Inter va Napoli: Tarixiy Qarama-Qarshilik

Milano klubi navbatdagi turga oddiy uch ochko uchun emas, tarix uchun maydonga chiqadi. Inter va Napoli o‘rtasidagi qarama-qarshiliklar kitobida yangi sahifa yozilishi mumkin: “nerazzurri” A Seriyada raqibga qarshi ketma-ket 16 o‘yinda gol urib kelmoqda. Endi esa bitta zarba yetarli – atigi bitta gol.

Opta ma’lumotlari aniq: hech bir jamoa Napoliga qarshi 17 o‘yindan iborat seriyada gol ura olmagan. Inter buni uddalasa, rekord endi faqat ularga tegishli bo‘ladi.

Bu o‘yin shunchaki statistik chizgilar emas. G‘alaba “Inter”ga yana bir muhim chiziqni tortib beradi: mavsumni uchta ketma-ket g‘alaba bilan boshlash imkoniyati. Bunga oxirgi bor 2023–2024-yilgi kampaniyada erishilgan, endi esa Simone Inzaghi jamoasi o‘sha darajadagi startni takrorlash yoqasida turibdi.

Markazda esa bitta ism yonib turibdi – Hakan Calhanoglu. U ilk ikki turda ham gol urdi. Endi navbatdagi turda ham to‘p kiritishga muvaffaq bo‘lsa, Inter tarixida mavsumning dastlabki uch o‘yinida ketma-ket gol urgan ilk yarim himoyachi sifatida klub yilnomalariga kiradi. Bu faqat shaxsiy rekord emas, balki jamoaning hujum falsafasini ifodalovchi ramzga aylanadi.

Ammo raqib ham jim emas. Napoli Interga qarshi so‘nggi besh uchrashuvda mag‘lub bo‘lmagan: bitta g‘alaba, to‘rtta durang. Bu seriya 2013–2015-yillardagi davrdan beri qaytarilmagan. Endi janub klubi yana bir tarixiy bosqichga yaqin – Interga qarshi ketma-ket olti o‘yinda mag‘lub bo‘lmaslik ularga yangi davr eslatmasini olib keladi.

Tarixiy muvozanat esa baribir Inter tomonda: 70 g‘alaba, 48 mag‘lubiyat va 42 durang. Bu qarama-qarshiliklarda milanliklar 229 ta gol urgan – A Seriyada faqat Juventusgina “Napoli” darvozasini ko‘proq ishg‘ol qilgan.

Bu safar-chi? Rekordlar bilan to‘la kecha yana bir tarixiy sahnaga aylanadimi yoki Napoli o‘z seriyasini asrab qoladimi?

Roma – yirik hisoblar, lekin Atalanta la’nati hanuz tirik

Poytaxtda esa boshqa ohang. Roma mavsumni shov-shuv bilan boshladi: ketma-ket ikki o‘yinda 4:0. Bunday start – kamdan-kam uchraydigan manzara. A Seriya tarixida atigi uchta jamoa dastlabki ikki turda kamida sakkizta gol urib, birorta ham gol o‘tkazmagan. Endi Roma ularning safida.

Rekordlar kitobi esa yana ochiq. 1983–1984-yillarda Juventus ilk uch turda kamida to‘qqizta gol urib, darvozasi daxlsiz qolgan so‘nggi jamoa bo‘lib turgan edi. Roma endi shu marraga bir qadam qoldi: navbatdagi uchrashuvda ham mukammal balansni saqlab qolsa, o‘sha tarixiy kampaniyani takrorlaydi.

Ammo raqib – statistikani buzishga o‘rganib qolgan jamoa. Atalanta – Rim klubi uchun haqiqiy “qora mushuk”. Bergamoliklar Romaga qarshi so‘nggi sakkizta ligadagi o‘yinda mag‘lub bo‘lishmadi: olti g‘alaba, ikki durang. Bu – bu qarama-qarshilik tarixidagi eng uzun mag‘lubiyatsiz seriya.

“Stadio Olimpico” ham Romaga kutilgancha tayanch bo‘layotgani yo‘q. Ular Atalantaga qarshi uyda o‘tkazilgan so‘nggi 12 uchrashuvdan atigi birida g‘alaba qozongan, oltita durang va beshta mag‘lubiyat. Tribunalar to‘lib-toshadi, ammo raqib bu stadionni o‘z uyiday his qila boshlagan.

Atalanta ham bu safarga oddiy mehmon sifatida kelmayapti. G‘alaba ularga 2020–2021-yildan beri ilk bor mavsumni uchta ketma-ket g‘alaba bilan boshlash imkonini beradi. Old chiziqda esa raqamlar o‘zi gapiradi: Donyell Malen A Seriyadagi dastlabki 20 uchrashuvida 19 ta gol urgan. Bunday temp bilan faqat ikki afsona – Gunnar Nordahl va José Altafini – faxrlanishi mumkin, ular o‘z vaqtida 20 o‘yinda 20 tadan gol urishgan.

