henry, rais Tom Werner va prezident Mike Gordon deyarli bir yil davomida Bhatia bilan yaqindan tanishib chiqqan. Ular bu hamkorlik “Liverpool”ni global biznes, texnologiya va investitsiya maydonida yangi darajaga olib chiqishiga ishonyapti, ayniqsa Hindiston va Osiyo bozorlarida.

Mike Gordon bu yondashuvni ochiq ifoda etdi. Uning so‘zlariga ko‘ra, “Liverpool” har doim bir mavsumdan narini o‘ylab, uzoq muddatli manfaatlarni birinchi o‘ringa qo‘yib qaror qilgan klub. Shu tamoyil dunyo bo‘ylab hurmatli investorlar va biznes yetakchilarini jalb etishda davom etmoqda. Gordonning fikricha, Bhatia va konsortsium aynan shu falsafani bo‘lishadi, klubning o‘ziga xosligini qadrlashadi va mavjud poydevorni to‘ldiruvchi tajriba olib keladi.

Transferlar emas, aylanma mablag‘ kuchayadi

Premier League va Uefa moliyaviy qoidalari fonida yangi sarmoya birdaniga transfer bozorida portlashni anglatmaydi. Qoidalar klub sarfini aylanma mablag‘ bilan chambarchas bog‘lab qo‘ygan. Demak, Andoni Iraola va uning jamoasi uchun bu yozda byudjet birdaniga o‘zgarmaydi.

Ammo bosim boshqa yerda seziladi. Bezos, Bhatia va Saverin ishtiroki “Anfield” klubi uchun tijoriy eshiklarni keng ochadi. Global brendlar, texnologik hamkorliklar, yangi bozorlar – bularning bari yillik daromadni bosqichma-bosqich oshirishga xizmat qiladi.

Allaqachon raqamlar o‘sishni ko‘rsatmoqda: 2025 yil may oyida yakunlangan moliyaviy yil uchun “Liverpool”ning yillik daromadi 703 million funtga yetdi – klub tarixidagi rekord ko‘rsatkich. Yangi sheriklar bilan bu raqam yana qayta yozilishi ehtimoli juda yuqori.

1892 Holdings ovozi: ishonch va ambitsiya

1892 Holdings nomidan gapirgan Amit Bhatia bu sarmoyani “Liverpool Football Club”ga bo‘lgan chuqur ishonch bilan bog‘ladi. U FSG’ni egalar sifatida yuqori hurmat qilishini, “Anfield”da erishilgan yutuqlarni qadrlashini ta’kidladi. Bhatia uchun bu shunchaki moliyaviy bitim emas, balki klub rahbariyati bilan hamfikr bo‘lib, uzoq yillarga mo‘ljallangan sheriklik.

U o‘zlarini “bunday nufuzga ega klubga sherik sifatida qabul qilinish – katta sharaf” deb atadi va bu sarmoya “Liverpool” va uning rahbariyatiga chuqur ishonchdan kelib chiqqanini aytdi. Maqsad – klubning kelgusi yillardagi muvaffaqiyatlarini qo‘llab-quvvatlash.

QPRdan “Anfield”ga: Bhatianing yangi sahnasi

Bhatia deyarli 19 yil davomida QPR bilan bog‘liq bo‘lib, klub raisidan tortib, jamiyat bilan ishlash jamg‘armasi raisigacha bo‘lgan turli lavozimlarda ishladi. U o‘z ulushini faqat iyul oyida topshirgan. Endi esa uning yangi manzili – “Anfield”.

U konsortsiumdagi hamkorlari va FSG vakillariga qaraganda “Liverpool” atrofida ko‘rinadigan, faolroq figura bo‘lishi kutilmoqda. Tribunada, muzokaralarda, global sahnada – uning ismi endi bevosita “Liverpool” bilan birga tilga olinadi.

Savol esa ochiq qoladi: bu kuchli kapital va global tarmoq “Kop” tribunasidagi ovoz va murabbiy qo‘lidagi jamoaning ruhini qay darajada kuchaytiradi? Шунинг жавобини эса энди майдоннинг ўзи беради.