Laporta Alvarez uchun so‘nggi muddatni e’lon qildi
Barcelona yozgi bozorni bitta transfer atrofidagi abadiy tortishuvga aylantirmoqchi emas. Klub prezidenti Joan Laporta Julian Alvarez borasida qat’iy chiziq chizdi: Kataloniyaliklarning argentinalik hujumchiga bo‘lgan qiziqishi iyul oxirigacha amal qiladi, xolos.
Gap shunchaki qiziqish haqida emas. Barcelona stol ustiga qariyb €100 millionlik taklif qo‘ygan, lekin bu raqam ham Camp Nou rahbariyatini o‘z strategiyasidan og‘dirib qo‘ya olmaydi. Sporting direktor Deco boshchiligidagi reja aniq: bitta nom uchun butun yozgi rekrutatsiyani qurbon qilish yo‘q.
Barcelona uchun vaqt ishlayaptimi yoki yo‘qmi?
AS nashri xabariga ko‘ra, Laporta Alvarez masalasini iyul oxirigacha yakunlashni talab qilgan. Bu ultimatum tasodifiy emas. Barcelona o‘tgan yillardagi cho‘zilib ketgan, oxir-oqibat so‘nggi kunlarda barbod bo‘lgan kelishuvlarni yaxshi eslaydi. Endi esa La Liga chempionlari transfer oynasining yakunida hujum chizig‘ida bo‘sh qolish xavfini qabul qilmoqchi emas.
Shu bois klub ichida bir tamoyil shakllangan: agar Alvarez bo‘yicha kelishuv o‘z vaqtida yopilmasa, Barcelona boshqa nishonlarga o‘tadi. Pul bor, taklif aniq, muddat belgilangan. Endi javob kutilyapti.
Metropolitano devori: “Julian sotilmaydi”
Madridning boshqa tomonida esa mutlaqo boshqa kayfiyat. Atletico Madrid Alvarez atrofidagi shovqinga qaramay, pozitsiyasini bir millimetrga ham o‘zgartirgani yo‘q. Metropolitano rahbariyati bitta gapni qayta-qayta takrorlayapti: ularning asosiy hujumchisi hech qanday narxda sotilmaydi.
€100 millionmi? Atletico uchun bu raqam hozircha shunchaki fon. Klub bu summani kelajakka oid rejalarga ta’sir qilmaydigan, muzokaraga sabab bo‘la olmaydigan shovqin sifatida ko‘ryapti. Madridliklar hozircha hech qanday rasmiy muzokara eshigini ochgani yo‘q.
Klub bosh ijrochi direktori Miguel Angel Gil Marin esa gapni yanada keskinlashtirdi. U Kataloniya tomonining uslubi borasida ochiqchasiga noroziligini bildirdi: “Raqib klub ichki doirasi haqida yetarlicha bilaman – ular o‘z shaxsiy sirklarining bir qismi sifatida OAV va muxlislar oldida harakat qilishadi, shuning uchun bu meni xafa qilmaydi”, – dedi u.
Shu bilan kifoyalanmay, u shaxsan Laportaning o‘ziga murojaat qilganini ochiqladi: “Ularning prezidentiga bo‘lgan shaxsiy munosabatim yaxshi, va men undan bu ishni to‘xtatishni aniq so‘radim, Julian sotilmasligini ochiq aytdim”.
Prezident Enrique Cerezo ham pozitsiyani yanada mustahkamladi. U do‘stona ohangda, lekin mazmuni aniq bo‘lgan fikr bildirdi: “Joan Laporta mening yaxshi do‘stim, u ajoyib prezident, va u juda yaxshi biladi, sizlarning barchangiz kabi, Julian Alvarez keyingi yili qayerda o‘ynashini”, – dedi Cerezo. Bu gaplar ortida bitta xabar yotibdi: Atletico uni qo‘yib yuborishga tayyor emas.
Endi navbat Alvarezga keldi
Klublar o‘z chiziqlarini chizib bo‘ldi. Endi diqqat markazida faqat bitta odam – Julian Alvarezning o‘zi. U jahon chempionati paytida kelajagi haqida ishora qilib, “orzusini” ro‘yobga chiqarish uchun transfer qilish istagini bildirgan edi. O‘sha paytda bu so‘zlar bozor uchun aniq signal bo‘lib ko‘ringan.
Turnirdan keyin esa Alvarez deyarli sukut saqlab kelmoqda. Mojaroni kuchaytirish, ortiqcha bosim yaratishdan qochyapti. Uning atrofidagi shovqin esa faqat ortib bormoqda.
Barcelona ichida aniq tushuncha bor: bu holatda faqat bitta narsa muvozanatni buzishi mumkin – futbolchining o‘zi rasmiy ravishda ketishni so‘rasa, xolos. Kataloniyaliklar shuni kutyapti. Agar Alvarez ochiqchasiga transfer istagini bildirsa, Atletico bilan muzokaraga yo‘l ochilishi mumkin, degan umid bor.
Agar u bunday qadam tashlamasa-chi? Unda Barcelona uchun bu transfer deyarli xom xayol bo‘lib qoladi. Laporta belgilagan muddat yaqinlashar ekan, savol tobora keskinlashyapti: Alvarez orzusi ortidan ketadimi yoki Metropolitano devorlari orasida qolishni tanlaydimi?
