Jake Paul va UFC o‘rtasidagi sovuq urush: yangi jangchilar
Bir necha oy oldin Jake Paul va uning MVP (Most Valuable Promotions) kompaniyasi Netflix bilan hamkorlikda katta shov-shuvga sabab bo‘lgan MMA kechasini o‘tkazdi. Maqsad ochiq edi: UFC’ni bosim ostiga qo‘yish, sahnaga yangi kuch sifatida kirib kelish. Sport nuqtayi nazaridan Dana White tuzadigan kartalar bilan solishtirish qiyin, lekin bir haqiqat bor: UFC javob qaytardi. Jake Paul sahnasidan uchta ismni tortib oldi. Bu esa raqobatning endi faqat so‘zda emasligini ko‘rsatadi.
Jake Paul bilan Dana White o‘rtasidagi adovat allaqachon hammaga ma’lum. Paul’ning MMA shoularida tomoshabinlar uchun ko‘ngilocharlik, shou, yulduzlar paradi birinchi o‘ringa chiqsa, UFC hanuz dunyodagi eng nufuzli aralash yakkakurash ligasi bo‘lib qolmoqda. Shunga qaramay, MVP’ning so‘nggi kartasida qatnashgan bir nechta yuqori darajadagi jangchilar Dana White nigohiga tushdi va natijada ikkala tomonga ham foyda keltiradigan uchta transfer ro‘y berdi.
UFC tomoni uchun bu — allaqachon millionlab odamlar ko‘rgan Netflix superkartasidan keyin ma’lum darajada tanilgan, tayyor auditoriyaga ega jangchilarni jalb qilish demak. Jake Paul uchun esa bu — uning promousheni chinakam jiddiy maydonga chiqqanini, hatto UFC ham MVP jangchilariga ko‘z tikayotganini isbotlash imkoniyati.
Salahdine Parnasse: Parijda shohona kirish
Uch ismning eng yirigi — Salahdine Parnasse (23–2). Fransuz yengil va o‘rta vazn oralig‘idagi muxlislar uchun allaqachon superyulduz: u KSW’da ikki vazn toifasida — featherweight va lightweight — chempionlik kamarini taqib yurgan paytida UFC’ning “sirena chaqiruvi” anchadan beri eshitilib kelayotgan edi.
MVP kartasida u Kenny Cross’ga qarshi oktagonga ko‘tarildi va favorit ekanini birinchi raunddayoq nokaut bilan isbotladi. Shundan keyin voqealar tezlashdi. Parnasse’ning o‘z so‘zlariga ko‘ra, aynan shu jangdan so‘ng UFC bilan aloqa boshlangan, ular uni Parijda bo‘ladigan kechada asosiy jangga taklif qilgan.
Natija ma’lum: Salahdine Parnasse rasman UFC bilan shartnoma imzoladi va 5-sentabr kuni bo‘lib o‘tadigan UFC Paris kechasida bosh jangni olib boradi. Raqib — tashkilot ichida katta obro‘ga ega Dan Hooker. Bu shunchaki debyut emas, uyda, Parijda bo‘ladigan sinov. G‘alaba esa uni bir zumda lightweight reytingining ilk o‘ntagiga uloqtirishi mumkin.
Parnasse Ariel Helwani bilan suhbatda, avval ham UFC bilan ma’lum bosqichlarda muzokaralar bo‘lgani, ammo MVP’dagi jangdan keyingi taklif ancha yaxshilangani, reytingga tez kirish imkoniyati aynan Hooker bilan bahs orqali berilganini aytib o‘tdi. Endi esa u Fransiyada o‘z davrining eng katta kechasiga tayyorlanmoqda.
Robelis Despaigne: qaytish va qasos izlab
Keyingi ism — Robelis Despaigne (6–2). U UFC uchun begona emas. Kubalik og‘ir vazn vakili ilgari ham bu ligada jang qilgan, biroq bir g‘alaba va ikki mag‘lubiyatdan so‘ng ro‘yxatdan chiqarilgan edi. Endi u mutlaqo boshqa obrazda qaytmoqda.
Despaigne oraliq yillarda Karate Combat’da yetti jang o‘tkazdi, oltitasini muddatidan avval yakunlab, tomoshabinlar e’tiborini tortdi. So‘ng esa MVP kartasida haqiqiy afsona — sobiq UFC chempioni Junior Dos Santos’ni birinchi raunddayoq nokautga uchratdi. Olimpiada bronza medali sohibi bo‘lgan taekvondochi uchun bu g‘alaba karerasidagi eng baland nuqtalardan biri bo‘ldi.
Uning zarba texnikasi og‘ir vazn tarixidagi eng xavfli arsenallardan biri sifatida tilga olinadi. Muammo esa boshqa joyda — wrestling. Raqib uni parketga tushira olgan paytlarida Despaigne ko‘p qiynalgan, birinchi UFC davrida ham shunday bo‘lgan. Endi ikki yildan keyin u bu bo‘shliqni to‘ldira oldimi-yo‘qmi, shuni oktagon ko‘rsatadi.
Media nuqtayi nazaridan u allaqachon superyulduz. Shuning uchun MVP uni Francis Ngannou bilan superfight qilish niyatida edi. Bu o‘zi UFC uchun ham xavfli ssenariy: sobiq chempion va tashkilotning eng katta raqiblaridan biri bilan bir kartada, boshqa promoushen bayrog‘i ostida ulkan shou. UFC aynan shuning oldini olishga harakat qilgani ko‘rinib turibdi. Despaigne’ni qaytarib olish — ham sport, ham siyosiy qaror.
Namo Fazil: Jake Paul sahnasidan Dana White eshigiga
UFC Jake Paul lageridan tortib olgan so‘nggi ism — Namo Fazil (10–1). Kurddan chiqqan, keyinroq AQSh fuqaroligini olgan bu jangchi welterweight toifasida UFC tashqarisidagi eng istiqbolli nomlardan biri sifatida tilga olinadi.
MVP’ning so‘nggi kartasida u raqibini ikkinchi raundda bo‘g‘ish usuli bilan taslim etdi va shu zahoti o‘zini keng auditoriyaga tanitdi. Aynan shu performans unga Dana White’s Contender Series uchun yo‘l ochdi. 18-avgust kuni u Kaik Brito’ga qarshi oktagonga kiradi. Bu jang uning hayotini o‘zgartirishi mumkin: ishonchli g‘alaba — UFC bilan to‘liq shartnoma degani.
Shu tariqa, Jake Paul va Dana White o‘rtasidagi sovuq urush yangi bosqichga ko‘tarildi. Netflix sahnasida porlagan yulduzlar endi UFC oktagoniga qadam qo‘ymoqda. Savol bitta: bu jangchilar kimning tarafini kuchaytiradi — Jake Paul’ning promoushenini, yoki oxir-oqibat baribir hammani o‘ziga tortib oladigan UFC’ni?
