Klublar jangi: Real Madrid, Bayern Munich yoki PSG?
Jahon chempionati odatda terma jamoalar sahnasi. Ammo bu safar kulis ortida boshqa bir poyga ham qizib ketgan: qaysi klub futbolchilari mundialda eng ko‘p gol uryapti?
Real Madrid – hujumning bosh orqasi
Hozircha peshqadam aniq: Real Madrid. Klub futbolchilari jami 16 ta golga muallif bo‘ldi va bu raqamning o‘ziyoq ularning maydondagi ta’sirini ko‘rsatib turibdi.
Bu portlashning markazida, albatta, Kylian Mbappe. Fransiya yulduzi yetti marta raqib darvozasini ishg‘ol qilib, turnirning eng yorqin figuralaridan biriga aylandi. Uning ortidan Real Madridning ikki boshqa yulduzi keladi: Jude Bellingham va Vinicius Junior. Ikkalasi ham terma jamoalari safida to‘rttadan gol urgan, biri Angliya, biri Braziliya uchun. Uchlik birgalikda mundialni Madridning sahnasiga aylantirib qo‘ydi.
Bayern Munich – Harry Kane boshchiligidagi quvlovchilar
Real Madridning ustunligi sezilarli, lekin orqadan Bayern Munich bosib kelmoqda. Germaniya giganti futbolchilari hisobida 12 ta gol bor.
Bu yerda asosiy zarba kuchi – Harry Kane. U o‘zi yolg‘iz bu ko‘rsatkichning yarmiga, olti golga mas’ul. Qolgan gollar esa butun dunyoga sochilgan. Ismael Saibari Marokko safida uch marta to‘p kiritdi. Luis Diaz Kolumbiya uchun, Nathaniel Brown va Jamal Musiala Germaniya uchun bittadan gol urib, Bayern nomini statistikada ushlab turibdi. Har biri o‘z terma jamoasida bosh rolni o‘ynamasligi mumkin, ammo umumiy rasmda ular muhim bo‘lakka aylanmoqda.
Paris Saint-Germain – keng front, ko‘p ijrochi
Gol bo‘yicha poygada keyngi qatorda Paris Saint-Germain. Fransiya chempioni futbolchilari 11 ta gol bilan yuqori uchlikni to‘ldiryapti.
Bu safda eng yorqin figur – Ousmane Dembele, u to‘rtta gol bilan jamoa ichki reytingida yetakchi. Uning ortidan Bradley Barcola ikki gol bilan keladi. Qolgan zarbalar esa butun dunyoga tarqalgan: Desire Doue, Achraf Hakimi, Nuno Mendes, Joao Neves va Ibrahim Mbaye o‘z terma jamoalari uchun bittadan gol urgan. Har xil uslub, har xil mamlakat, lekin bitta umumiy chiziq – PSG nomi statistikada doimiy ravishda ko‘zga tashlanmoqda.
Angliya klublari: keng frontdan zarba
Turnir davomida ingliz klublari ham o‘z ta’sirini ko‘rsatmay qo‘ymadi. Manchester United, Sunderland va Crystal Palace hozircha teng natijada – ularning har biri futbolchilari hisobida sakkiztadan gol bor.
Bu uchlik ortida esa Premyer-liganing boshqa gigantlari saf tortgan. Arsenal va Manchester City yettitadan gol bilan quvib kelmoqda. Liverpool futbolchilari oltida, Newcastle esa beshta gol bilan ro‘yxatning keyngi pog‘onalarida turibdi.
Gol urayotganlar ro‘yxatiga qaralsa, bu faqat individual mahorat emas, balki klub tizimlari, tayyorgarlik sifati va mavsum davomida olingan ritmning ham aks-sadosi ekani ko‘rinadi. Terma jamoalar yorqin sahnada o‘ynayotgandek tuyuladi, ammo har bir zarbaning ortida baribir klub ranglari ko‘rinib turibdi.
Savol esa endi boshqacha: turnir yakuniga kelib, bu yashirin poygada kim yuqorida qoladi – Madridning yulduzlar ansambli, Myunxenning barqaror mashinasi yoki Parijning keng frontli legioner armiyasi?
