Liverpoolning Diomande rejasi: Tez va keskin hujum
“Liverpool” yozgi bozorga shunchaki kirgani yo‘q. Klub Mohamed Salahdan keyingi hayotni qurishga majbur, kenglikdagi bo‘shliq esa darhol to‘ldirilishi kerak. Shuning uchun ham “RB Leipzig”ning portlovchi qanot hujumchisi Yan Diomande atrofidagi har bir harakat Anfieldda alohida ahamiyat kasb etmoqda.
Bu safar esa klub o‘tgan yilgi Alexander Isak sahnasini takrorlash niyatida emas. Uzoq cho‘zilgan, asablarni yeydigan poyga bo‘lmaydi. Qarorlar tez, takliflar keskin bo‘ladi.
100 millionlik eshikni taqillatgan taklif
Yevropa bo‘ylab transfer bozorini diqqat bilan kuzatadigan Fabrizio Romano ma’lumotiga ko‘ra, “Liverpool” allaqachon birinchi katta zarbani berdi: “RB Leipzig” 100 million yevrolik taklifni rad etdi. Klub to‘xtamadi. Romano ta’kidlaganidek, mersisaydliklar Diomandeni qo‘lga kiritish uchun moliyaviy paketni maksimal darajada jozibador qilishga urinmoqda va yana stolga qaytishiga shubha yo‘q.
“Liverpool” hozircha ikkita frontda ishlayapti: “Leipzig” bilan kelishuv izlab, bir vaqtning o‘zida futbolchining o‘zini ham ishontirishga harakat qilmoqda. Maosh, bonuslar, rol, markaziy loyiha – hammasi paket ichida. Maqsad bitta: Diomandeni o‘z tomoniga og‘dirish.
“RB Leipzig” esa hozircha qat’iy pozitsiyada. Klub Diomandeni saqlab qolishni “aqlli qaror” deb biladi: yangi katta maosh, yangilangan shartnoma, Chempionlar Ligasi mavsumi – va keyingi yozda futbolchi o‘zi yo‘l tanlashi mumkin. Nemis klubi aynan shunday ssenariyni ideal deb ko‘rmoqda.
Bosim esa kuchayib boryapti. Romano so‘zlariga ko‘ra, “Liverpool” Diomande uchun 100 million yevrodan yuqori taklifga ham tayyor. Bu oddiy qiziqish emas, bu – hujum.
Taklif tafsilotlari: 80+20, 90+10 emas
Transfer bozoridagi ichki mexanizmlarni yaxshi biladigan Ben Jacobs “Liverpool”ning dastlabki taklifi atrofidagi raqamlarni aniqlashtirdi. Avvaliga taklif 90 million + 10 million bonus sifatida talqin qilingandi. Jacobsning ma’lum qilishicha, aslida gap 80 million yevro va 20 millionlik qo‘shimcha bonuslar haqida borgan.
Bu kichik farq emas. Bu “Liverpool”ning muzokaralardagi strategiyasini ko‘rsatib turibdi: asosiy summa va shartli bonuslar o‘rtasidagi balans klubning riskni qanday baholayotganini anglatadi. Shunga qaramay, “Leipzig” bu tuzilmani ham tezda rad etdi. Taklif stolga qo‘yildi va deyarli darhol qaytarib yuborildi.
Jacobsning yozishicha, “Liverpool” Diomandeni birinchi raqamli maqsad sifatida ko‘rmoqda, shu bilan birga Parijdan ham xavf bor – “PSG” ham taklif bilan chiqishi mumkin. Shunga qaramay, mersisaydliklar ichkarida optimistik: Diomandenning o‘zi Anfieldga ko‘chishni xohlashiga ishonch bor.
Ammo bu hikoyada bitta muhim “agar” bor: agar “RB Leipzig” sotuv bo‘yicha muloqotga ochilmasa, “Liverpool” kutib o‘tirmaydi.
Isak sabog‘i va bu yozdagi shoshilish
Bir yil avvalgi Alexander Isak sarguzashti hali unutilgani yo‘q. O‘sha payt “Liverpool” butun yozni deyarli bitta nom atrofida o‘tkazdi. “Newcastle”ning kirib kelishlari, ichki transfer rejalari, murakkab sharoit – hammasi vaqtni cho‘zdi. Klub esa bunga tayyor edi, chunki Isakning yoshi, formasi va “Premier League”dagi isbotlangan samaradorligi kutishga arziydi.
Bu yoz butunlay boshqacha. Salah ketdi, Cody Gakpo kutilgan darajada tortmayapti, qanotlarda sifatli, darhol ta’sir ko‘rsatadigan futbolchi zarur. Shuning uchun ham rahbariyat Diomande operatsiyasini avgustga cho‘zishni rejalashtirmayapti. Uzoq drama, bekor ketgan haftalar, oxir-oqibat boshqa variantga o‘tish – bu ssenariy bu safar qabul qilinmaydi.
Jacobsning ma’lumotiga ko‘ra, “Liverpool” allaqachon parallel yo‘laklarni ochib qo‘ygan: Said El Mala, Yankuba Minteh, Matias Fernandez-Pardo va Bradley Barcola kabi nomlar kuzatuv ro‘yxatida. Diomande birinchi chiziqda, lekin yagona variant emas.
Bu juda muhim signal: “Leipzig” darvozani berk tutsa, “Liverpool” bu eshikni tepib ochishga urinadi, lekin butun yozni uning oldida turib qolmaydi.
Yangi qanot, yangi davr
Anfieldda allaqachon bir yangilik bor: Osasuna klubi bilan shartnoma tugagach, yosh Victor Munoz kelib qo‘shildi. Lekin klub ichida bu transfer Diomande rejasi bilan aloqador emas, alohida loyiha sifatida ko‘rilmoqda. Ya’ni, Munoz – istiqbol, Diomande esa hozirgi jamoaning darhol asosiy bo‘g‘iniga aylanishi kerak bo‘lgan futbolchi sifatida baholanmoqda.
“Liverpool”ning yozgi strategiyasi aniq ko‘rinib turibdi: kenglikda yuqori tezlik, pressingga mos, gol va assist berishga qodir futbolchi kerak. Salah yillar davomida bu rolni mukammal bajardi. Endi klub uning o‘rniga kimni sahnaga chiqarishni hal qilishi kerak.
Diomande shu bo‘shliqni to‘ldira oladimi? Bozor bunga javob beradi. Lekin bir narsa ravshan: bu transfer hikoyasi Isakniki kabi oylar davom etmaydi. “Liverpool” yoki “RB Leipzig”ni qarorini o‘zgartiradigan taklif bilan ishni yakunlaydi, yoki tez orada boshqa nomga o‘tadi.
Yoz o‘rtalariga borib, Anfield qanotlarida kim yugurib yuradi – Diomande, yoki boshqa bir ism? Шу savol bugun “Liverpool”ning butun transfer rejasini belgilab turibdi.
