Liverpool kelajakka sarmoya kiritmoqda: N’Guessan transferi tasdiqlandi
Transfer oynasi so‘nggi nafaslarini sanayotganda, “Liverpool” yana bir bor kelajakka sarmoya kiritdi. Fabrizio Romano o‘zining mashhur “here we go” iborasi bilan “Saint-Etienne” hujumchisi Djylian N’Guessan bo‘yicha kelishuvni tasdiqladi.
18 yoshli fransuz hujumchisi — qanotda ham, markazda ham o‘ynay oladigan, portlashga tayyor futbolchi. “Anfield” uni hozir emas, ertangi kun uchun olib kelyapti.
N’Guessan: kelishuv bor, lekin kutish ham bor
Xabarni birinchi bo‘lib Foot Mercato jurnalisti Santi Aouna tarqatdi. U X’da “AS Saint-Etienne” va “Liverpool” o‘rtasida Djylian N’Guessan transferi bo‘yicha muzokaralar yakuniy bosqichga kirgani, faqat ayrim detallar qolganini yozdi.
Aouna ma’lumotiga ko‘ra, 2027 yilgacha shartnomasi bor bo‘lishiga qaramay, klub o‘zining 18 yoshli yulduziga eshiklarni ochgan. “Liverpool” esa uni “kelajak uchun katta loyiha” sifatida ko‘ryapti. Vaqt esa siqib boryapti: kelishuvni yakunlash uchun atigi bir necha soat borligi ta’kidlandi.
Shundan ko‘p o‘tmay, sahnaga Romano chiqdi va nuqtani qo‘ydi: kelishuv bitdi. Uning ma’lumotiga ko‘ra, N’Guessan “Liverpool”ga 2027 yil yozida qo‘shiladi, yana bir mavsumni “Saint-Etienne” safida o‘tkazadi.
Romano X’da shunday yozdi: “Liverpool agree deal to sign Djylian N’Guessan from Saint Etienne, here we go! 18 year old French striker joins in summer 2027, done also player side as #LFC got the authorization for medical. Follows Lucca Brughmans deal as another one for future – after @Santi_J_FM.”
Demak, Lucca Brughmansdan keyin “Anfield” yana bir bor kelajakni band qilib qo‘ydi. Klub transfer bozorida nafaqat bugungi, balki uch yil keyingi tarkibni ham chizib qo‘yayotganini yashirmayapti.
Gakpo – “Etihad” sari, lekin bitta “agar” bilan
Bu kelishuv fonida eng katta savol – Cody Gakpo taqdiri. Romano o‘z YouTube kanalida bu borada aniq gapirdi: futbolchi va “Manchester City” o‘rtasida shartnoma bo‘yicha kelishuv allaqachon tayyor.
“Manchester City” “Liverpool”ga 85 million funtlik rasmiy taklif yuborgan. Bu katta pul. Lekin “Liverpool”ning javobi oddiy: avval o‘ng qanotga to‘g‘ri futbolchini topish kerak. Topilmasa, Gakpo qoladi.
Shu yerda transfer bozorining haqiqiy “domino effekti” boshlanadi. Bir hujumchi kelajakka yozildi, ikkinchisi esa bugun klubni tark etishi mumkin. Barchasi bitta qanot o‘yinchisiga bog‘liq.
Sarr – yashirin nishondan asosiy maqsadga
Savol oddiy: “Liverpool” kimni xohlayapti? Romano aytishicha, hozircha asosiy nomzod – “Crystal Palace” vingeri Ismaila Sarr. Yankuba Minteh ham variant sifatida tilga olinmoqda, lekin Sarr ustun turibdi.
“Crystal Palace” hozircha “yo‘q” deyapti. Klub Sarrni qo‘yib yuborishga tayyor emas, lekin bozorni kuzatmoqda: agar to‘g‘ri taklif tushsa va o‘rinbosar topilsa, vaziyat o‘zgarishi mumkin.
“Liverpool” allaqachon bir marta urindi. Romano ma’lumotiga ko‘ra, mersisaydliklar haftaning boshida 50 million funtlik taklif yuborgan: 45 million asosiy summa va 5 million bonuslar ko‘rinishida. Taklif rad etildi. Rasmiy yozma taklif, og‘zaki emas.
Bu transfer atrofida dastlab deyarli hech qanday shov-shuv bo‘lmagandi. Romano aytganidan keyin esa vaziyat o‘zgardi: endi hamma Ismaila Sarr va “Liverpool” haqida gapiryapti. Eng muhim jihat: Sarrning o‘zi bu o‘tishni xohlaydi. U “Liverpool”ga borishni istayapti. Endi navbat klublarga.
“Liverpool”ga qanotchi kerak – hamma biladi
Romano ta’kidlaganidek, hozir “Liverpool”ga vingerlar har daqiqada taklif qilinmoqda. Klublar ham, agentlar ham vaziyatni juda yaxshi tushunadi: o‘ng qanotga sifatli futbolchi kerak, bozor esa bunday ehtiyojni darhol sezadi.
Bir tomonda – kelajak uchun band qilingan Djylian N’Guessan. Ikkinchi tomonda – hozirgi tarkibning muhim bo‘ligi bo‘lgan Cody Gakpo va unga tayyor turgan “Manchester City”. Uchinchisida – “Crystal Palace” bilan kurashayotgan Ismaila Sarr.
Savol endi bitta: “Liverpool” bu zanjirni qaysi halqadan uzadi – Gakpo bilan xayrlashib, Sarrni olib keladimi yoki bozor qarshiligiga chidab, yulduzini qo‘yib yubormay turadimi? Transfer oynasi bunga javobni uzoq kutdirmaydi.
