IOC Infantino ustidan FairSquare shikoyatini rad etdi
Xalqaro Olimpiya Qo‘mitasi (IOC) inson huquqlari bo‘yicha nodavlat tashkilot FairSquare tomonidan FIFA rahbari Gianni Infantino ustidan tushgan shikoyatni rad etdi. Shikoyatning markazida — siyosiy betaraflik qoidalari va ularni buzganlikda ayblanayotgan futbol rahbari.
FairSquare da’vosiga ko‘ra, Infantino IOCning siyosiy neytrallik haqidagi me’yorlarini “muntazam ravishda buzgan”, xususan, AQSh prezidenti Donald Trump uchun ochiq siyosiy ko‘mak bildirgan. Tashkilot IOC Etika komissiyasiga murojaat qilib, bu xatti-harakatlar Olimpiya tizimi ruhiga zid, deb baholashni so‘ragan edi.
IOC matbuot kotibi AFP agentligiga ma’lum qilishicha, Etika komissiyasi shikoyatni batafsil ko‘rib chiqqan. Ammo yakunda bir muhim chiziq chizildi: Olimpiya nizomiga ko‘ra, har bir xalqaro sport federatsiyasi o‘z boshqaruvida mustaqil va avtonom hisoblanadi. Shu asosda komissiya bu ishni o‘z vakolatidan tashqarida, deb topdi.
Yuqori darajadagi sport amaldorlari, jumladan Infantino, IOC a’zosi sifatida qabul qilayotgan qasamyodida “tijoriy va siyosiy manfaatlardan mustaqil” harakat qilishga va’da beradi. Bu talab Olimpiya nizomida ham alohida mustahkamlangan. Shunga qaramay, IOC bu safar chiziqni FIFA va uning rahbariga tegmas darajada uzoqda qoldirishni ma’qul ko‘rdi.
Bu Infantino atrofidagi ilk bahs emas. Fevral oyida ham IOC uning Donald Trump chaqiruvi bilan o‘tkazilgan Board of Peace ilk yig‘ilishida ishtirok etgani, boshiga “USA” va “45-47” yozuvli qizil kepka kiyib olgani borasidagi tanqidlarni o‘rganib chiqqan va masalani yopiq, deb e’lon qilgandi. “45-47” yozuvi Trumpning ikki muddatlik prezidentlik ambitsiyalariga ishora sifatida talqin qilingan.
O‘sha paytda IOC matbuot xizmati FIFA bilan aloqada bo‘lganini tasdiqlagan va diqqatni boshqa yoqqa burishga uringan edi. Ularning ta’kidlashicha, FIFA futbol orqali G‘azo va Falastinda sport infratuzilmasi, ta’lim va elit sport rivojiga qaratilgan keng qamrovli tiklanish dasturini qo‘llab-quvvatlayapti. IOC buni “xalqaro sport federatsiyasining tabiiy roli” sifatida ta’riflagan. O‘z navbatida, IOC Olympic Solidarity dasturi orqali mintaqadagi sportni rivojlantirishni davom ettirayotganini eslatgan.
FIFA o‘tgan yil dekabr oyida Trumpga ilk bor ta’sis etilgan tinchlik mukofotini topshirgandi. O‘sha marosimda Infantino bu qarorni asoslab, AQSh prezidentining “tinchlik va birlikni dunyo bo‘ylab targ‘ib qilish yo‘lidagi favqulodda va noodatiy harakatlari”ni tilga olgan.
Siyosat va futbol chizig‘i shu qadar yaqinlashib ketgan bir pallada yana bir epizod e’tibordan chetda qolmadi. Shimoliy Amerika mezbonligidagi Jahon chempionati paytida Trump o‘zi maqtanib aytganidek, Infantino bilan telefon orqali gaplashganini, undan keyin FIFA AQSh hujumchisi Folarin Balogun olgan qizil kartochkadan keyingi diskvalifikatsiyani bekor qilganini eslatib o‘tgan.
IOC esa bugungi qarori bilan yana bir bor chegarani chizdi: siyosiy bahslar, shikoyatlar, bosimlar — bularning barchasi bor, lekin Olimpiya tizimi bu safar FIFA hududiga kirishni istamadi. Savol esa ochiq qoladi: global sport tashkilotlari siyosatdan qanchaga qadar qochib qutula oladi?