Yana bir qiziq chiziq – Lazar Samardzic. U ketma-ket olti A Seriya mavsumida gol urishga muvaffaq bo‘lgan. Agar Romaga qarshi o‘yinda golli uzatma ham amalga oshirsa, 2004–2005-yildan beri birinchi bo‘lib olti mavsum davomida ham gol, ham assist qayd etgan eng yosh futbolchiga aylanadi.

Roma uchun bu faqat navbatdagi sinov emas. Bu – yirik g‘alabalar shovqinidan chiqib, haqiqiy “bogey-team”ni yenga olish-olmasligini ko‘rsatadigan oyna.

Juventus – Milan: gol yo‘q, taranglik yetarli

Tur markazidagi uchrashuvlardan biri alohida turibdi. Juventus va Milan o‘rtasidagi so‘nggi besh o‘yindan to‘rttasi 0:0 hisobida yakunlangan, shu jumladan oxirgi ikkisi ham. Bu qarama-qarshilik hech qachon ketma-ket uchta golsiz durang bilan yozilmagan. Endi esa tarixiy uchlik xavfi havoda osilib turibdi.

Bu seriya 1973–1974-yillardagi to‘rtta ketma-ket durangdan beri ko‘rilmagan cho‘zilma tenglikni eslatadi. Gollar yo‘q, lekin taranglik yetarli.

Himoyada Juventus o‘z rekordini baland ko‘tarib turibdi: ular Milan bilan so‘nggi olti uchrashuvning barchasida darvozalarini daxlsiz saqlagan. Bu – “rossonerilar”ning A Seriya tarixida bitta raqibga qarshi eng uzun golsiz seriyasi. Milan hujumi uchun bu raqamlarning o‘ziyoq chaqiriq.

Turin klubi yangi mavsumni ham odatdagi pragmatik uslubda boshladi: 1:0 va 2:0 hisobidagi g‘alabalar. Endi ular so‘nggi o‘n mavsum ichida atigi ikkinchi bor ilk uch turda ham “quruq” o‘yin o‘tkazish imkoniga ega.

Milan esa boshqa yo‘lni tanlagan. Ular uchun bu uchinchi ketma-ket g‘alabaga chiqish imkoniyati – so‘nggi yetti mavsumda to‘rtinchi marta shunday start qayd etish ehtimoli. Hujumda esa Nico Gonzalez bu raqibni yaxshi biladi: u Milan bilan o‘z uyidagi so‘nggi to‘rt o‘yinda uchta golli harakatda ishtirok etgan – bitta gol va ikkita golli uzatma.

Bu safar tarozining qaysi pallasi og‘ir keladi: Juventusning temir himoyasimi yoki Milan hujumining sabr kosasimi?

Lazio parvozi va Udinese soyasi

Mavsumni bunday boshlagan Lazioni hatto klub afsonalari ham tez-tez eslayvermagan bo‘lsa kerak. Ikki o‘yin, ikki g‘alaba, ikkita “quruq” o‘yin va har safar ikki tadan gol ustunligi. Rimning ko‘k tomonida bunday start ilgari hech qachon qayd etilmagan.

Endi ular uchinchi ketma-ket g‘alabani nishonlash yo‘lida. Klub tarixida bunday natija atigi ikki marta kuzatilgan: 1974–1975 va 2012–2013-yillardarda. Har ikki mavsum ham o‘z davrida katta umid va ambitsiyalarni boshlab bergan edi.

Lekin raqib – noqulay. Udinese Lazio uchun so‘nggi yillarda ko‘p bor yo‘lga to‘siq bo‘lib chiqdi: so‘nggi o‘nta o‘yinning sakkiztasida ular mag‘lub bo‘lishmadi. Bundan ham qizig‘i – Udinese bu stadionni yaxshi ko‘radi: so‘nggi 13 safardan 12 tasida yutqazmagan, sakkiz g‘alaba va to‘rtta durang.

Lazio uchinchi qadamni qo‘yadimi yoki Udinese yana bir bor rimliklarning parvozini sekinlashtiradimi – bu savolga javob aynan shu turda topiladi.

Genoa – Como: Dovikas izma-izda, ko‘z oldida Osimhen soyasi

Yana bir sahnada esa hujumchi uchun alohida chiziq chizilmoqda. Genoa va Como o‘rtasidagi uchrashuvda Tsous Dovikas A Seriya tarixidagi kuchli seriyalardan birini davom ettirish imkoniyatiga ega.

U ketma-ket beshta safar uchrashuvida gol urdi. Agar yana bir bor raqib maydonida to‘p kiritishga muvaffaq bo‘lsa, u sobiq Napoli yulduzi, hozirda Galatasaray safida to‘p surayotgan Victor Osimhenning 2023-yilda qayd etgan seriyasini takrorlaydi.

Besh o‘yinlik seriyani olti o‘yinga cho‘zish – bu shunchaki statistik chiziq emas. Bu hujumchi uchun yangi daraja, liga uchun esa yangi tahdid. Endi savol bitta: Dovikas shu bosim ostida yana bir zarba topa oladimi?

A Seriyada bu tur faqat ochkolar uchun emas, tarix, rekordlar va uzoq yillik komplekslar uchun kurashga aylanmoqda. Kimdir sahifani qayta yozadi, kimdir esa eski bo‘limni yopishga ham jur’at eta olmaydi.