Kane va Al-Hilal: Transfer bozoridagi o'zgarishlar
Harry Kane atrofidagi shovqin endi faqat Ballon d’Or bilan cheklanmayapti. Angliya terma jamoasi sardori “Bayern Munich”dagi birinchi to‘liq mavsumidan so‘ng nafaqat mukofotlar, balki kelajak manzili haqida ham kun tartibiga chiqdi.
Uning vakillari Saudi Pro League gigantlaridan biri – Al-Hilal bilan muloqot olib borgani aytilmoqda. Kane esa kelajakda Arabistonga yo‘l olish g‘oyasiga ochiq ekani xabar qilinmoqda. Bu, albatta, futbol bozoridagi kuch nisbatini o‘zgartirishi mumkin bo‘lgan darajadagi transfer bo‘lardi.
Ammo hozircha asosiy chiziq boshqacha. 33 yoshli hujumchi o‘zini Myunxenda ko‘rishda davom etmoqda. Klub bilan yangi shartnoma bo‘yicha dastlabki suhbatlar boshlangan, demak “Bayern” ham sardorlik darajasidagi yulduzini qo‘yib yuborishga shoshilmayapti. Bundasliga yozgi transfer oynasi 31-avgustda yopiladi. Sharqqa ko‘chish varianti ishga tushishi uchun vaqt juda tor.
Al-Hilalning ingliz rejasi: Kane yetarmidi, Watkins ham kerakmi?
Al-Hilal esa bitta ingliz yulduzi bilan kifoyalanmoqchi emas. Klub ikkinchi nishonni ham belgilab bo‘ldi – Ollie Watkins.
Xabarlar bo‘yicha, Aston Villa hujumchisi bilan shaxsiy shartlar borasida kelishuvga erishilgan. Lekin Saudiya klubi hali uning joriy jamoasi bilan rasmiy transfer taklifi bo‘yicha qog‘oz yuborganicha yo‘q. 30 yoshli forvard uchun hali ham savdolashish boshlanmagan, ammo kulis ortida ish qizigani aniq.
Eng qiziq savol: Al-Hilal aslida bitta hujumchi izlayaptimi yoki birdaniga ikkitasini? Ayrim ma’lumotlarga ko‘ra, ular dastlab Kane bilan kelishmoqchi bo‘lgan, bitim o‘xshamagach, Watkins variantiga o‘tgandek. Boshqa manbalar esa ikkala nomzod ham real variant sifatida turibdi, deydi.
Natijada tasavvur qilish oson: bir kuni Riyodda Kane va Watkins bir xil maydonda, bir xil libosda, bitta “9-raqam” uchun kurashib yurgan bo‘lsa-chi?
Gavi – “Old Trafford”ga yo‘q, “Barcelona”ga ha
Angliyaga qaytamiz. Manchester United bu yozda katta yulduz kutayotgan muxlislar sabrini yana sinovdan o‘tkazmoqda. Navbatdagi rad javobi – Gavi.
Ispaniya terma jamoasi bilan jahon chempionligi nishonlagan yarim himoyachi “Old Trafford”ga ko‘chish imkoniyatini rad etdi. U o‘z kelajagini “Barcelona” bilan bog‘lashni xohlaydi. United uchun bu nafaqat sport jihatdan, balki imij nuqtayi nazaridan ham sezilarli zarba: klub hali ham eng yorqin yosh iste’dodlar uchun birinchi tanlov emasligining navbatdagi isboti.
United tarkibi siyraklashmoqda: Zirkzee atrofida shamol esmoqda
Manchester United atrofidagi xavotir faqat kelmayotgan yulduzlar bilan cheklanmaydi. Endi klub o‘z futbolchilarini ham ushlab qolishi kerak bo‘ladi.
Napoli hujumchi Joshua Zirkzee bilan qiziqayotgani aytilmoqda. Niderlandiyalik forvard o‘tgan mavsumda Michael Carrick jamoasida asosan zaxiradan maydonga tushdi, lekin uning texnikasi va ko‘rinib turgan salohiyati Italiyaning amaldagi chempionlarini befarq qoldirmadi. Zaxira o‘rindig‘ida qolgan futbolchi Neapolda asosiy tarkib uchun kurashish imkoniyatini ko‘rsa, bu United uchun yo‘qotish bo‘lishi mumkin.
Napoli hujumchilar oviga chiqdi
Napoli faqat Zirkzee bilan cheklanib qolgan emas. Klub transfer bozorida hujum chizig‘ini tubdan yangilashga urinayotgandek.
Ular “Chelsea” bilan Nicolas Jackson bo‘yicha aloqaga chiqqan, shuningdek “Arsenal” hujumchisi Gabriel Jesus holatini ham so‘rab-surishtirgan. Bitta muammo bor: agar Jesus keladigan bo‘lsa, Napoli tarkibidan kamida bitta forvard bilan xayrlashishiga to‘g‘ri keladi. Moliyaviy muvozanat va tarkibdagi raqobat bunga majbur qiladi.
Demak, Neapolda katta domino effekti boshlanishi hech gap emas: bitta imzo – bir nechta ketishlar.
Loftus-Cheek: “Coventry” orzusi, “Milan” rad javobi
Italiya bilan bog‘liq yana bir sahna – Milan va Ruben Loftus-Cheek atrofida.
Premier League’ga yangi qaytgan “Coventry” tajribali yarim himoyachini yana Angliyaga olib kelmoqchi bo‘ldi. 30 yoshli futbolchi so‘nggi bor 2023-yilda “Chelsea” safida Premyer-ligada o‘ynagan, demak bu qaytish ramziy ma’no ham kasb etardi. Klub 8,5 million funt atrofidagi taklif bilan “Milan” eshigini taqillatdi.
Javob qisqa bo‘yldi: yo‘q. Italiyaliklar taklifni rad etdi. Demak, Loftus-Cheek hozircha San-Sirodagi rolini davom ettiradi, “Coventry” esa o‘rtada boshqa variant izlashga majbur.
“City” markazsiz qoldi: Rodri ketdi, Wharton nishonda
Angliyaga qaytamiz. Manchester City uchun esa yozgi oynaning eng og‘ir xabari allaqachon tasdiqlandi: jamoaning markazdagi tayanchi Rodri seshanba kuni “Barcelona” bilan shartnoma imzoladi.
Bu ketish Enzo Maresca uchun birinchi katta sinov bo‘ldi. Yangi bosh murabbiy endi o‘yin markazini qayta qurishi kerak. Transfer ro‘yxatida birinchi bo‘lib tilga olinayotgan nomlardan biri – “Crystal Palace” yarim himoyachisi Adam Wharton.
U ingliz terma jamoasi darajasiga ko‘tarilgan, lekin uning narxi hozircha aniq emas. Bu esa muhim omilga aylanadi: “City” allaqon bu yozda Elliot Anderson uchun 116 million funt sarfladi. Yana bir katta transfer – moliyaviy muvozanat, tarkib balansi va kelgusi mavsum rejalariga bevosita ta’sir qiladigan qaror.
Savol esa ochiq qolmoqda: Maresca Rodri bo‘shatib ketgan markazni qay tarzda to‘ldiradi – Wharton bilanmi yoki butunlay boshqa yo‘l bilan?
