Liverpool Barcola uchun 145 millionga kurashmasligi kerak
“Liverpool” yozgi transfer oynasida o‘ng qanotga bitta yulduz izlab sarson. Mohamed Salahdan keyingi bo‘shliq tobora kattalashib boryapti, klub esa navbatdagi asosiy nishonni topgandek tuyulgandi: “Paris Saint-Germain” qanot hujumchisi Bradley Barcola. Ammo bu transfer atrofidagi raqamlar shu qadar keskinlashdiki, hatto klub afsonalaridan biri ham tormozni bosishga chaqirmoqda.
145 millionlik savol
Angliya matbuotida yozilishicha, “Liverpool” Salah o‘rnini to‘ldirish uchun avval Yan Diomande va Maykl Oliseni qo‘ldan chiqarib, endi e’tiborini Barcolaga qaratdi. Futbolchining o‘zi ham “PSG” bilan shartnomasini 2028 yildan keyin uzaytirishni xohlamayotgani haqida ichkarida ishora bergani aytilmoqda. Ya’ni, kelishuv uchun eshik ochiq.
Lekin Parij klubi narxni osmonga ko‘targan. Fransuz grandining talabi — qanot futbolchisi uchun qariyb 145 million funt. “Liverpool” esa bu raqamni pasaytirish ilinjida, taxminan 100 million atrofida bitim qilish mumkin deb o‘ylayapti.
Maykl Ouenning fikricha, bu chiziq oshib o‘tilmasligi kerak.
“Bu juda ham haddan tashqari ko‘pdek eshitilyapti, to‘g‘rimi? Ayniqsa Premyer ligada o‘zini hali isbot qilmagan futbolchi uchun”, — dedi u “Liverpool Echo” nashriga bergan intervyusida. “Albatta, u eng yuqori darajada o‘ynagan, lekin bir paytda “yo‘q” deyish ham kerak. Agar gap 145 millionga borib taqalsa… bu ko‘zni yoshlantiradigan raqam”.
Ouenning ohangi qat’iy: agar “PSG” bu narxdan qaytmasa, “Liverpool” ortga chekinishi lozim.
Bowen rejasi barbod, bosim esa oshib bormoqda
Ouen aslida Salah o‘rnini bosish bo‘yicha o‘z rejasi borligini eslatdi. U bir necha oy avval ham fikrini ochiq aytgandi.
“Men bir necha oy oldin aytganman: agar o‘rnimda “Liverpool” bo‘lsam, Salah o‘rniga West Hamdan Jared Bowenga borardim. Bu juda mantiqli ko‘ringandi”, — deydi u.
Ammo bu eshik endi yopilgan. Bozorda real variantlar kamaygan, raqiblar kuchli, shartnomalar murakkab. Shunday vaziyatda hamma bitta narsani biladi: “Liverpool”ga yuqori darajadagi qanotchi zarur.
“Muammo shundaki, hamma sening elita darajadagi futbolchiga zor ekaningni biladi. Shuning uchun ham sen juda katta pul to‘lashingga to‘g‘ri keladi. Ehtimol, shunday qilishga majbur bo‘lasan”, — deydi Ouen.
U baribir 145 millionlik talabga qaytadi. Unga ko‘ra, bu narx bozor bosimi bo‘lsa ham, mantiq chegarasidan chiqib ketgan.
Qanotlarda bo‘shliq va “deyarli yo‘q” bozor
Ouen “Liverpool”ning yana bir og‘riqli nuqtasini ochiq tilga oldi: yuqori darajadagi qanot futbolchilari tanqisligi.
“Avvallari Salah, Mane, Diaz bor edi”, — deydi u. “Yillar davomida qanotlarda nechta ajoyib futbolchilar o‘ynagan. Hozir esa aynan shu pozitsiyada tanqislik sezilyapti”.
Uningcha, klubga bitta emas, ehtimol ikkta yangi qanotchi kerak bo‘lib qolgan.
“Ular, ehtimol, ikkitaga muhtoj. Albatta, bittasi shart”, — deydi sobiq hujumchi. “Demak, bu pozitsiyaga jiddiy sarmoya kiritishdan boshqa yo‘l yo‘q. Barcola — mavjud, sifatli variantlardan biri. Va gap-so‘zlar shunchaki mish-mish emasdek. Qiziqish borligi sezilyapti”.
Shu bilan birga, u hammasi baribir narxga borib taqalishini tan oladi.
“Ko‘p narsa narxga bog‘liq bo‘ladi”, — deydi Ouen.
“Liverpool” qayerda chiziq chizadi?
Klub yangi davrga kirib boryapti, lekin Salahdan keyingi hayot uchun hali yakuniy reja yo‘q. Qanotdagi bo‘shliq tobora yaqqol ko‘rinmoqda, bozor esa “Liverpool”ning shoshilinch ehtiyojini his qilib, narxlarni yanada ko‘taryapti.
Barcola — yosh, iste’dodli, “PSG” darajasida o‘zini ko‘rsatgan futbolchi. Lekin Premyer liga sinovi — boshqa olam. Aynan shu yerda Ouen pozitsiyasi aniq: klub ambitsiyasi bilan moliyaviy intizomi o‘rtasida chiziq chizilishi kerak.
Savol ochiq qoladi: “Liverpool” Salahdan keyingi davrni boshlash uchun Barcolaga tikadimi yoki 145 millionlik talab klubni boshqa yo‘l izlashga majbur qiladimi?
