LeBron Jamesning kelajagi: qaror kechikdi, savollar ko‘paydi
New Yorkdagi Fanatics Fest maydonida hamma bir narsani kutdi. Mikrofon, chiroqlar, tomoshabinlar, yonida Tyrese Haliburton, “Mind the Game” podkasti efirda. Ssenariy deyarli tayyor edi: LeBron James nihoyat kelajagi haqida gapiradi.
Ammo u gapirmadi.
Haliburton podkast boshidayoq hammaning yodida turgan savolni berdi. LeBron esa jilmayib, orqa sahnadagi suhbatni eslatdi va mavzuni yopib qo‘ydi. Shundan keyin Haliburton ham ortiqcha tirishmadi. Katta e’lon bo‘lmadi, lekin Jamesning og‘zidan chiqqan har bir jumla yangi yozning eng yirik erkin agenti atrofidagi hikoyaga yangi qatlam qo‘shdi.
Sizlarni uzoq ushlab turmayman
LeBron va Los Angeles Lakers 30-iyun kuni rasman yo‘llarini ajratdi. Shundan beri liga bo‘ylab bitimlar yomg‘iri yog‘di, bozor qaynadi, lekin asosiy ism hanuz erkin.
James esa jarayonni cho‘zmoqchi emasligini ochiq aytdi: “Sizlarni juda uzoq ushlab turmayman”, – dedi u. Unga ko‘ra, bu faqat parketdagi moslik haqida emas. U keyingi jamoasini tanlayotganda nafaqat basketbol, balki shaxsiy hayoti, uy-joyi, oilasining kundalik ritmini ham o‘lchovga qo‘ymoqda.
Demak, drama uzoqqa cho‘zilmaydi. Ammo manzil hanuz qorong‘u.
Hech qanday ishora yo‘q: LeBron tomoshabinlar bilan “o‘ynadi”
Tyrese Haliburton o‘z ishini qildi. Indiana Pacers nomidan norasmiy “rekruter” sifatida LeBronni ishontirishga urindi. Avvaliga sms, so‘ng kulgiga sabab bo‘lgan javob: ikki dona kulayotgan emoji.
Maydonda esa LeBron hech bir yo‘nalishga og‘madi. Tomoshabinlarga yuzlanib, takliflarni o‘zi sanab chiqdi: “Warriorsni eshitdim… Philly… Miami… Kimdir ‘Yankees’ga kel, dedi”, – deb hazillashdi u.
Shunga qaramay, bitta narsa aniq: u qaerga bormasin, o‘zini hali ham markaziy figura sifatida ko‘radi.
“Qaerga bormayin, o‘zimning izimni qoldiraman, men tabiatan yetakchiman. Boradigan jamoamga moslashishga harakat qilaman, lekin ularga o‘tgan 23 yilda yig‘gan barcha bilim va vositalarimni ham beraman”, – dedi James.
24-mavsum yoqasida: oxirgi parda qanchaga cho‘ziladi?
LeBron 41 yoshda. Oldinda 24-NBA mavsumi. Statistik kitoblarda u allaqachon rekord egasi: 23 mavsum o‘ynagan yagona inson.
Shunga qaramay, u bu yilni “so‘nggi” deb belgilab qo‘ymadi. Aksincha, “bu faqat bitta yilmi yoki ikki yilmi” degan savolni ochiq qoldirdi.
“Bu faqat o‘zim uchun emas, oilam uchun ham katta qaror. Kareramning oxirgi qismi qayerda o‘tishini tanlayapman. Bu oxirgi yil bo‘ladimi yoki oxirgi ikki yilmi”, – dedi u.
Agar u ikki yilga cho‘zsa, 25 mavsum. Bu raqamni qayta takrorlay oladigan boshqa nom hozircha ko‘rinmaydi.
Oilaviy xarita: Bronny, Bryce, Zhuri va yangi manzil
James qarorni faqat shartnoma va chempionlik imkoniyati bilan o‘lchamayapti. Uning uyidagi har bir ism bu tanlovda alohida ustun.
U 22 yoshli o‘g‘li Bronny haqida gapirdi – yaqindagina Lakersdagi sobiq jamoadoshi. Bryce hozir University of Arizona tarkibida, o‘qish va basketbol orasida. Kichik qizi Zhuri esa 11 yoshda, uyda, otasining safarlari va yo‘qligini eng ko‘p sezadigan davrida.
LeBron unga bir narsani allaqachon aytib bo‘lgan: kelasi mavsum Lakers safida bo‘lmaydi, demak, Los Angeles endi doimiy manzil emas. Shu bois yangi jamoa tanlovi – bu yangi hayot geografiyasi ham.
“Odammilar: ‘tezroq qaror qil, LeBron’, deyishadi. Bu faqat jamoa haqida emas. Hozir juda ko‘p omillarni inobatga olyapman: o‘yinchi sifatida menga eng mos joy, inson sifatida menga mos joy, baxtim va albatta, oilam uchun eng to‘g‘ri variant. Sizlarni uzoq ushlab turmayman, lekin oilaviy tomon men uchun ulkan omil”, – dedi u.
Lakers bilan sakkiz yil: hurmat bilan yopilgan bob
30-iyundan beri ilk bor LeBron Los Angeles Lakers bilan ajralishiga ochiqroq to‘xtaldi.
“Avvalgi jamoamga salom, men Los Angeles Lakers bilan sakkiz ajoyib yil o‘tkazdim. Dunyoning eng tarixiy klublaridan biri. Jeanie Buss, butun Buss oilasi, Rob Pelinka. U yerda ishlagan barcha murabbiylar. Jamoadoshlarimning hammasi. Ularning barchasini sog‘inaman, albatta. Bu ajoyib safar bo‘ldi, endi esa yo‘limning so‘nggi bosqichida meni nimalar kutayotgani bilan yashayapman”, – dedi James.
U sevimli jamoalari haqida so‘ralganda, odatdagidek, hech qanday yashirin ishora bermadi: Lakers, Cavaliers va Heat bilan chempion bo‘lgan tarkiblar, shuningdek, 2008-yilgi Olimpiadadagi “Redeem Team” – uning uchun alohida boblar.
Rumorlar to‘lqini va navbatdagi qadam
LeBronning o‘zi og‘zidan manzil nomi chiqmagan bo‘lsa-da, atrofdagi mish-mishlar to‘xtamayapti. Ligadagi har bir contender, har bir katta bozorli klub va hatto yosh, tezkor loyihalar ham ichida bitta savolni aylantiryapti: agar James bizga kelmasa, “Plan B” qanday ko‘rinishda bo‘ladi?
Hozircha esa sahnada bitta odam jim turibdi, lekin hammani gapirtiryapti. U qarorini e’lon qiladigan kun – bu yozning haqiqiy burilish nuqtasi bo‘ladi. Savol faqat shunda: LeBron James so‘nggi bobini qayerda yozadi?
