LeBron James yangi manzilga ko‘chdi: Philadelphia 76ers
Basketbol tarixining eng sermahsul to‘purarlaridan biri yana parketga qaytdi. 24-mavsum. Yangi shahar. Yangi libos. Endi u – Philadelphia 76ers o‘yinchisi.
ESPN insayderi Shams Charania xabariga ko‘ra, LeBron James Philadelphia 76ers bilan ikki yillik, 8 million dollarlik shartnomaga rozi bo‘ldi. Rasmiylashtirilgan lahza ortidan James o‘zi ham ijtimoiy tarmoqlarda qarorini tasdiqladi, bu safar ohangi odatdagidan ham jiddiyroq edi.
U hali ham qurbonlik qilishga, mehnat qilishga, mashg‘ulotlarda “grind” qilishga, raqobatlashishga va yana bir chempionlik zavqini his qilishga chanqoq ekanini yozdi. Va eng muhimi – bu chanqoqlikni aynan Philadelphia 76ers bilan qondirishga ishonayotganini aytdi.
L.A. sahnasidan tushib, Filadelfiyaga ko‘tarilish
41 yoshli LeBron o‘tgan mavsumni ham yulduz darajasida yakunladi. Bu uning faoliyatidagi 22-marta All-Star bo‘lgan mavsumi edi. Los Angeles Lakers safida odatdagi muntazam mavsumda 60 o‘yinda maydonga tushib, o‘rtacha 20,9 ochko, 6,1 ribaund, 7,2 golli uzatma va 1,2 to‘p olib qo‘yishni qayd etdi. Pley-offda esa raqamlar yana oshdi: 10 o‘yinda 23,2 ochko, 6,7 ribaund, 7,3 assist va 1,3 steal.
Bu transfer bilan LeBronning sakkiz yillik L.A. davri yopildi. U yerda cho‘qqi – 2020-yilgi chempionlik edi. Ammo so‘nggi bo‘lim chiroyli yakunlanmadi: Oklahoma City Thunder G‘arbiy konferensiya yarim finalida Lakersni “svep” qildi. Shu mag‘lubiyatdan keyin James klub rahbariyatiga ketish qarorini bildirgan edi.
Endi esa to‘rt karra chempion, kelajakdagi Hall of Famer tarixini boshqa sahnada davom ettiradi. City of Brotherly Love bu yozda allaqachon katta shov-shuvga sabab bo‘ldi: Boston Celtics bilan yirik almashinuv orqali Jaylen Brownni olib kelishdi. Endi esa sahnaga LeBron chiqmoqda.
Maxey, Edgecombe, Brown… va endi James
O‘tgan mavsumda 76ers 45–37 natija bilan muntazam mavsumni yakunladi. Jamoaning yuragi – Tyrese Maxey. Uning yonida esa debyut mavsumidayoq o‘zini ko‘rsatgan VJ Edgecombe. Shu duet jamoani pley-offda birinchi bosqichda aynan Celtics ustidan yetti o‘yindan iborat dramatik seriyada g‘alabaga olib chiqdi.
Keyin esa to‘lqin sindi. Ikkinchi bosqichda bo‘lajak chempion – New York Knicks ularni “svep” qildi.
Endi o‘sha og‘riqli mag‘lubiyatni eslash boshqacha. Chunki Filadelfiyada endi butunlay qayta qurilgan tarkib bor. Jaylen Brown kelgan, LeBron James kelgan, Maxey yetilayotgan, Edgecombe o‘sayotgan bir paytda bu beshlik liga bo‘ylab eng xavfli start tarkiblardan biriga aylanishi mumkin.
Savol bitta: bu yulduzlar jamlanmasi maydonda ham uyg‘un orkestrga aylanadimi?
“O‘ylagandimki, so‘nggi o‘yinim edi”
LeBron bu qarorga oson kelgani yo‘q. U ijtimoiy tarmoqlarda yozishicha, Thunderga qarshi seriya tugaganida o‘zini deyarli yakuniy nuqtaga yetdim deb hisoblagan.
U mavsum yakunidagi matbuot anjumanida ham ochiq gapirgan: o‘ziga qarab, bu o‘yinni hali ham chin dildan yaxshi ko‘radimi-yo‘qmi, o‘ylab ko‘rishi kerakligini aytgan edi. Bir necha oy o‘tib, javob aniq bo‘ldi: sevgi hali so‘nmagan. Uning fikricha, beradigan narsasi hali ko‘p.
Shu bilan birga, u bu qarorni “oxirgi tanlov” deb atadi. Demak, 76ersdagi davr tugagach, parketdan butunlay ketish ehtimoli juda katta. Charania ma’lumotiga ko‘ra, yangi shartnomada ikkinchi yil uchun player option bor – xohlasa, kelasi yozdayoq krossovkalarini mixga ilishi mumkin.
Rekordlar egasi – va yana bir marraga qarab
LeBron allaqachon liga tarixida eng ko‘p mavsum, eng ko‘p o‘yin va eng ko‘p daqiqa o‘ynagan basketbolchi sifatida yozib qo‘yilgan. Shunga qaramay, u hali ham rekordlar zinapoyasidan yuqoriga qarab chiqish imkoniga ega.
“King” James umumiy steals, assists va uch ochkoliklar bo‘yicha ham tarixiy reytinglarda ilk uchlik atrofida yuribdi. Yana bir mavsum – va u bu ko‘rsatkichlarda ham bir necha pog‘ona yuqoriga ko‘tarilishi mumkin. Bularning ustiga, hali ham eng qiyin, eng bahsli marralardan biri – beshinchi chempionlik halqasi sari quvlayapti.
41 yosh, 24-mavsum, yangi shahar, yangi bosim. Philadelphia basketbol shahri. Bu yerda yulduzlardan nafaqat shon-shuhrat, balki javobgarlik ham talab qilinadi.
LeBron James shu bosimni yana bir bor yelkasiga olishga tayyorligini aytdi. Endi savol boshqa: bu so‘nggi yurish haqiqatan ham ertakdek yakun topadimi yoki tarix sahifalarida achchiq, lekin halol yakun sifatida qoladimi?
